حظه يغنّي له على طـرق وَرقـا
وكم من وجيه ٍ حظها قاعة البير
لوهي وجيه ٍ فالمواقيـف عَرقـا
ارقى دَرَج والحظّ ينزل اصنصير!!
ينزل وانا من عادتـي لازم ارقـا
حظ ٍ يعاكس خَطوتي وين ما اسير
لامن بغيت الغرب! ينحاز شرقـا
حظي بوقتي صار مثل الأعاصيـر
بينه وبين الزيـن مليـون فرقـا!
قصة عتيبي ٍ جرى لـه تعاسيـر
قلبه مـع الروقه,وعينـه لبرقـا
انا وحظي! سالفة راعـي الطيـر
ياطير إبن برمان فرقـا.. وفرقـا
طير ٍ من كبار الطيور المشاهيـر
اللي لهـا بيـن المناعيـر طرقـا
غذاه إبن برمان وبْ كلّ تبذيـر
طرحَة يِده ماجاه نهب ٍ وسرقـا
تعَب عليه ودبّـره خيـر تدبيـر
وسرَح بطيره يدرق الصيد درقـا
وهَدّه بغاه يصيد ويجيب له خيـر
وعَوَّد عليه بْ حيَّة الغار زرقـا
حيَّه وصار لـنابها فيـه تغزيـر
تدفق بسمّ ازرق بلغ كل عِرقـا
وداخل وريده! صار للسمّ تأثيـر
سمّ ٍ زرَق في داخل القلب زرقـا
طير ٍ ذبح راعيه قصه وتصويـر!
إعروق ابن برمان بالسـم غرقـا
روَّح يصيد! وراح فيها! مقاديـر
مات وعليه قلوب اهاليِه حرقـا
وياحظ ياللي نازل ٍ بالأصنصيـر
متى تزين, وتلتفت لي, وترقـا؟.
عبدالرزاق الذيابي
دمتم بخير