حبيت ابدا بمشروع تربية الغنم وبيعها

وفكرت يكون تعليفها ذاتي يعني اخذ مزرعة وازرع برسيم وعلف وذرة عشان الضرمة

وماخسر علف كل شوي

ياترى كم تكلف تعليفها لو ماجبت مزرعة وايش نصائحكم ؟

مانستغني عن الخبراء

وافكر اخذ مزرعة بالسودان واربي فيه غنم حريات ثم اجيبها هنا وقت المواسم وشرايكم ينفع وكم يكلفني نقل الراس

بتصدر الحريات للسودان ههههههه
طيب اختصر الجهد واستورد سواكنيات رخيص وبيع هنا

والله ياخوي الفكره هذي في راسي من سنين بس بصراحه من سألته قال عندك خبره ؟
اقول لا ماعندي يوقول لي كلام غير قابل للنشر.
ولا والله احس فيها خير وفكرتي هي شراء هرافي نعيم وتربيتهم كذا شهر ثم اكرشهم في السوق وعلى فكره بالنسبه للاعلاف وحسب ما قالوا لي ان الراس يكلف من ريال واحد الى ثلاثه ريال في اليوم والحسبه عليك غيرحق العامل والحوش والعلاجات ويمكن يفطس عند ارس ولا راسين يالله خذ من المعوقات الي تكسر المجاديف صدق
على العموم هي واقفه بعد توفيق الله على الخبره والتصريف المحترف والله اعلم

ليه تعب نفسك مزرعة وسودان عليك تبدا من شهر 7 تشتري خرفان وتربي تسمين وتبيع برمضان والعيد وعيد الضحية وتكون كسبان انشالله

اذا عندك مزرعه ( يعني ما راح تحتاج لا شعير ولا غيره ) توكل على الله وتعتبر فرصه
اهل الحلال الحلين انواع حط رجلك الشعير يقولون وصل 36 والاسعار نازله واذا وصل 50 بيكون فيه نزول اكثر

وفرصه للي عنده مزرعه بيشتري رخيص وماراح يتوهق في سالفة الاعلاف ادخل موقع اغنام وشف وش صاير

بالتوفيق

استيراد الاغنام الحية موقف حتى اشعار اخر او امر ملكي
الا اذا بتنتج وتشحن الى المملكة بعد الذبح
وهذا بيطرح من سعرها الكثير.. لانه سعر الحي اغلى من المذبوح


وبالنسبة للتكاليف
اربع اكياس لكل مية راس+ربطتين تبين+ربطة زت اخضر
وراتب العمال+تكاليف الماء (اما تشتري وايت او تحط خزان وتعبيه)
بس بتشتري لاتشتري الا شبب
لاتشتري عويد
يعني لاتشتري كبيرات بالعمر ابدااااا مهما كان
حتى لو الراس 50ريال

نصيحتي لك
اذا ماتعرف للاغنام
لاتدخلها لانها لازم واحد يعرف لها
لكن انصحك بالمعزى او الماعز
ترى تتحمل ومو شرط انك تعرف لها
سهله تربيتها ومو حساسة مثل الاغنام
وسعرها نفس سعر الاغنام عند البيع بل ان المعزى اغلى
يعني اناث الاغنام من النعيم سعرها اذا طار مايتعدى 1200 حتى لو انها زينه
بينما المعزى متوسطها يصل الى 2000والبعض حسب اوصافها يصل الى 3000 والى 5000
والتيوس الطيبة توصل 100.000

وبالتوفيق

أشوف أرقام خياليه الله يهديكم 100 راس تكلفته 4 أكياس شعير لا لا لا كيس لكل 100 راس معادله معروفه لأهل الحلال وكل 25 او 30 لبنه تبن أو برسيم غير كذا مبالغ فيه كثير أنا أتكلم من واقع تجربه والله العظيم أتكلم بجد ومعروف عند أهل الحلال تكلفة الرأس في اليوم 0.75 هلله بالمبالغه يعني لو تكرمها أكثر من نفسك ماتعدت ريال إلا ربع و السلام ختام