|
سر النجاح اليمني التجاري ..والفشل السعودي
السلام عليكم ورحمة الله وبركاته ,,
نلاحظ أن المحلات اليمنية قلييل تفشل او تقفل , ونلاحظ ايضاً تخصصهم بأنواع معينه من التجارة , راح احاول ابين بعض النقاط الي شفتها .. يحكيلي احد الاشخاص عن شخص قريب له مستأجر محطه بنزين على اطراف المدينه .. يقول ان هذا الشخص يشرف على عمله بنفسه وعنده عماله يعطيهم بالراتب , ويحط لهم تارقيت مبيعات اذا تجاوزوه يعطيهم مكافآت اضاافيه على الراتب . المشكلة الاولى ماقدر يدير البقاله ابد , البقاله من اصعب الاشياء الي تديرها لأن فيه مافيا هنود موزعين , وصعب تجلس بالبقاله 24 ساعة تنتظر الموزع عشان تشرف على العمليه , والعامل حاول بشتى الوسائل انه يبيعه البقاله وانتم تعرفون هذي المواضيع .. لكن المشكله مش هنا .. المشكله بالبنشر الي ماقدر يشغله ومشاكله تزيد يوم عن يوم , والغريب ان فيه شخص يمني يجيله كل فتره ومصر انه يستأجر البنشر , وكل يوم يحاول يقنعه , والغريب ان المبلغ المعروض اكثر من الي يدخله هو اصلا من البنشر , لكن هو كان يرفض لسبب انه مايبي يأجر البنشر عليهم ويخربون عماله البقاله بعدين يخربون عمال المحطه والمغسله ..بالنهايه طلب من اليمني انه يجي ويجلس معه ويتفاهمون , قاله ليه انت متمسك بتستأجر هذا البنشر ؟؟ قاله شوف , انت مهما اشتغلت ماراح تقدر تشتغل مثلي , السبب أني مستأجر كل البناشر الي حولك , واغلبها تبعي , عشان اضمن اي واحد من هالاحياء السكنيه الي قريبه من هالمنطقه يبي يغير زيت بالنهايه بيغير زيت عندي , اذا ماعجبه هذاك البنشر بيجي للثاني وكلهم تبعي , النقطه الثانيه , كل بنشر جديد يعتبر نقطه مبيعات بالنسبه لي وبالتالي اشتري بالجمله اكثر ويطلعلي ارخص .. طبعا صاحبنا ما سأله كيف راح يقدر يضبط الموضوع مع العامل الي بيحطه ايش جنسيته او كيف راح يتعامل معه بالراتب لكن هذا راح نعرفه من قصه ثانيه .. احد الزملاء دخل احد محلات الادوات النحاسيه .. كانت مجموعه محلات جنب بعض , واحد المحلات فقط الي فيه شبكه , واذا اشترى من محل يقدر يحاسب بالثاني بالشبكه , سألهم كيف تشتغلون انتم ؟ قالوله صاحبنا واحد اصلاً .. لكن هو مستأجر كل هالمحلات , والبضاعه كلها له , انا اجي من البلاد مامعي شي , واتوظف عنده بدون راتب , لكن يعطيني محل وبضاعه , ولي نسبه من كل شئ ابيعه , وهو يجي نهاية الاسبوع ويجرد علينا محل , محل , اما الموزعين فكلهم عن طريقه ولا نقدر نتكلم مع احدهم او طلعني برا المحل !!! احد الأصدقاء كثير الذهاب للصين , يقول آخر اليوم نجلس في مقهى مع التجار اليمنيين الي شغلتهم الشحن وندردش , يقول انهم لهم بهالشغله سنواااات , كل مكتب تلاقيه متخصص ببضاعه معينه , يشتريها ويشحنها للسعوديه لتجار يمنيين معينيين في جدة , هم يستقبلونها ويخزنونها في مستودعات , بعدين يجونك شباب كثير من اليمن يبون يشتغلون , كل الي عليهم يبحثون عن كفيل ضامن من التجار الي بينهم ثقه او قرابه , ويفتح محل في اي مكان في المملكة , وتوصله البضاعه لحد عنده وتملى المحل بدون يدفع ريال واحد , فقط عليه يجهز المكان والمحل والبضاعه بالطريق , ويسدد لهم بالبيع والي مايبيعه يرجعه , وهكذا حتى يوقف من نفسه ! احد مطاعم الرز المشهوره في الرياض واللي لها فروع , لو تدخل تحصل الكاشير يمني (يلبسونه شماغ ويشخص بالطريقه السعوديه ) والمباشر يمني , والي يطبخون يمنيين , حتى معلم المقبلات الشاميه يمني , والكنافه كذلك , واذا طلبت شاهي يجيك ( كبوس اليمني ) ... مره كنت اشوف التلفزيون مع واحد من الشباب , جاء اعلان لمنتج سعودي نسيت ايش اسمه , قالوا بالاعلان ادعم بلدك , جلس يضحك الي جنبي قالي أما بشتريه بس عشانه سعودي ! قلت له اضحك على خيبتك والله ! هذا المنتج فلوسه تروح كلها لمواطن سعودي , راح يصرفها كلها هنا بديرتك لبقاله و لورشه ولمؤسسه مقاولات و لمطعم سعوديات , ماراح تطلع برا كلها .. هالفلوس الي تدفعها راح ترجع لك او لأخوك بطريقه او بأخرى , زي ما اليمنيين يسوون .. الواحد تحصله يوقف عند شاب يبيع جح على الرصيف او دهن عود عند مسجد ويجلس يكاسره على الريال , وبعدين يقول والله الشباب مايبون يشتغلون , لا والله انت الي ماتفكر الا بنفسك , والريال الي معك تحسب انه بيدوم لك , و لا تعتبر نفسك تحب ديرتك ما دمت مستعد تدفع 4 ريال لهندي ولا تدفع 5 لسعودي .. الموقف الاخير , احد الاشخاص تعرف على منتج سعودي قيمته ريال مشابه للسفن أب اسمه ( ليمو- ون) , نفس الحجم والطعم للسفن اب وبالنسبه لي والله انه اطعم واطيب ومكتوب عليه منتج سعودي , صار يجيبه من البقاله اذا صار عليه العشاء , هل تدرون ايش ممكن الناس تقول عنه ؟ يقولون يجيبه عشانه ارخص وهو نيته يسوي له دعاية !! |
التجار اليمنينن متكاتفين وتهمهم مصلحة أبناء جلدتهم,
أما تجارنا غالب عليهم الطمع والجشع يستغلون أي مناسبة لرفع الأسعار ولاهمهم بالموظفين اللي يشتغلون عندهم أو بالشعب السعودي المستهلك أهم ماعندهم مصلحتهم وبس. أحسنت على الموضوع المميز. |
كل اللي ذكرته صحيح
انا رحت لمحلات كثير تبيع بالجملة اذا سألت محل منهم وماعنده المنتج اللي تبغاه متوفر , يدلك على محل قريبه او صاحبة او ممكن يكون له مثل ماذكرت تروح تشتري منه هذا هو نظامهم ويوم تروح للمحل الثاني يكونون عارفين انك مرسول من المحل الاول هم يتعاونون الاقارب منهم والاصحاب ويفتحون محلات تنتفع ببعض او شخص واحد يفتحها ويشغل معارفه معاه انفع اخوي احسن من انه انفع الغريب والمنفعه متبادلة مثلا يفتح محل اقمشة نسائي + يفتح محل خياط نسائي + يفتح محل ادوات ومستلزمات الخياطة + محل مكاين الخياطة يفتح محل قرطاسية + يفتح محل خدمات طالب + يفتح محل خطاط ورسام + مورد بالجملة تروح للاول تاخذ اللي تبغاه واللي ماتحصله عنده يقولك روح للمحل الثاني وهكذا واحيانا من غير ماتطلب يبدأ يسوق للمحلات الثانية يقولك اذا تحتاج كذا وكذا انا ادلك على محل واحد صاحبي او انا متعامل معاه روح له وهذا اللي انصح فيه الاخوة والاخوات الشباب والشابات السعوديين اللي حابين يفتحون مشاريعهم تعاونوا على البر ابحث عن محل تنتفع منه و ينتفع منك وتعاونوا . مشروعك مطعم تعاون مع محل خضروات و محل لحم الخ سعودي وهكذا خصوصا المشاريع الصغيره الجديدة تحتاج مساندة اسند اخوك يسندك . لايغرك كلام تجار الجملة احنا نعطيك الافضل وباحسن سعر واحنا ماسكين السوق الخ ترى نفس الشي اللي يبيعه لك الاجنبي يبيعه لك السعودي وبنفس السعر اذا مو افضل والحين طرق الاستيراد من الخارج سهله ماتحتاج تضيق على نفسك مافي شي يجبرك تاخذ من تاجر واحد |
مرحبا
تعاملنا مع اليمنيين في مجالات كثيره ومالقينا منهم الا الخير اهل تجارة ولهم باع طويل في مجال الاستيراد والتوزيع وسر نجاحهم مثل ماقلت في التكاتف يدخلون باسهم في مشاريع كبيره في كل المجالات وكم اتمنى ان نجد هذا التكاتف والتعاون مع ابناء البلد الحل لتوطين الشباب السعودي في سوق العمل يبداء بدورات للخريجين دورات استيراد وتجارة جمله وتوزيع .. وقرار سيادي بحصرالاستيراد وتوزيع الجمله لسعوديين فقط من هنا سيكسب البلد توطين ابنائه في اهم مفاصل التجارة وجودة المنتجات ستكون افضل مماهي عليه الآن |
ليت قومي يعلمون :(
|
الحل لتوطين الشباب السعودي في سوق العمل يبداء بدورات للخريجين دورات استيراد وتجارة جمله وتوزيع ..
وقرار سيادي بحصرالاستيراد وتوزيع الجمله لسعوديين فقط من هنا سيكسب البلد توطين ابنائه في اهم مفاصل التجارة وجودة المنتجات ستكون افضل مماهي عليه الآن |
الموضوع جدا جميل
بين سطوره في اسرار مهنيه ما راح يلاحظها الا اللي مخه مركز صح عجبني الموضوع اللي يحكي عن حنكه وذكاء تجار اليمن وليس غريب فهم ابناء تجار وسلاله تجار ولهم باع طويل بالتجاره منذ رحلة الشتاء والصيف والاككيد انهم انغمسو في هالمهنه ابا عن جد وسلاله عن سلاله حتى اكتسبو هالخبره اتمنى هالموضوع يفهم كما اراده صاحب الموضوع ولا يفهم بطريقه خاطئه احترامي للجميع |
اقتباس:
|
هالجنسية هذي من حسن حظنا انهم مايخلون حريمهم يشتغلن
لكان بناتهم حاربن بناتنا بعد ويمكن هذا سر نجاح المشاريع النسائيه عندنا آآآه منهم بس مثل الفيران اذا شفتهم ترحمهم واذا راحوا من عندك عثوا بالبلد لكن يبي يجيلهم يوم ( إِنَّ رَبَّكَ لَبِالْمِرْصَادِ ) ويبي الله ينصر شبابنا عليهم كلامي هذا للئيم منهم اما التاجر الاجنبي الصالح الي مايحسد الاخرين ولايضيق عليهم والله ونعم فيه والله يبارك له في رزقه بصراحه ياليت لو انشئت جهة حكوميه تتبع لوزارة العمل والتجارة والاقتصاد الي يدير الجهة هذي يكونوا تجار سعوديين متمكنين (تجار صادقين ويخافون الله) اكيد لازم يرشحونهم الناس ومستشارين والهدف منها توفر محلات لشباب في جميع انحاء المملكه تدعمهم في جميع الانشطة التجارية معنوياً ومادياً مثلاً الشاب السعودي عليه يوفر المحل والتاجرالمسئول يمده بالبضاعه تاصل لحد محله واذا تعرضتهم مشاكل يرحون للجهة هذي ويعرضونها على المستشارين هناك اما انه يقفل محل المتمرد هذا او يغرم طبعاً الالتحاق بالعمل يكون بدون شروط مثل التدريب وخلافه لان العماله تجي للبلد ماتعرف شي ويتعلمون اثناء ممارسة النشاط التجاري الفرصه مفتوحه للجميع وحاجه ثانيه ملاك المحلات التجاريه الي في المولات وغيرها تفرض عليهم الجهة هذي انهم يرخصون اسعار الايجارات لهؤولاء الشباب كدعم معنوي لهم المهم بطريقة هذي نضيق على كل عامل يحارب شباب الوطن ياااااليت تتحقق الامنية |
اضمن لي الموزعين للبضائع يكونون سعوديين فقط وراح تشوف نجاح السعودي في التجارة
|
| الساعة الآن 10:59 AM |
Powered by vBulletin Version 3.8.9
Copyright ©2000 - 2024, Jelsoft Enterprises Ltd
جميع الحقوق محفوظة لحلول البطالة
استضافة، تصميم مواقع، برمجة تطبيقات، من توب لاين