أفا عليك يا اخ بن صيتان ما سوينا شي
الحين بالنسبة للمعاهد و الله قعدت أبحث في النت و الناس صراحة آرائهم تختلف يقولون بيرلتز حلو بس أسعاره شوي غالية و اذا لا قدر الله رسبت في المستوى ترجع تدرسه من أول و جديد و بنفس السعر و المحادثة فيه كمان جيدة اما بالنسبة لوول ستريت يقولون حلو بس انه يعتمد عالطالب و مجهوده بشكل كبير لان الدراسة فيه بالكمبيوتر و ما تخارج و فيه ناس تقول انه تمام

كمان فيه معاهد ثانية زي المعهد البريطاني British council بس مدري كيف اللهجة البريطانية محنا متعودين عليها كمان يقولون سعره شوي غالي و كمان معهد اسمه els يقولن حلو و أسعاره حلوة يقع حول مدري ورا دوار الدراجة و دوار الفلك بس و الله ما ادري هذا الكلام بناءا عاللي درسوا فيه

أما بالنسبة للابداع الكندي أنا صراحة ما أعرفه بس تو قعدت أدور في النت و الناس فيهم اللي يمدحه و فيهم اللي يذمه بس عموما يقولون حلو و يركز عالمحادثة و اذا لا قدر الله رسبت تعيد المستوى ببلاش مو زي يبرلتز بس اهم شي لا تغيب كثير عشان ما يقولون التقصير منك شي كمان لازم تتاكد من السعر لان قرات عن تجربة وحدة قدمت و قالولها ب 4000 و اخذت السند مكتوب فيه 5000 قالتلها اللي تسجل عندها لا ما عليك هم غلطانين و دفعت 2500 و بقي 1500 قالولها بعدين جيبيها المهم بدات الدراسة و رجوها عالفلوس و ما الفلوس و جات اعطتهم الباقي 1500 قالولها ناقصة الحسبة قالت كيف قالوا هو 5000 راحت عند اللي سجلت عندها قالت اش الهرجة مو انتي قولتيلي و زي كذا قالت مين قال ؟؟؟؟؟ و اضطرت تدفع باقي الخمسة المهم لمجرد الحرص بس تأكد

بالنسبة لاختبار تحديد المستوى انا زيك كنت أبغى المستوى الأول و سووا لي مقابلة مو اختبار تحريري في يبرلتز و طلعت المستوى الرابع و كانت قافلة معايه عاد لما بدينا الدراسة اللي معاي دوافيييييييييير مستوى رابع في الجامعة و انا توني في البداية كان صعب بس الحمد لله استفدت منه جدا و قلت الحمدلله اني اخذت مستوى اعلى و كنت أرجع أذاكر و جبت ممتاز في الاختبار عاد لما بدينا الدراسة في الجامعة كنت أغلب الأشياء قد درستها في المعهد و أشياء حتى أكبر من مستوانا و كلمات جديدة كثيرة و المحادثة تمام و بالنتيجة طلعت الحمد لله 1 عالدفعة و الكل يسأل يقول قد درست برا ولا شي و الله زي ما أقلك كذا فعشان كذا لا ترجع المستوى الاول خليهم هم اللي يحددون و هم أصلا أكيد يبغونك في مستوى أقل عشان يصير لك مستويات كثير و يصير تدفعلهم بس انصحك اختبر زي الناس و حل كل شي تعرفه ياخي اش تبغى في المستوى الاول يعلمونك الأبجدية ولا أشياء قد درستها في المتوسط و الثاني ادرس أشياء جديدة عشان تفيدك في القسم و كلمات و قواعد صعبة و جديدة

و الله ترى أقلك من قلب مو أتفلسف عليك هي كلها 3 أسابيع و 3 ساعات يوميا بس صح انها تفيد بس مو ذاك الشي لان الشغلة تعتمد عليك 80 % و 20% عليهم حق الكتب و الشرح لكن أكيد ما بيحفظونك كلمات جديدة و يذاكرولك القواعد انت الله يعينك عليك الحمل كله هم يتابعون و يشرحون و يقيمون و يصححون بس المذاكرة و الحفظ عليك عشان كذا استخير و شوف المعهد اللي يناسبك هي كلها 3 أسابيع و اتوقع الكندي تمام زوره و اطلع عالمناهج و اذا فيه كلاس ادخله و شف كيف يدرسون ترى من حقك و اذا اعجبك توكل على الله و سجل قبل لا يروح عليك الوقت مكانه في حراء عند دوار التاريخ بس زي ما قلتلك انت جد و ذاكر اذا رجعت البيت لأن هي بس 3 ساعات و باقي اليوم لك الله يوفقك و يفتحها في وجهك و نشوفك ان شاء الله فلونت و بلبل في الانجليزي

أعتذر عالاطالة اخوي بن صيتان و بيني و بينك احترنا مع ذي المعاهد بس عاد انت شوف الأنسب لوقتك و ميزانيتك و زي ما قلتلك روح و اطقس و شوف اهم شي المدرسين اجانب و طمني بالله اذا سجلت و صارت امورك تمام في انتظارك و اكرر خدماتي لك اخوي

بالتوفييييييييييييييييييييييييق

هذا رابط موقع الكندي http://www.3c.com.sa/default.aspx?