السلام عليكم ....

محتاج مساعدتكم يا اخوان بعطيكم كل التفاصيل وانشااء الله انكم تساعدوني لانه بجد مأثر على نفسيتي ....

انا تخرجت من جامعه الملك سعود تخصص قانون بمعدل كويس 3.40 من اصل خمسه كنت اشتغل وادرس لمده 4سنوات ..بعدها لمن تخرجت كنت افكر اني انجزت شيء مستحيل وانه شهادتي مره حلوه ولمن جيت اقدم على وظايف قانونيه فيه كثير بس كان يهمهم الخبره وانصدمت من ردت فعلهم وتعبت نفسيا ... بس قلت لازم ابحث على خبره ودورت مكاتب محاماه بس للاسف بدون اي جدوى لانها تحتاج واسطه ....

يعدها جاني نصيب في شركه كبيره بدون خبره قبلوني وقالو راح نطورك وانا انبسطت مره لمن سويت المقابله قالوا لي راح تجلس فتره علاقات حكوميه وبعدها تصير مع المحامين ..استمريت بالشركه لحد الان صار لي سنه بس ابدا ما استفدت شيء من القضايا لانهم ما يعطوني اياها يعطونها للمحامين الي عندهم خبره وانا انسان احب القانون وابحث عن الخبره حاولت مع مديري وحاولت ايضا مع نائب الرئيس لكن كانوا يقولون لي راح نعطيك قضايا بس كان كله كلام وكان اكثر شغلي تعقيب ...


مع العلم يا اخوان ان راتبي ينزل ولو جلست بدون شغل وجلست عالتعقيب كان شيء عادي لان شغلت التعقيب اسهل من المحاماه بكثير واقل شغل ..




ابي اعرف منكم طريقه علشان اقدر استفيد في القانون واخذ خبره ،مع العلم انه اوقات فراغي ارجع للانظمه واقراها والتويتر عندي كله محامين بس انساها كلها لاني ما اطبقها على الواقع ولا احضر جلسات وحاولت كذلك اخذ دورات في القانون بس طلعت غاليه مره عليه واكيد راح تسالون كيف راتبك حلو والدورات غاليه عليك ،لاني اصرف على اهلي انا اكبر اخواني ووالدي متوفى... والله جميع المحاولات بلا جدوى حتى حاولت اترك الشركه بس ما لقيت راتب مثل هالشركه ......


واسف لو طولت عليكم طرحت هذا الموضوع لانه مضايقني وابي واحد فيه الخير يقولي حل وانشاء الله كلكم فيكم الخير ، وبرضوا اي واحد نفس مشكلتي راح يقرا موضوعي وبيلاقي حل ...... بعد مساعدتكم




والله يوفق الجميع