كيفكم انا فبالي مشروع ونفسي اطبقه على الواقع بس ابغاكم تساعدوني
المشروع تغليف هدايا
انا بارعه في هذا الشي واكثر من مره انطلب من زوجي( عطور او اطقم)مع التغليف لان انا وزوجي نبيع العطور الاصليه وعطور اجمل بسعر اقل من المحلات وانا كنت اغلفها ومره عجبتهم بس المشكله اني اشتري التغليف والاشياء اللي مع الهديه مثلا الشموع والورد المجفف وشرايط التغليف وعلبة او سلة التغليف من محلات التفرقه ولما سالت عن سعرها في الجمله مايفرق كثير
عشان كذا انا ابغاكم تساعدوني فين احصلها باسعار مره رخيصه او باي معلومه تفيدني
لاتقولولي البلد او الخازكيه لاني سالت وانا ابغى ابيعها باسعار معقوله موخياليه زي اللي في المحلات وانشالله راح انزل صور الهدايا اللي غلفتها لما يزبط تحميل الصور وتعطوني رايكم
المشكله الثانيه
انو مافي طلب على هذا الموضوع كثير بما اني ماعندي محل طبعا نفسي اسوي محل بس مافي ميزانيه
بس على الطلبات اللي تجي على العطور من المنتديات واهي قليله لان الناس تخاف من البيع والشراء من المنتديات ابغاكم تدلوني على محلات زي محلات الكوش وغيرها وانا اتعامل معاهم او اللي عنده من المنتدى مشروع زي كذا انا مستعده اتعامل معاه ونتساعد

موفقة اختي باذن الله

بالتوفيق لك ..

ليش ماتشاركي في البازارات تستاجرين طاوله على حسب المده المتاحه ممكن يوم او اسبوع او اكثر وفيه بازارات نسائيه

ما شاء الله لا قوة إلا بالله

هلا فاتنه تصدقي حلوه فكرة البازار مافكرت فيها قبل الله يسعدك وادا عندك اي فكره عن اماكن بازارات في اي يوم خبريني او عن اسعار الطاولات

ابشري من عيوني
لكن انتي في اي مدينه

ياحياتي تسلم عيونك انا في جده

انا كمان في جده
في بازار راح يفتح قريب في الجامعه راح اسالك بكم الطاوله
وكمان فيه السوق النسائي لعبد اللطيف جميل تستاجرين كشك بس الان الكشكات غليت اسعاره على الف ريال وطالع
ان شاء الله اذا فيه اي بازار راح يفتح قريب غير بازار الجامعه راح اقولك
راح ابلغكي على الخاص اوكي بالتوفيق لك