مشاكل ونصائح

HoPe · #1 (**permalink**) 02-09-2009, 11:47 AM

السلام عليكم ورحمة الله وبركاته

انا واعوذ بالله من قولة انا ناويةاسوي مشروع وحابة اعرف المشاكل اللي تواجه اي مشروع,
يعني اللي تطلع في المشروع على ارض الواقع وكيف تتحل وبكذا نستفيد كلنا ونتعلم من الاخطاء

بالاضافه لأي نصيحه تلاقوها نافعه

وطبعا موضوعي هذا لكل اللي عنده مشروع أو بيبدأ في مشروع او لسا يسوي دراسة الجدوى

وانا ببدا بقولكم مشكلة صارت لقريبي هيا شي معرووف بس اوقات الواحد ماينتبه ... المشكلة مشكلة ايجار المحل ماجمعه لانه كان معتمد على ايجار مصدر ثاني, انه ياخده ويعطيه لصاحب المحل المستاجر ,لكن الفلوس ماجات في موعدها,وورط ماعنده ايجار المحل واضطر انه يتسلفه..

وهذي غلطة كبيرة انه الواحد يخلط بين المصادر اللي عنده,لازم يخلي كل مشروع لوحده عشان اذا صار لواحد شي الثاني مايتاثر

وفي عندي كم نصيحه عجبتني ان شاء الله تستفيدوا منها:
1- لاتسوي مشروع عشان مالقيت وظيفة يعني المشروع مو بديل, لازم تكون حاب المشروع وتفهم فيه عشان تقدر تعطيه.

2- من وقت عمل دراسة الجدوى حط لك راتب من مشروعك زيك زي باقي العمال اللي فيه عشان ماتسحب من الايرادات على كيفك وتأثر عالمشروع بعدين.

3-اوقف على حلالك ان شاء الله عندك مية شغلة ثانية بس لاتسيبه داايما نسمع (المال السايب يعلم السرقه) ونقول صح ومهم بس ماننفذ الشي هذا وهوا من اهم عوامل نجاح المشروع.

4-حاول قد ماتقدر تفتح مشروع تفهم في تفاصيله عشان العمال مايشوفوا نفسهم وعشان تبين انك قوي وتقدر تدير مشروعك حتى لو تركوك ,,ولو فرضا فتحت مشروع وانت ماعندك خبرة فيه حاول تتعلم حتى لو كان صالون حلاقة تصوير اي شي حط بالك معاهم وهما يشتغلوا واسال واستفسر هذا كيف؟! وليش؟! وخلي عامل حبوب يعلمك واعطيه حق تعليمه لك عشان لاقدر الله راحوا ماتورط ,,وتمشي الشغل لين يجي بدالهم.

5- الموقع الموقع الموقع مهممممممم وياثر على ايرادات المشروع ولو اخترت موقع مهم لاتقول غالي وكثير لان وقتها تقدر تقلل من فلوس التسويق وتحط عالإيجار لان الموقع المميز يعتبر تسويق في حد ذاته خصوصا لو كان جنب محلات مشهورة.

هذي النصايح اللي في بالي واذا اتذكرت شي ان شاء الله اقوله

ويلا يااصحاب المشاريع مبتدئين او ماشاء الله تجار كبار و كل من يعرف سمع او شاف اي شي يفيد في المشاريع ينورنا بيه

ولكم الشكر مقدماً...