المشاركة الأصلية كتبت بواسطة دنونه

السلام عليكم ورحمة الله
أنا عضوة جديده ومش جديدة لي فترة معاكم متابعة وشفت ان الكل يجب الخير للجميع وكنت بستشيركم من اسبوع لكن ماقدرت احدد موقفي
قال تعالى وشاورهم في الأمر فإذا عزمت فتوكل على الله)

انا عندي قصة واتمنى ان الكل يقرأها ويساعدني بااتخاذ القرار انا ابغى اشارة بس
اول شي انا فتاه سعودية متخرجة من الجامعة قسم رياضيات ومعاي دبلوم سنتين حاسب ودورات متفرقه..اشتغلت في معهد كمبيوتر من سنة و10 اشهر مسكت ادارة المعهد وسكرتارية ومدربة ومحاسبة وحتى عاملة نظافة يعني شيكت على كل شي وتنقلت بكل الوظائف ومعظم الموظفات اجانب واول مااشتغلت طبعا وظفوا سعودية مو حب لي بالعكس غصب عنهم بسبب وزارة التربية والتعليم وكانوا ينتظروا اني اطفش من الشغل في خلال فترة بسيطة لان اي وحده تشتغل عندهم وتكون مسكينة وطيبة وتشتغل بضمير يقوموا يستغلوها حتى تطفش المخلوقه اطول وحده جلست قبلي كان8اشهر وطلعت ولااهتمت بشغلهم ولاشي خربته ومشيت..

لمن اشتغلت كان عندي مبدأ اذا عملت شي حتقن عملي لاني حتحاسب يوم الحساب وبعد حتى ربي يوفقني بشغل احسن ويعطيني على قد نيتي

بعد سنة كرف وشغل وتعب انا طفشت وحبيت اسيب لأن الشغل دوامين من 8الصباح الى11ونص الظهر ---ومن 4ونص العصر الى 9 بالليل مااشوف اهلي ولاارتاح ولااشوف التلفزيون ولااسمع اخبار العالم ولااجلس في مكان طول الوقت اشتغل وفيه مديرة بس على النت او تتسلى باي شي والشغل على راسي والطالبات وكل شي حتى الحسابات انا اشتغلت في كل شي عشان نفسي وحتى اذا تركت الشغل يكون انا منجد اكتسبت خبرة كويسة

بعد ماكملت السنة طلبت شهاده خبرة حتى انقلع ولااحد عبرني والموظفات الي بالمعهد قالوا اجلسي الين تلاقيلك شغل وبعدين روحي قلت اوكي..استقالت المديرة بسبب الزواج وجابوا مديرة وجلست اشرح لها الشغل واعلمها وهي بنت كويسه وطيبه بس مو شغلتي اجلس اشرح واعلمها شغلها والادارة الخارجيه زفت..

وهالمعهد أوضاعه المادية مو كويسه تحت الصفر صارت مافي تسجيل ولافي ارادات وبالتالي مافي رواتب وكنت ساكته ومتحمله عادي يعني بالرغم ان المشوار بعيد علي ممكن نص ساعة الطريق..

ايش صار المديرة الجديده طفشت من الشغل وقدمت اجازة وراحت شغل تاني وتضاربت مع المدير..

كان ايراد المعهد في ذاك الشهر 10000الاف ريال بس والرواتب للكل توصل30000الف متخيلين الوضع كيف كان تعيس والمدير يقول جيبوا ايرادات وخذوا رواتبكم انا ماعندي فلوس والادهى يوظف موظفات جدد ورواتبهم عاليه بالنسبة للوضع يعني 3000الاف وهو مافي دورات ولاتسجيل ولاطالبات يعني المعهد بحاله احتضار وانا اشتغل مده طويلة وبنفس الراتب 2000ريال ولازيادة ولاامتيازات ولامكافات ولاحتى تقدير بالعكس بيحاول المدير يطفشني وهو اجنبي ولايقول كلمه كويسه بس انتي وانتي وانتي وهو المعهد متدمر بسببه مافي تطوير للمعهد ولاشي وانت لوحدك ماتقدر لازم الادارة الخارجيه انت تبي اجهزه ومناهج جديده واعلانات وكمان مدير كويس يفكر ويش عنده تسجيل ويحتاج مين موظفات وكيفيه الرواتب وكل شي وهو لا مايرضى يسمع منك ولايسمع من احد لو سمع اقتراح قال لا مايصير وجلس يصايح وقال انا مش رجل كرسي انا هنا المدير واقدر اقول اطلعوا برى واغير الطاقم كله انتوا السبب في فشل معهدي وانتوا وانتوا متخيلين كيف الوضع مزري؟؟

انا تعبت من الشغل ومن الروتين ومن قله الاحترام للجميع.. طبعا المديرة لمن تركت الشغل انا مسكته مدة اسبوعين فقط وجبت ايرادات للمعهد35000ريال وسددت جميع الرواتب المتأخرة .. وصممت اعلان وطبعته ووزعته بنفسي وكمان الموظفات الي معاي .. وعملت كافي انترنت ماشي حاله قلت يغطي مصاريف الفواتير.. لان الفواتير لتلفون والكهرباء ممكن تنقطع بااي وقت ..والمعهد في حاله احتضار وممكن كنت اقدر اعدله..

جاء المدير وقال رائية بعد شغلي اسبوعين كان نهاية شهر فبراير وانا اشتغلت بس عشاني احب هالمكان واجلس فيه اكثر من بيتي واشوف موظفينه اكثر من اخواني ..انه انا ماانفع اكون ادارية وجاب مديرة مدري من فين ووقعها عقد وكنسل اجازه المديرة الاولى وبينتقم مني او بيفكر يذلني وقال هالشغل الي انتي عملتيه العالمله تبعت النظافه تعرف تعملة وانتي ولاشي وارسل خطاب يحولني من اداريه لمدربة كمبيوتر..انا ماشفت مسأله تحويل وظيفتي انقاص انا كنت اشتغل ادارية واذا احتجت مدربه اقوم اوفر على حالي راتب مدربه واقوم اشتغل وادرس وارد على التلفون وانا ادرس كمبيوتر وكمان محاسبة والله يشهد على كلامي ..
فكرت وقلت هو اكيد بيشغلني مدربه الى ماينتهي عقدي ويطردني بس يبيني اعلم المديره الجديده قمت قدمت استقالتي وحتى راتبي ليومكم مااخذته تبع جزء من شهر مارس2007
وجلست في البيت وارتحت بعد عناء طوييييييييييييييييييييييييييييييييييييييييل.. جاني عرض اصير مديرة معهد بيرلتز الاجنبي ورفضت بالرغم ان الراتب كويس واحسن من المعهد الاول..
والمدربات الي كنت عايشه معاهم الكل ساب مابقي الا مدربتين جلسوا عشان يخلصوا لطالباتهم وانهم امانه عندهم..

والمديرة والطاقم الاداري الجديد مايشتغل والدنيا فوضه والشهادات والملفات على الدنيا السلام .. حتى الانوار كنا نطفيها قبل لانخرج والمودم تبع النت والكهرباء وكل شي نعمله باامانه اتحدى الجدد يسووه..
ماقلت هالكلام بحقهم حاقده او متشمته بالمدير والادارة التنفيذية لا بس اقول الحمدلله على العقل..

االان انا دورت شغل ومالقيت شي يرضيني ويحقق الي ابغاه واطمح له..عملت مقابله شخصيه ببنك البلاد وانقبلت وانحطيت انتظار وشكل الدعوه واسطة في تنمية الموارد البشرية..

المشكلة الان وابي لها حل هي جاني عمل في مستوصف ب1400 ريال موظفه استقبال ودوامين وقريب من الحي الي ساكنته.. وجاني عرض من مديري السابق الكذاب الواطي الي يبي يسرق الفلوس وانا كنت جالسة له في حلقه اني ارجع المعهد واصير المديرة وبيعطيني الراتب الي احدده وبدل مواصلات وكمان نسبة 10%من ايرادات المعهد لو كان دخل المعهد عدى 30000 الف ريال..لاني كنت اشتغل بضمير ولااني مخلصة وحمارة شغل..

واعتذر وقال اسف ولي اسبوعين مطنشتة ولاحاولت ارد عليه ..
البارح رحت مع بابي عنده واجتمعت فيه وفي المدير السعودي ومصدوم السعودي لاني سبت الشغل وهو مايدري لانه مسكين مريض والاجنبي يسرق حلاله وهو مابيده حيله..

انا الان اوافق او لا اروح للمستوصف ب1400 ريال اكرم لي وافضل..

سلبيات عملي السابق :
*مدير نصاب وكذاب ونسونجي ويبغالك تعطيه على راسه...وراعي فشخره وان عنده خبره25 سنه ادارة وكمان رجل اعمال ناجح..
*المدير اتكالي ولايعمل شغله ومشغل هندي ينش الذباب عن راسه وبس الحمدلله يفكر كيف يسوي بالفيران(الموظفات)ويعذبهم ويختبر قوه تحملهم..
*خساره القسم الرجالي وتقفيله بسبب هالمدير وهو ناوي على فرع السيدات
*انا حرجع اصحح اغلاط شهرين من اداريات غير السمعه الي طلعت خلاص..والشغل المتراكم والملفات والحسابات..
*وهذا كوم والمسئؤلية كوووووووووووووووووم وانا اعرف المدير مو من النوع الي يساعد لا شخصيته انسان متسلط بس يبي الناس تحسسه ان الكل في الكل وانت مو فاضي لهذا الشي انت وراك مسئولية وهم .. حتى النوم مااقدر انام بالليل..

ايجابياته:
اثبت لنفسي اني استطيع حل المشكلات والتغلب عليها
اكتسب زيادة في الخبرة وممكن اترشح لوظائف احسن..

الشغل الجديد:
سلبياته الاختلاط بالرغم انه عادي عندي بس اخاف من الكلام

الايجابيات اطلع مصروفي من عملي وكمان اجدد نشاطي بشغل جديد ومؤقت


بليييييييييييييييييييييييز ساعدوني وردوا علي لاني محتاجة رائيكم وخبرتكم في القطاع الخاص ردوا علي اليوم قبل بكره لان بكرة بروح اوقع العقد لو وافقت ورجعت..




انا استشرت صاحباتي ومعظمهم قالوا ارجعي والكل يقول القرار بيدك وانا استخرت وتوكلت على ربي بيتخذلي الصح والان ومو قادرة اتخذ شي حاسه بااكتئاب وقلق وخوف من المجهول خايفه من المسئؤلية وخايفة اتورط في خسارة المعهد وفشلة للاسفل بالرغم قبل شهرين كان المعهد متحسن والان تدمر اكثر