13-04-2010, 02:31 PM
|
 |
عضو مهم
|
|
تاريخ التسجيل: Apr 2010
المشاركات: 227
معدل تقييم المستوى: 30
|
|
مساء الخير على الجميع ، ياشباب بخصوص المباحث بعلمكم وش اللي صار معي بالتفصيل الممل ~
أنا خريج الكلية التقنية السنة الماضية 1430 - وعندنا في كليتنا اللي هي كلية الدمام مكتب اسمه " التنسيق الوظيفي " المهم المكتب هذا عنده كشوفات بأسماء الشباب اللي تخرجوا آخر دفعه وطبعاً تجيهم عروض وظيفية من شركات وقطاعات حكومية .. انا بتكلم لكم عن وضعي ، انا جاني اتصال قبل شهرين تقريبا من رقم ثابت " تلفون " كنت نايم وقتها المهم يوم صحيت من النوم دقيت على نفس الرقم ورد علي شخص المهم قلت له اخوي انا جاني اتصال من هالرقم قال عطني اسمك عطيته اسمي .. شوي والا الرجال يقولي وش رايك في عسكري برتبة عريف ومن هالكلام > ضاعت علومه وقتها
المهم والله عاد انا قلت له يارجال وينك فيه انت بس ، الكلام هذا ع الساعه 12 تقريبا الظهر يعني وقت صلاة عندنا بالشرقية ، المهم الرجال بعد ماسألته عن مكانه قالي الحين تقوم تصلي وتلبس شماغك وتجيب لنا اوراقك اللي هي شهادة الكلية .. إلخ وتجينا قلت طيران اصلي بس وجايكم ان شاء الله ، المهم والله واصلي الظهر وادز لهم يوم وصلت للإدارة حقهم عند البوابه طبعا ممنوع تدخل الا عن طريق الشخص اللي متصل عليك .. كلمت اللي عند البوابة قلت له انا عندي مقابلة عند فلان الفلاني جاني منه اتصال قال ادخل ، يوم جيت دخلت عليهم سألت عن الرجال اللي كلمني ويوم جيته لقيت معه واحد طبعاً كلهم مدنيين ماتعرف وش رتبة اللي قدامك المهم والله وسوولي مقابلة قصيره وشافوا مؤهلاتي وقالي خذ هالورقه وسجلي فيها ارقامك اللي تكون شغاله دايماً عشان لابغينا نتصل عليك نلاقيك موجود قلت ابشر ماطلبت شي والله واكتب له خمس ارقام > ماصدق على الله ، المهم مشيت انا للبيت وبعد فتره مايقارب الشهر والله مدري كم بالضبط جاني اتصال من الرجال نفسه اللي كلمني اول مرة قالي تجينا بكرة ومعك صورتين حديثه مقاس 4×6مكشوف الرأس قلت له مايحتاج جاهزة الصور > مضبط اموره ، والله واروح لهم اليوم الثاني على الموعد ولقيت اربع شباب من اخوياي اللي في الكلية ايام الدراسة المهم جلسنا شوي سواليف وكذا بعدها عطونا اوراق حق الكشف الطبي حطينا عليها الصور وختموها لنا مع ورقه ثانيه مكتوب عليها " ملحق الكشف الطبي " هالكلام ع الساعه 10 وشوي تقريبا الصباح المهم ويقول لنا الرجال يالله اسبقوني لمستوصف قوى الامن وانا بتلاقوني قدامكم قلنا ابشر ، وعاد مشينا ويوم وصلنا هناك لقيناه قدامنا قال اقعدوا في الانتظار وانا بدخل احددلكم مواعيد عشان الكشف المهم دخل وحددلنا يوم الثلاثاء والاحد من الاسبوع اللي بعده هالكلام يوم الاثنين ، المهم قال ياشباب انا بمشي الحين وعاد انتو ضبطوا اموركم وحاولوا تخلصون بدري عشان ترتاحون اللي بيجي بكرة " الثلاثاء " واللي بيجي يسوي الكشف حقه يوم الاحد الجاي براحتكم .. وعاد تفرقنا ، فيه ثلاثة سوو كشفهم الثلاثاء وانا ومعي واحد " حنا خمسة " سويناه بعدهم بكم يوم > تعب وهو يكتب
المهم ياشباب هذا اللي قدرت اوصفه لكم لاني حبيت احطكم بالصورة بحكم كثرة الاسئلة عن المباحث قلت اعطيكم العلم الاكيد .. واللي عنده اي استفسار ولاشي انا حاضر وعسى الله يقدرنا .. والله الموفق
التعديل الأخير تم بواسطة عريف فني ; 13-04-2010 الساعة 02:55 PM
|
العرض العادي
