كيف تبدأ/ تبدئين مشروع ناجح بـ ( 2000 ) ريال؟؟؟
 

السلام عليكم...
أولاً هذه أول مشاركة لي في المنتدى وأتمنى أن أكون ضيفاً خفيفاً ومفيداً لأخواني وأخواتي أعضاء المنتدى .
بالنسبة لطريقة إبتكار المشاريع وإكتشافها فهي تحتاج لخبرت سنوات في المجال التجاري ولن أطيل عليكم بشرحها ولكن مستعد لتقديم أي مساعده أقدر عليها .

( المشروع ):
طبعاً كلكم تعرفون بسطات العجز في سوق حجاب وسوق القريه الشعبيه وسوق الشرقي وسوق البطحاء .......... الخ وبرضو لاتنسون نفس البسطات في القصيم والدمام والاحساء وحائل وتبوك ومكه والمدينه .........الخ .
الززززززززززبده :
1/ عمل مسح ميداني عليهم والتعرف على المنتجات اللي يبيعونها وتحديدها((مهم)).
2/ تقريبياً تحديد حجم المبيعات اليومي لكل منتج وترتيبها حسب الأفضليه.
3/ التفكير بإكتشاف منتجات إضافيه يمكن بيعها عن طريق هذه البسطات((مهم)) .
( مميزات المشروع ):
أن هذولا النساء كبيرات في السن وأغلبهم لايقرأ ولايكتب ولايعرفون انترنت 95% من بضائعهم يشترونها من سوق الجمله بالرياض , مع إمكانية تأمين إحتياجاتهم من دول مجاوره وبأسعار أقل للجادين ومن يبحثون عن الرزق وبرأس مال بسيط بحيث يتم تأمين هذه المنتجات لهم والتعامل معهم بالجمله .
بالنسبه للبنات ممكن تستعين بالتنقل مع احد محارمها او السائق بوجود محرم وتبدأ التعامل معهم .
ياجماااااااااااعه ( البدايه صعبه ) في أي مشروع حتى لو كان بملايين ...
.................................................. ...........
انا مستعد للتواصل وتوجيه ومنفعة من يريد بعد الله , ولكن مع الجادين من رجال أو نساء واللي ماخذ الموضوع جد بيبين عليه واقدر اميزه وإنشاء الله أفيده ..

طبعاً كالعاده ربعنا عجااااااااااااااازين ... لكن بعطيكم مثال واحد بس .
فيه زعفران مطحون قيمة الدرزن في دبي جمله ( 55 ريال ) وينباع في الرياض جمله (85 الى 95 ريال ) وفي القصيم جمله (100 الى 110 ريال ) .
حجم مبيعاته بمعدل ( من 9 الى 13 درزن ) يومياً في بسطات القريه الشعبيه فقط .
ويالله عليكم الحساب والتنبيش والحررررررررررررررركه ياناس اصحو اصحو والله حررررررررررررررررررررررررام حرام .

طيب ياخوووي ليش ماتشتغل فيها انت

وانا بشاركك واصير انا مثل مندوب في القريه وانت مندوب في سوق احجاب ,,,

انتظر ردك ع الخاااص ,,,

(((( انا جــــــــــــــــــــــــــــــــــــــــاد))))

اخوي / المصمم . هذا اسمه قسم الخبرات العامه وانا ولله الحمد ما شي بشغلي وما اقدر ادخل في هالمجال . ولكن حبيت افيد الأعضاء من خبرتي البسيطه جداً .
اذا انت جاد رح وخذلك جوله عليهم وانا ممكن افيدك عن منتجات هم محتاجينها واعطيك عناوين مصدرها من خارج المملكة يعني بزودك بمعلومات لوجه الله ما ابي اي فائده إلا إني اتمنى أن تكون جاد وتنجح بإذن الله وتصير تشرهنااااااااااا .مزحه..

يعطيك العافية

تحياتي

فتى نجد

شكرا لك فكره جميله

يعطيك العافيه

عاطل الرياض و خريجه عاطله شكراً لكم ..
وعشان بديتو تحمسوني هذي معلوميه اضافيه :
فيه ماكياجات يبيعونها في البسطات طبعاً مكياج عادي اللي يجي في علبه طولها حوالي 25سم في عرض 15سم تقريباً وفيها عدة الوان .
جملتها في دبي بحدود ( 8 الى 12 ريال ) ويشترونها البسطات من سوق الجمله بالرياض ( 20 الى 25 ريال ).
طبعاً فيه انواع كثيره حمره وكحل وغيره .. والله ما اعرفها زين لكن البنات ادرا.
لا احد يقولي البنات يدورون الماركات لأن البنات اللي خارج المدن والعجز يستخدمون هذي الشغلات .
وروحو للمباسط وتأكدو بأنفسكم .

والله العظيم هذي الافكار البسيطه هي الي تجيب الغايبه بعد اذن الله طبعا ومشيئته ...

بجد اخوي الله يجزاك خير اشرح اكثر عن الموضوع وكيف الواحد ممكن يبداء خصوصا لو هو وحده مو واحد يعني عطنا البدايه كيف نبداء واكيد في ناس بتستفيد

جزاك الله خير
تحياتي

الأخ /فيصل الجهني , ياليت لو تحاول تشرح للأعضاء تجربتك وتحاول تفيدهم باللي تقدر عليه ومالك منهم الا الدعاء ..

الأخت / حرب الأوصاف , بالعكس بما انك بنت فهذا يسهل عليك أشياء كثيره جداً لأنك راح تتعاملين مع الحريم في البسطات وبيكون التواصل بينكم اسهل من لو كان رجل .
البدايه كالتالي :
1/ اذا كنتي بالرياض روحي للبسطات الموجوده في ( سوق حجاب بالنسيم ــ القريه الشعبيه بالدخل ــ حلة القصمان بالبطحاء ــ سوق الشرقي بالروضه ) وفيه اماكن ثانيه ما اذكرها الأن , عموماً روحي ومعك دفتر ابو مية ورقه وقلم ومري عليهم بسطه بسطه على السريع وسجلي كل المنتجات اللي يبيعونها .
2/ حاولي تسجلين اسعار بيع المنتجات اللي كتبتيها (طبعاً سعر بيعها في البسطات ).
3/ بعد كذا توجهي لسوق الجمله في الديره والبطحاء وحاولي تشوفين اسعار المنتجات اللي سجلتيها ( طبعاً سعر الجمله ) والغرض لمعرفة بكم يشترونها الحريم اللي في البسطات .
4/ طبعاً بما انك بنت ممكن تفكرين بإضافات منتجات اخرى جديده بحيث يمكن بيعها في هذه المباسط .

اتمنى ان تكوني جاده وحاولي والله يكتبلك التوفيق انشاء الله ...

اي خدمه مستعد وممكن اعطيك بعض المنتجات ايضاً فيها رزق ممتاز وطلوبه .
ملاحظه هامه / لازم تعرفين انك بنت وسعوديه يعني انتي ادرا الناس باذواق الحريم في بلدنا وممكن تنجحين بسهوله لأنك بتتميزين بالذوق المتميز عن غيرك ( طبعاً غيرك اللي هم العماله الهنود والباكستاني ).

للحديث بقيه بإذن الله ...

ملاحظه هامه :
بعد ما تسجلين جميع البيانات ممكن تبدأين البحث عن هذه المنتجات من دبي وعن اسعارها وانا ان شاء الله ممكن افيدك عن بعض المصادر اللي اعرفها واسعارهم مناسبه جداً واعلمك كيف توصلين للمصادر المتبقيه ..
ــــــــــــــــــــــــــــــــــــــــــــــــــ ــــــــــ
طبعاً الحريم اللي في البسطات عندهم خياطات في بيوتهم يخيطون البراقع والشيل . وانا اعرف محل في دبي يبيع قماش شيل فيه موديلات حلوه والبسطات يبونه ومطلوب جداً , وسعره في دبي ( 27 ريال ) وينباع جمله على الحريم في البسطات ( 70 الى 85 ريال ) حسب السوق والذوق وبما انك بنت اكيد بتعرفين الأذواق المطلوبه عندنا .
والله يكتب للجميع التوفيق .

مشكور اخوي فتى نجد على اهتمامك والله يوفقك بس حبيت اسالك انا رايح اشترك مع ولد اختي بمشروع جوالات (طبعا بعيد عن موضوع البسطات) بس حبيتك تنصحني واذا تعرف ارقام مندوبين ياريت تفيدني وتمنياتي القلبيه للاخ فيصل بالتوفيق

ام احمد حياك الله والله يكتب لكم التوفيق بإذن الله .
طبعاً أكيد ولد اختك عنده خبره في هالمجال عشان كذا لازم يروح بنفسه لدبي لمدة يوم واحد فقط وياخذ جوله ويسعر المحلات هناك .
المحلات المتخصصه في بيع الجوالات وملحقاتها تقع في منطقة شارع نايف (دبي) واكثر من 700 محل يعني طب وتنق .
وبرضوا اعرف واحد اماراتي شغال في هالمجال وسبق وعرض علي لكن للأسف ماهب شغلتي وبعطيكم رقمه وخلي ولد اختك يكلمه وياخذ من راسه (لكن ما ادري كيف اعطيكم الرقم في المنتدى ياليت يفيدني احد ).
ملاحظه / ممكن تضيفون نشاط بيع قطع غيار الجوالات وحسب علمي فيه رزق جيد وبرضو ركزو على الجوالات المستخدمه في الامارات .
وبالنسبه للشحن من دبي للرياض عندي ارقام مكاتب شحن كلموهم وشوفو اللي يناسبكم منهم.

والله يكتب لنا ولكم وللجميع التوفيق.

فتى نجد بارك الله فيك جهد تشكر علية لايضاح بعض الامور البسيطة والمفيدة جدا لمن يريد ان يكسب الرزق الحلال وانا على استعداد للمساعدة المادية لمن يرغب بشرط الجدية 000 لان من الواجب علينا كقادرين مساعدة من هم بحاجة بالدعم المادي او المعنوي بالتوفيق

الأخ / ru-media الله يجزاك الف الف خير وهذ ماهب شي غريب على مجتمعنا المعروف بالتكاتف والتعاون .
ومن هالمنطلق انا بعرض بعض الأفكار هنا ويالله ياشباب ويا بنات ورونا همتكم وهذا اخونا عرض عليكم الدعم المالي للجادين فقط فقط فقط وورونا إنجازاتكم خلونا بعد كم سنه نشوف رجال وسيدات اعمال بفضل الله ثم هالمنتدى .
فكررررره طازجه (للشباب) :
زي ما تعرفون اننا في السعوديه مبدعين في اغراض الرحلات (الكشتات) وعندنا شغلات عجيبه ورهيبه وكثيييييييييييره جداً جداً جداً في هالمجال , المطلوب منكم :
1/ البحث عن كل جديد في هذا المجال من ابتكارات وشغلات حلوه مثل (شنطة العزبه المجهزه ــ فراش البر ــ بعض الأواني للبر ــ الشراع للتذريه ــ وغيره وغيره وغيره وغيره .
2/ طبعاً البحث يبدأ من عند المحلات المشهوره في هالمجال وهم كثيرين طبعاً ومنهم
(السنيدي ) وقيسو على ذلك .
3/ بعد تحديد المنتجات وتحديد المصادر تبدأ بالتخاطب معهم على انك بتشتري جمله وتبدأ تسجل كم بيكلفك المنتج الفلاني بالجمله (طبعاً البدايه حبه حبه يعني تبدأ بكم منتج معين وبعدين تبدأ تزود ).
4/ بعد كذا تبدأ بتسويقها في الأماكن اللي محتاجينها فعلاً وغير متوفره بكثره عندهم, طبعاً من هم المعنيين............................. ( الأمارات , قطر , الكويت ) مبدئياً .
5/ طريقة التسويق في هذه الدول وشلون , اقولكم وشلون :
ــ يتم إنشاء موقع انترنت بشكل حلو ومرتب (بدون مطرسه تكفون) ويتم عرض هذه المنتجات فيه بالصور الواضحه وبالتفاصيل وبطريقه منظمه مع الأسعار (يعني شغل لبنانيين).
ــ بعد تجهيز الموقع يتم عمل اعلانات في الصحف عن الموقع مع توضيح محتويات الموقع باللإعلان , يعني مثلاً ( طلعت البر معنا احلى .............www.wwww.com .
ــ طبعاً عندهم جرايد اعلانيه زي ( المبوبه ــ الوسيله ــ الوسيط ......الخ ) يتم الاعلان فيها وممكن بالجرائد الرسميه مثل ( الخليج بدبي ــ الأتحاد بابوظبي ــ الوطن بقطر ــ الراي بالكويت ..........الخ ).
ــ ويتم التعاقد مع احد الشركات مثل ( ارامكس ) لتوصيل الطلبات .
ــ كما يمكن التسويق داخل السعوديه لأن الحاجات هذي مشهوره في منطقة نجد ولكن باقي المناطق ما يعرفونها ويبونها بنفس الوقت والله من واحد وواحد في جده او مكه او ابها او الشرقيه يسئلوني منين جبت هذي ومنين هذي ومنين هذيك ...
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــ
طبعاً الشغله كلها ( الموقع www ــ البضاعه ــ الإعلانات ) راس مالها بسيط يعني لايمكن يتجاوز ( 20000 ريال ) عشرين الف ريال , لأن ما يحتاج لا معرض ولا يحزنون وتخزين البضاعه بالملحق ولا بعشة الحمام (مزحه لاتصدقون) , واخونا ru-media ما قصر وتزهل لكن للجادين والصاملين ماهب حقين البلايستيشن والاستراحااااااااااااات .
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـ
(( انا لا أجهد نفسي بالأختراع , بل أجهدها بالبحث عن ما يحتاجه الناس )),,,,

الأخ / ru-media , عندي افكار اخرى سوف اعرضها لاحقاً بما انك مستعد للدعم المالي للشباب والبنات , لكن خل نشوف من الجادين وبعدها لكل حادثٍ حديث ...
والله يجعلها في موازين اعمالك ..

الأخت / laylagggg , ابشري والله يكتبلك التوفيق .
انا ممكن اجيبلك عناوين المصادر بالنسبه للزعفران والجلابيات طبعاً هذي ماهب شغلتي وللكن اعرف ناس هذي شغلتهم وخبراء في هالمجال ولا انا ما اعرف افرق بين الزعغران والليمون (مزحه) .
لكن انتي اكيد عارفه وش المطلوب وكم وغيره من التفاصيل , ولكن سؤالي مره ثانيه كيف احط العناوين والتلفونات هنا ياجماااااااااااااااااعه .
وللمعلوميه ترا راس المال بسيط يعني ممكن بمبلغ ( 3000 ريال ) تبدئين ..

لجميع القراء
انا عندي مصدر من (كشمير ) يصنعون (مفارش الطاولات والخداديات ) طبعاً اللي تنحط على طاولات المجالس وشغل رررروعه وشك يدوي ومقاسات مختلفه وانواع ( تول و اورقانزا ومخمل وغيره ) , وممكن بيعها في السعوديه بسعر منافس جداً جداً عن اللي موجود في المحلات .
السؤال انا نويت ادخل هالمجال بإذن الله لكن محتاج من البنات يفيدوننا بأفكار تسويقيه واللي ترغب بالتسويق ماعندي مانع . (اللهم ارزقني وارزق مني ) ...

فتى دبي لا هنت ولا يهونون الشباب والبنات

بالله عطني مصادرك في دبي للجلابيات ...

هلا أخوي فتى نجد ممكن تساعدنا في طلب المفارش ...



شاكرين ومقدرين ..

فتى نجد
انا مرة رحت لااسواق حجاب وحصلتهم يبيعون البراقع والنقابات ب15 و20 ريال والطرح ب25 ولما وصلت المنطقه النائيه اللي بالسوق يعني اللي على الاطراف حصلت خياطين يفصلون الطرح والنقابات ولما سالت قالوا البرقع ب5 والطرحه اظن ب10او 5نسيت والله المهم ان البساطات ياخذون من هالخياطين ويبيعونها
بدبل الدبل ا
لله يوفقك

طيب انا عندي حوالي 2000ريال من وين أبدأ وكيف
خوي فتى نجد والله جاد وحاب أحسن دخلي لكن ابي إللي يوجهني

طبعاً هألفين حيلتي في هالدنيا ما عندي غيرها إن ضاعت ضعت معها

اتمنى تشوف لي حل خوي فتى نجد وأكون لك من الشاكرين

أخوك / كاتم

أخوي فتى نجد
 

هلا وغلا بجميع الأعضاء وبك اخي فتى نجد


الله يعطيك العافيه اخي فتى نجد ورحم الله والديك وجزاك الله الجنة وغفر الله لك ذنوبك


ممكن تعطيني مشروع ناجح بمبلغ 2000 ريال اخوك المتميز من المدينة المنورة

وحاب اتعرف عليك وعلى فيصل الجهني للتواصل معي يمنع وضع ارقام الجوالات والايميلات ...... الادارة

اخوك خريج جامعي وعاطل الله يعين ويرزقنا

السلام عليكم جميعاً ....
أولاً المعذره لإنقطاعي هذه الفتره ولكن لأسباب خارج إرادتي وبشكل عام انا ماني من هوات النت بكثره وما عندي وقت كافي والله للمتابعه .

الأخوه والأخوات الكرام اللي لهم استفسارات هنا أو عن طريق الرسائل صدقوني حاولت ارد برسائل ولكن ما قدرت لأنه غير مسموح لي ارسل الى ان اشارك بعدد من المشاركات وغيره...................................الخ .
لذلك ارجو ممن لهم أي تساؤل أو استفسار أو استشاره مراسلتي عل إيميل

يمنع وضع الايميلات وارقام الجوالات ......الان يمكنك اخي استخدام الرسائل الخاصة .............الادارة

والله يكتب لنا ولكم التوفيق بإذن الله ...
ملاحظه : وصلتني رسائل على إيميلي من الموقع وهي استفسارات ولكن لم استطع الرد عليها لأنها لا تحمل عنوان البريد الإلكتروني للمرسل , لذا ارجو من المرسلين اعادة ارسالها من بريدهم مباشرةً لأتمكن من الرد .

الأخ ولد منيره :
انا فتى نجد ماهب (فتى دبي) , عموماً بخصوص مصادر الجلابيات فيه محلات كثير انا مريتهم وشفتهم في دبي وهم جمب بعض عشان كذا لازم تروح انت بنفسك وتشوف الموديلات والأقمشه والأسعار لأني سبق وقلت انا ماعندي خلفيه جيده فيها ولكن صديق لي يشتغل بهالمجال وماشي معه ومتوفق ماشاء الله ويشتغل بنفس الطريقه اللي قلت لك يروح كل فتره ويجيب الجديد , وانا مستعد اعطيك المكان اللي فيه محلات الجلابيات كلهم وراسلني على إيميلي .

الأخ الرسمي :
بالنسبه للمفارش انا مافهمت طلبك بالظبط وياليت تراسلني بالإيميل . وعموماً مصدري عنده اذواق رررررررررررروعه وبأسعار مناسبه جداً جداً..

الأخت الفراشه:
انا ما ركزت على البراقع بل على قماش البراقع !!!!!!!!! وهنا تحديداً أطلب من الجميع التفكير بهالكلمتين وتحليلها وبعدين تعميمها على اغلب المنتجات .

الأخ كاتم العبرات :
لازم يكون عندك أي فكره لمشروع معين في راسك وراسلني على إيميلي وحدد وش اللي تفكر فيه وانا مستعد اساعدك بدراسته وتسويقه . وحدد لي مكان سكنك وارسلي جوالك ..

الأخ المتميز :
اقول لك نفس الكلام اللي قلته لكاتم العبرات وانا بتصل فيك قريب ان شاء الله ولكن يهمني معرفة ان كنت تملك سياره وهل انت من الشباب النشيط المتحرك .. وراسلني بالإيميل.

شكرا اخوي فتى على مجهودك

ودي افتح كافي نت نسائي في الخرج ما في ولا واحد بس ماني عارفة ويش اسوي او كم بيكلف وشلون ابدا وايش احتاج افيدني وجزاك الله خير وانا عندي خلفية بالشبكات وصيانة الحاسب بس خايفة افشل خصوصا ان المبلغ اللي بسوي فيه قرض

اخوي سعود شاكر ومقدر لك .
الأخت / طالبة كبيرة , فكرة مشروعك فيها مخاطره كبيره لأن وضع مجتمعنا لايتقبل مثل هذه الأفكار خصوصاً إن البنت صعبه عليها جداً تطلع من بيت اهلها عشان تروح للنت كافيه !!!! الحين يالله تروح للسوق , وقيسي على نفسك وعلى قريباتك ومعارفك من البنات .
والنقطة الأهم وعلى ما أظن أن الجهات الحكوميه المعنيه لاتسمح وخصوصاً هيئة الأمر بالمعروف .
ولكن اذا كنتي متحمسه جداً للمشروع ممكن تشوفين حل ثاني , مثلاً ممكن تفتحين الكافي نت داخل مشغل نسائي كبير ومعروف بالخرج أو سوق نسائي بحيث تستأجرين منهم جزء وتجهزينه مبدئياً بعدد بسيط من الأجهزه (جس نبض للسوق) وبعدين اذا توفقتي تزودين بالأجهزه شوي شوي ..
وعلى فكره ممكن تحولين الفكره الى كافي نت رجالي وبالنسبه للسيطره عليه سهله جداً جداً وذلك لوجود برنامج محاسبي يظبط الدخل والمنصرف تماماً .
اتمنى ان اكون وضحت بعض الأمور , واذا فيه استفسارات اخرى مستعد بإذن الله..

مشكور

الله يوفقك ويرزقك

للشباب :
تسويق المخلطات (العطور) : طبعاً المخلطات موجوده وبكثره ولكن فيه مكان اساسي لم يتم استغلاله تسويقياً حتى هذه اللحظه وهو ( صوالين الحلاقه ) بطريقه مرتبه جداً من حيث الجوده والعرض .
مجرد فكره ......

للبنات :
لماذا لا يتم إنشاء مركز خدمات طالب نسائي 100% في موقع مناسب (مهم جداً جداً ).
مجرد فكره ...

الله يجزاك الخير

السلام عليكم ورحمة الله وبركاتة


هلا اخوي فتى نجد

والله يا اخوي معاي 30000 ريال وهذا المبلغ هو حيلتي بهالدنيا

وودي انميه وافتح مشرع بها المبلغ المذكور

وياليت تفيدين اخوك الصغير عبدالاله

الأخ/ قصه قديمه (عبدالإله) السلام عليكم ..
1/ هل لك سابق تجربه في المجال التجاري ؟ وما هو ؟
2/ هل انت لك ميول لمجالات معينه ؟
3/ هل لديك خبره في مجال معين؟
4/ هل لديك ذائقه جيده في الأختيار ( يعني انت ذويق في الأختيار )؟

اجبني على هذه الأسئله وانا بإذن الله بعطيك بعض الأفكار الجيده وكيفية تطبيقها . لكن المهم انك تتذكر المثل اللي يقول ( مايحك جلدك الا ظفرك ) على الأقل في بداياتك يعني لازم توقف على شغلك بنفسك لين تمشي اموره .
والله يكتب التوفيق للجميع ...

ماشاء الله فتى نجد الله يجزاك بالخير على افكارك ومساعدتك ..

بستشيرك عشان تكسب اجر في ..
وياليت ترشدني ماشاءالله عليك واضح انك خبره في السوق

فكرت اني أدخل مجال عمل بزنس وانمية مبدئيا بشتغل بــ3000 ريال فقط
ابي نصيحتك وين اجرب وفي اي مجال .. وماعندي اي خبره في التجارة لكن احبها ..


اختك طموحه بلا حدود :) في انتظار مشورتك


موضوعك هذا خلاني اسجل بالمنتدى فخلك كريم بنصحك لي :d