مع هجعـة اللـي يختفـون أول الليـل الـغـايـبـه دايــــم يـغـيـبـون مـعــهــا

النـفـس تـاقــت للـسـمـر والتعـالـيـل والعين أشـوف النـوم خالـف سنعهـا

وطاب الجلوس بجانب النار ياشعيل وحط الحطب في ترعة ٍ من ترعهـا

وإليـا استـوى للجمـر فيهـا دحامـيـل وأقـبــل تواهـجـهـا وقـفــى ولـعـهـا

درج على المحماس من غير تعجيل بــريـــة ٍ دوب الـيـمـانــي قـطـعـهــا

أول قـطـاف سـفـوح شــم الأقـاذيـل اللـي جذا حوم الوحـش عن فرعـهـا

شـــم يسـاقـيـه الـسـحـاب بهمـالـيـل لـيـن يتـحـدر سيـلـهـا مـــع تـلعـهـا

وتــرى لحمستـهـا نـظــام ودوالـيــل وشريعـة يمشـى بأثـر مـن شرعـهـا

أول بـدايـتـهــا مــدافـــع مـخـالـيــل ومـسـرى جمامـيـل ٍ بغـالـي سلـعـهـا

وسوق ٍ كما سوق الجمال المحاميـل مـازال حمـوى الـنـار مـاقـد لذعـهـا

وإليـا تطلـق مــن شـذاهـا زعاجـيـل وبشت عرق واللون الأشقـر نشعهـا

فالحـال سهلهـا عــن الـنـار تسهـيـل حتـى لظـى المحمـاس مــا يدّرعـهـا

وغير لها يا شعيل مسرى الجماميـل بـطـراد زلـبـات ٍ تـزايـد فزعـهـا

تدريجـة الحيـران ومـطـارد الخـيـل هـــذي طـريـقـة حمـسـهـا واتبـعـهـا

وعقبـه تميلهـا عـلـى النـجـر تميـيـل جـذاب روس الـقـوم مــن منتجعـهـا

عوايـد لـه مـن علـى سالـف الجـيـل مــاهــي حـديـثــه تــونــا نبـتـدعـهـا

ومـن يـوم تنعمهـا فــدوك الدعابـيـل فوق أصهب اللون الربيـب تهزعهـا

وتضبـط قيـاس المـاء لهـا بالمكاييـل ضبط الخبير لصنعة ٍ مخترعهـا

ومن يـوم تقطـع خلهـا مثـل مـا قيـل ترخي على هدفـى السبيـل مخذعهـا

مبهـارة ٍ تذعـر بغالـي التشاكيـل طــب العـماس إلـيـا تـيـسـر تبـعـهـا

صفـرا كمـا القنديـل حسـنـا تعـازيـل مـن صنعـة رسـلان الأول صنعهـا

إليـا دارهـا اللـي يعتـنـي بالمعامـيـل وفـاحـت وبالفنـجـال الأول ردعـهـا

وفيهـا تسـاوت خـنـة الـبـن والهـيـل والـنـفـس دافـعـهـا علـيـهـا دفـعـهــا

قـم صـب لـي ياشعيـل منهـا فناجيـل عـلـى سـنـا ضــوء تـهـادى ولـعـهـا

أظـنـهـا يـامــال طــــول التـمـاهـيـل تقـلـع همـومـي كــان ربــي قلـعـهـا

وتفتـح لهـا أبـواب بصـدري مقافيـل وتجمع لي أفكار ٍ تشتـت ضيعهـا

وآخـذ بهـا عـن ضيقـت البـال تبديـل وصروف دنيا ما مشـت مـع سنعهـا

دنـيـا تـصـيـد بالـشـبـك والمحـابـيـل نـــاس تسـايـرهـا ونـــاس تخـدعـهـا

أحـد تجـي لـه بالـرضـا والتساهـيـل وهو لو تعب في جمعهـا مـا جمعهـا

وأحــد ركـابـه مقفـيـات ٍ مقابـيـل ولابـــاب والا نـافــذة مـــا قـرعـهــا

وتعطيه قـاف إليـا طمـع بالمواصيـل وينكف معيف وسامح ٍ من طمعها

دنـيـا تـقــذل سـبــق الـحــر تـقـذيـل وتوهنـه فـي ربعـة ٍ مــن ربعـهـا

لو قد مضى لـه مـن شقاهـا غرابيـل يـوم الحرايـب مظلمـات ٍ قطعـهـا

يوم الطلوع ابها على الهجن والخيـل ما قد فهق عن طلعت ٍ مـا طلعهـا

ويوم استقرت وأغدقـت بالمحاصيـل صــارت منافـعـهـا لـمــن لا نفـعـهـا

عقبـانـهـا تـمـسـي قـوايــا مـواجـيـل والمستفـيـد غـرابـهـا مـــع مـرعـهـا

والـلـي مـسـار أمـورهـم بالبراطـيـل واللـي متـى مـا وافـقـت لــه بلعـهـا

ومـن ذاق در المـرزمـات الأباهـيـل أمــا حلـبـهـا حـلــب وإلا رضـعـهـا

وحصنيها يرقص على هـزت الذيـل ولـو يجتمـع قدمـه سبـاع ٍ سبعهـا

ولا عنـدنـا ياشعـيـل للـعـوج تعـديـل مـازال ممشاهـا علـى العـدل أطعهـا

ون شفتها قامت تجانف علـى الميـ ل بـأردى ثمـن عنـد أول السـوم بعـهـا

واستثن منها قومـت ٍ بآخـر الليـل في حـزة ٍ كـل ٍ يحـب يهجعهـا

إليا جـاء لثلـث الليـل الآخـر تراتيل وقامـت ملائكـة الرضـا قمـت معهـا

فـي سـاعـة ٍ تكبيـرهـا والتهالـيـل يجنـى ثمـار عذوقـهـا مــن زرعـهـا

وخل اجتماعـك بالرجـال الحلاحيـل الـلـي خـيــار المجـتـمـع مجتمـعـهـا

ولا تبدي الشكوى ولو ضامك الشيل الا عـلـى رجـــل يـحــس بوجـعـهـا

رجـل إليـا التـفـت علـيـك النشابـيـل أمـــا شـبـرهـا شـبــر وإلا ذرعـهــا

واختار مفتـاح ٍ للأريـاء المقافيـل روس العـلا يرقـيـك فــي مرتفعـهـا

ومن الزمان اخـذ العبـر بالرحاحيـل الـلــي مـنـازلـهـم تــهــاوى بـقـعـهـا

يافجعتـي لاجيـت بـعـض المداهـيـل ولا شفـت فيهـا عقـب حــي ٍ رتعـهـا

إلا رســوم دارســـات ٍ مسـامـيـل وخرايـم ٍ يزمـى السـراب بشمعـهـا

بلاقع ٍ شهـب ٍ تهـاوى زهاليـل ألظّـاهـر أن الـلـي فجعـنـي فجـعـهـا

من عقب أهلهـا لـو سقتها المخايييل مالله نـفـعـهــا وبـركـتـهــا نـزعــهــا

لاجيتهـا جضـيـت مــن قـلـة الحـيـل ودنيـاي عنـدي ضـاق بــي متسعـهـا

عـلـى حلاحـيـل تـضـد الرجـاجـيـل حـصـن ٍ مـاعــاد إلامـقـالـع شيـعـهـا

ابيات جميله صح لسانك
ويعطيك العافيه