أبد ما كنت أظن في يوم شعري في عيوني يشين..}..~

أنثى المطر · #1 (**permalink**) 03-06-2009, 01:54 AM

.
يِسْعِدْ أَيّآمَكُمْ جَمِيعَآ
قَصِيدَه رَآقَتْ لِي وَأَحْبَبتُ أَنْ تُشَارِكُونِي فِيّهاا ..~
للِشّاعِر اِلأمَارَاتِي المبّدع / ربيع القلب ..

.
.

أبد ما كنت أظن في يوم شعري في عيوني يشين..
ولا كنت أنتظر لو لحظه فيها تخونني الأبيات..~

تبين عقب ما صغت الحروف في حبي لج كل حين
أصيغ "فـ " عرسج بغيري قصايد يالغلا وزفات..!

أبعرف أنتي وش قصدج دخيلج أنتي وش تبغين..؟
أبعرف بين هالشعراء لي يعني انا بالذات..!

لجل تجدد جروحي لجل أررجع ورى السنين..
أبي يطمن قليبج ترى جرحج ابد مامات..~

غرامج آه منه ما تركني بسبته تطرين..
كأنه حالف يسهرني وهو في جروحي يبات..

تبين الصدق إنتي من كثر ما في خيالي تجين
أحس بكل ما حوالي يرجع كل ماهو فات..~

إذا إنه حد ناداني كأنج إنتي تنادين..
وإذا إنه حد زعلني طريت في أيامج الزلات..

وإذا هل القمر شفتج وكنج بليلج تهلين..
يذكرني سكونه يوم ألومج والردود سكات..

صراحه كل شي خلاج ويا طيفج تمرين
قصايد .. أمكنه .. نكته .. مسلسل..أغنيه ..شلات..~

وأنا وش بيدي غير إني أقول بقلبي الله يعين..!
قسم بالله مو ناقصني إلا تجيني في الصلوات..

أنا حاولت أسوي كل ما يمكن لجل ترضين..
بغيت أتقرب لقلبج حبيبي مره ومرات..

والمعروف إن الشخص لو سلم يمد يمين..
أنا لو قلت أسلم باليسار بقلب العادات..~

أجي مني أجي مناك ما أدري أجي من وين..؟
إذا إنها في الخريطه أربعه وياج عشر جهات..!

دلع بكثر ما أدلع حسبتج بنت ست سنين..
غزل من كثر ما أتغزل مخلص معجم الكلمات..

رومانسيه بها مذوب حجر وإنتي ولا تذوبين..
حتى قمت أحس إني غلبته قيس أنا فِـ أوقات.~

مزعل ناس من عقبج ماهي وحده ولا ثنتين..
أنا ياللي مزعلهن عشانج والله بالميات..!

أنا مقصد أنقص في قدر ياللّي له تميلين..
ولكن ودي أعرف وش من أفعاله عليّ فات..؟

وأنا اللّي قلت من قدّي طلعت بقصة المسكين..
بكل اللي يصير أنا معذب فأحسن الحالات..!

حسبت أقدر على موجج إذا إنج بالهوا تهيجين..
نعم.. مو كل من غاص البحر يرجع معه دانات..~

تبيني بعدها أكتب قصيده فيها تنزفين..!
أقول إلا تبيني بس أسطر في رثاي أبيات..~
.
.