السلام عليكم
مساء / صباح الخير ع الجميع
ياشباب وصبايا ماشاء الله اغلبكم يبيع ويشتري عن طريق النت
لكن للاسف كل واحد يبيع بمتجر خاص فيه وزباينة فئة محدودة والمثل يقول ( يد وحدة ماتصفق )
وماعندنا الا سوقين ( متعدد الباعة ) واحد مملوك من شاميين عرب وياخذ نسبة كبيرة من غير رسوم المعاملة وواحد مايقبل الا شركات ومؤسسات وياخذ نسبة ومملوك للبريد السعودي
عاد احنا اذا ماجتمعنا في سوق واحد ماراح نقدر نعيش بالتجارة الالكترونية ولا نقدر نخلي شركات الشحن تنزل لنا سعر الشحن غصب عنها
ومن هذا المنطلق قررت اني افتح سوق الكتروني متعدد الباعة وبأحسن سكربت ان شاء الله وبفريق خدمة عملاء ودعم وبخليه ( مجاني ) يعني لانسبة بيع ولا رسوم معاملات ولا كلام فاضي
وبخليه بطاقم عمل سعودي وبدور لي مصمم سعودي ومبرمج سعودي وبحاول اخليه باستضافة سعودية قدر المستطاع ونبي نبيع احنا يالسعوديين ونشتري على كيفنا وبدفع رواتب الشباب والبنات اللي بيكونون خدمة عملاء ودعم فني من حسابي ... ومايمنع اني اقبل الشباب والبنات المتطوعين بافكارهم وخبرتهم سواء تجار او مشترين او مبرمجين او مصممين او في اي مجال اخر
المهم انا نويت على سكربت معين سعره 25.000 يال اعجبني حيل ويقبل التسجيل عن طريق الفيسبوك والتويتر والانستقرام ويدعم خمس صور للمنتج ويدعم فيديو وميزات كثيرة وفتاكة .. وفاوضت كل شركات الشحن بالسعودية عشان ينزلون السعر لنا بالشحن لكن اغلبهم فيه تعنت وخصوصا اذا عرف ان الفريق اللي بيدير السوق سعودي ... عاد اخر سعر وصلت له من احد الشركات كان (00) ريال للتوصيل داخل السعودية لاي مكان و (00) ريال للدفع عند التسليم تضاف للمبلغ و(00) ريال التوصيل من الباب للباب وهذي تنفع للبنات و (00) ريال للدفع عند التسليم تضاف للمبلغ وبكرة يرسلون لي الاتفاقية عشان التوقيع والتصديق وبحاول فيهم محاولة اخيرة يمكن ينزل شي من المبلغ ... عاد المسؤول قال لي صدقني اذا زاد عدد الطلبيات عندكم بينزل سعر الشحن اجباري وراح تتنافس عليكم شركات الشحن
عاد نجي للاهم انا ماني محتاج دعم فلوس لكني محتاج دعم معنوي ولوجستي ومحتاج افكار ومقترحات ومحتاج اكُون قاعدة من التجار والتاجرات قبل ابدا المشروع فعليا
ومحتاج اهل الخبرة في الاستضافات والتصميم والبرمجة يساعدوني سواء تطوعا او بمقابل
ومحتاج كتاب للمدونه اللي راح تكون في السوق عشان ينيرون طريق التجار والمشترين المبتدئين بكتاباتهم وخبرتهم وابداعاتهم سواء تطوعا او بمقابل
وبالاخير اتمنى تثرون الموضوع بردودكم الكريمة واللي حاب يرسل لي خاص اهلا وسهلا واللي حاب يتصل او يرسل sms اهلا وسهلا 0530383033 اهم حاجة نكون ايجابيين ونطلع بحاجة حلوة
ملاحظة : تم اخفاء اسعار الشحن نظرا لبند السرية من العقد الموقع مع الناقل
تحياتي لكم وفالنا التوفيق ان شاء الله