11-03-2010, 04:16 PM
|
موجّه تجاري
|
|
تاريخ التسجيل: Feb 2007
المشاركات: 986
معدل تقييم المستوى: 218607
|
|
|
فـكـرة مـشـروع للـشـبـاب ( ويـن الصامل ) ...
السلام عليكم ورحمة الله وبركاتة
بدون ما أطيل عليكم بالمقدمات والفلسفه , هالفكره جت من (( باب الحاجه )) , يعني انا شخصياً احتجتها كثير وايضاً غيري من الأصدقاء يتمنون يلقونها .
طبعاً بحكم اني من سكان الرياض , فأنا بتكلم عن الرياض وأيضاً ما يمنع تنفيذها في مدن أخرى لأنها مطلوبه أكيد بإذن الله , ولكن ما أقدر أحدد الموقع المناسب للمشروع إلا في مدينة الرياض .
المشروع : تجهيز أغراض الطبخ للعزاب و تجمعات الشباب والكشتات من المواد الغذائية
الموقع : الرياض - حي السلي - وسط منطقة تجمع الاستراحات  معروفه طبعاً 
المساحة : محل فتحة وحدة فقط 
العدد والأت : ثلاجة عرض طوليه - ثلاجة حفظ اضافية - سكاكين
الأيدي العاملة : عامل واحد وانت طبعاً  وممكن تستعين بخدامتكم في البيت  ايه ليش مستغرب ممكن
تفاصيل المشروع :
بتسوي محل كأنك تجهز ( ملحمه )  يعني اللي يبيعون اللحوم , ولكن انت بتجهز عندك انواع اللحوم المذبوحه وجاهزه مثل ( لحم غنم - لحم حاشي - دجاج - حـمـام - سـمــن - دخـل - بـط - أرانـب ) بحيث ياخذها الزبون منظفه ومقطعه وجاهزه للقدر مباشرةً , ويتم تقطيعها حسب طلب الزبون ورغبته ... طيب قضينا ؟؟ لأ , بنجي للأهم , واللي هو ؟؟
طبعاً الزبون ماراح يحط اللحم ولا الحمام ولا الســمــن بالقدر كذا ســـاده  بدون أي شي  أكيد هو محتاج شغلات إضافيه وكثيره مثل :
(( طبعاً يتم تعبئتها في اكياس صغيره كبر كف اليد ومكبوسه ( يعني زي اكياس الفصفص .. فهمت ))
ــ رز ( على اساس بيالتين لكل نفر ) وتعبأ بكيس صغير
ــ ليمون اسود 3 حبات مع كم حبة هيل
ــ بصل 1 حبه وتكون مقطعه وجاهزه
ــ طماطم 1 حبه وتكون مقطعه وجاهزه
ــ ماجي 1 حبه
ــ بهارات حوالي 100 جرام
ــ قــرع
ــ كوسه
ــ جزر
ــ فلفل بارد
ــ فلفل حار
ــ كمون
ــ قرفه
ــ فلفل اسود
ــ مسمار (عويدي)
ــ صلصه صغيره
كما يمكن إضافة أشياء أخرى لاتحضرني الأن للأسف .
ــ طبعاً هالشغلات يتم تعبئتها وتنسيقها على اساس انها تكفي للطبخ لعدد ( شخصين مثلاً ) واللي يبي زيادة ممكن مثلاً بدال ما ياخذ بصل صحن واحد صغير ممكن ياخذ اثنين , وقس على ذلك لكل المتبقي .
ــ الفائدة المرجوه للزبون شغلتين وهي :
1/ التوفير : يعني اذا هم اربع اشخاص باستراحه ولا كشته خطافيه وبيطبخون وجبه وحده بس , بيظطرون يشترون كيس رز اربعه كيلو وخيشة بصل صغيره وكيلو طمام وقرع وكوسه وفلفل وبهارات و..و..و..و..و..و..و.. الــخ , وبعد الطبخ  بيبقى عندهم اغراض كثيره زايده ومصيرها يا ترمى أو تحفظ على جمب بالاستراحه لين تخرب , ولكن انت بيدك توفر لهم مالايقل عن 50% الى 60% من مصاريف الطبخه .
2/ الوقـت : يعني الشباب مجتمعين بالاستراحه بعد عناء يوم عمل وما فيهم حيل للتقطيع والتنظيف وكلن منجضع ( يعني متمدد ومنتتتتتتـهي ) وعجازين , ولكن انت جهزت لهم كل شي بس هم يشبون على الكاتم ويكبون العدة جاهزه .
ــ بخصوص خدامتكم بالبيت  اللي ذكرناها بأول الموضوع , اللحين اقولك وش حاجتها , وهي انك ممكن تستعين فيها لتجهيز وتقطيع بعض الشغلات وتعبئتها مثل ( البصل - الطماط - القرع - الكوسه - الفلفل البارد - .... الـــخ ) طبعاً تعطيها رضاوه نهاية كل شهر  زيادة على راتبها , وااااااااااانتـبه  لاتصير لـئـيم وتقول هذا من واجبها ... اتق الله , وطبعاً حاول ترضي العجيز عشان مـــا  .
طبعاً نجي لأهم نقطة , رأس المال وحسب معلوماتي وهي كالتالي :
ــ ايجار محل 6 شهور = 7000 ريال
ــ تركيب سيراميك للجدران والأرضية = 2000 ريال
ــ مكيف عدد 2 = 2000 ريال
ــ لــوحــه = 1500 ريال
ــ واجهه قزاز سيكريت = 2500 ريال
ــ ثلاجة عرض طوليه = 4000 ريال وممكن مستعمله مبدئياً
ــ رسوم حكوميه = 3000 ريال ( تأشيرة + بلدية )
ــ مصاريف تجهيز اخرى = 3000 ريال (كهربائي + سباك + اخرى)
ــ مصاريف نثريه = 5000 ريال
مصادر اللحوم :
طبعاً فيه مزارع في القصيم والرياض ممكن تشتري منهم الحمام والبط والارانب والسمن , وبالنسبه للطيور الموسميه مثل ( الدخل والقميري وغيره كثير ) فيه شباب بالقصيم متخصصين ببيع هالطيور , يعني شغلته بس يصيد ويبيع صيده للناس , وممكن تتفق معهم بالشراء بالكميات وتشوف افضل العروض .
والمعذرة ... لأني كتبت الموضوع على عجاله , ويشرفني أي إضافة من الأعضاء الكرام .
أخي الكريم , ثق تماماً أنك ملزوم بدراسة الموضوع من جميع النواحي والبحث عن إيجابياته و سلبياته ولــــــــــــــــكـــــــن لاتنسى أن توفيق الله هو أساس أي عمل فابحث عن اسباب توفيقه .
تحياتي للجميع
ابــو خــــــــالـــد ,,,
|
العرض العادي
