السلام عليكم ورحمة الله وبركاته

(طبعا اول موضوع لي سجلت بعد ماحسيت بجدية المنتدى وانشاء الله نفيد ونستفيد)

قريت موضوع اخونا فجأة وجدتها جزاة الله خير عن ورش الجبس هنا وبحثت عن الموضوع بشكل اكثر من مكثف وحسبت التكاليف والارباح وكل شيء خاص بالشغلة من بدايتها لنهايتها

وقررت اني افتح ورشة في جنوب الرياض صناعية الموسى بعد مااتفقت مع عامل باكستاني لة في شغلة الجبس على كلامة 15 سنة في السعودية ويبي ادارة الورشة وراتب ويشغل ولدة في تركيبات الجبس .. المهم

بااعطيكم الحسبة كاملة ...
اجار الورشة 40 الف في السنة (داخل حواري الصناعية) الي على نفس الشارع الي علية محلات الجبس ب 60 الف في السنة مافية الى 3 ورش وماهي على الشارع مباشرة الورش القديمة الموجودة الحين على الشارع الرئيسي مااخذة بالسعر القديم 20 الف في السنة ولحد الان ماشية على هالسعر

قوالب ::
القوالب تكلفتها تقريبا 10 الاف وبلاطتين رخام كبيرة ب 500 والرفوف للتخزين تقريبا الف

معقب ::
اذا ماعندك سجل ولا اي شيء وماتبي وجع الراس المعقب يخلص كل شيء مع الرسوم تقريبا ب 1500

الفيز ::
بيطلع لك اربع فيز للورشة تتصرف فيها بمعرفتك ومسالة العمال سهلة


الربح ::

طبعا تقريبي اتوقع النصف او اقل بشيء بسيط مااعتمدت على كلام العمال والباكستاني الي اتفقت معه حاولت معه بكل الطرق يعطيني ربح شهري تقريبي وهو رافض يقول ارزاق من عند الله


===================================

هنا المشاكل الي واجهتني

سعر الورش غاااااالي ولا تقدر تنافس حتى عساك تحصل ربح مو تنافس يعني سعر البلاطة مااذكر ايش يسمونها ب 4 ريال مثلا يطلع ربحي فيها ريال وربح صاحب الورشة الي مستاجر ب 20 الف ريالين يعني لو نزل السعر ريالين خلاص انا اقفل مالة داعي اكمل لاني قاعد اشتغل عشان ادفع اجار الورشة


المشكلة الثانية الموقع

يعني داخل حواري الصناعية بعيد عن سوق الجبس والديكور مع ورش التريلات ... تخيل شخص وزوجتة المصون داخل ورشة بين ورش التريلات يتفرج على جبس ؟؟ ماتجي !!
على الشارع نفسة الي علية محلات الجبس مافية اي موقع للتاجير والتقيبل من 200 الف وطالع


ورش الجبس في الرياض موجودة فقط
العزيزية صناعية الموسى
صناعية السلي (ثلاث ورش بس)
شمال الرياض فية ورشة وحدة


طيب انا اعطيكم الحل في ايجار الورش الغالية

الحل اننا نتفق مثلا اربعة اعضاء ونفتح اربع ورش جنب بعض في شمال شرق الرياض (المد العمراني كلة متجة هناك) وانا متاكد مليون بالمية بعد مانفتح الورش راح تفتح ورش كثيرجنبها ونفتح سوق جديدة شمال شرق الرياض وبنستفيد شغلات كثير

اجار ورش رخيص حتى لو نستاجر ارض فاضية بعقد 20 سنة ونسورها ونركب عليها هنقر بيطلع علينا الاجار تقريبا ب 10000 في السنة او اقل وبدال مايصير المكسب في القطعة ريال يصير 3 ريال وشوف كم يطلع لك مكسب اذا بعت 500 قطعة باليوم

الشغلة الثانية الموقع

نااخذ افضل موقع في الواجهة وتصير ورشنا هي السوق الرئيسي


اذا على المقاولين والعمال انا عندي هالعامل الباكستاني اتوقع مافية مقاول جبس في االرياض الى يعرفة يسحبهم لنا بالهداوة (كذا مخططين انا وياة بس المشكلة في الموقع السيء والاجار الغالي )


نحتاج اربعة اعضاء او اكثر صاملييييين ومتفرغين نفتح الورش مع بعض ؟! واذا فية اي استفسار عن الشغلة اسدحوة هنا نناقشة سوا

مرحبا بك ومسهلا اخوي العزيز وحياك الله على كل حال
وبالنسبة لفكرة للامانة معجبتني وداخله مخي من اول ماقريت موضوع اخونا (فجأة وجدتها) لا اخفيك باني صرت مرابط في جبس العزيزية مدة اسبوع اجس النبض واشوف الوضع واحتك مع العمالة اللي هناك وطلعت بنتائج لاباس بها . وحصل اتصالات بيني وبين عدة مصانع للقوالب لكن لم يتم التفاهم لاني بس اجس النبض .

اخونا (فجأة وجدتها) اول مابدأ شغله نزل ريال عن السوق وهذا اسلوب من اساليب الدعاية لجذب المقاولين كذلك يعطيهم على دفعتين وهذا سبب آخر للانتشار .

بالنسبة للرياض ياعزيزي الفاضل بإمكانك تستأجر استراحة وتكون مكان للصب وصف القوالب ومسكن عمال لكن المشكلة ماراح تأخذ رخصة نهائياً الا في حال انك اشتغلت مخالف للانظمة وجبت لك عاملين يصبون والباكستاني يكون ثالثهم ومشرف ويسحب المقاولين .

هذا اللي طرى لي في بالي الآن ولك جزيل التحية والتقدير

كرأي مبدئي اخوي .. انا معكم.. بس انا مو متفرغ موظف حكومي
وفكرتك حلوه .. والله يكتب اللي فيه خير..

هلا أخوي جاي متأخر ،،

ارحب بفكرتك وانا سبق وقرأة فكرة اخونا ( فجاة وجدتها ) بمنطقة الجنوب اعتقد ....
ارحب بالإنضام معك والتعرف عليك واتشرف العمل معاً
ارسلي رقمك على الخاص لقلة مشاركتي

احترامي لك

أخوي جاي متأخر ،،

ياليت تدرس المشروع وتكلفت الإيجار والعماله والإجمالي تقريباً وأنت اعرف مني ... وبعد كذا اذا تحب نتقابل
وندرس الوضع دراسه واضحه انشاءالله ..... ومعرفتكم تجـــارة


احترامي

اتمنى لكم التوفيق
تحياتي
السلاطين

اتمنى لكم التوفيق
تحياتي

ياليت نعرف كم يكون نصيب كل واحد من الأربعه في المساهمه من رأس المال يعني كم بيدفع كل شخص