انا احببت ان اشارك بفضح الانتهاكات و المخالفات في احد القطاعات الاقتصاديه المهمة في البلد و التي يتم فيها سرقة البلد و سرقة مستقبل ابناء البلد بعيدا عن الاضواء و بعيدا عن الاعلام ، وهذا القطاع المنهوب والمخطوف او المسرح المظلم هو قطاع الاتصالات.
و الموضوع في الحقيقة مختصر الى اقصى درجة و هو اني عملت بقطاع الاتصالات و شفت بعيني ارقام و حقائق مرعبه كيف ان الاجانب لاهفين البلد و رامين لنا العظم نمصمص فيه .. تخيلوا اني عملت بشركة اتصالات متعامله و متقاولة مع زين ( ام الاجانب) تخيلوا ان لدي خبرة 5 سنوات و شهادات تقدير و شهادات ادارة و فوق هذا كله حطوا واحد اردني مدير علي و هو اقل مني خبرة و اقل مني شهادات و كفاءة اداريه و كان يستلم حوالي 22000 (22الف) ريال وانا يالسعودي استلم 5000 ريال و بعد خصم التأمينات يصير حوالي 4600 ريال ! و زود الظلم اني يالسعودي ابن البلد عندي عائلة ســـعـــوديه اعيلها من فضل الله تعالى ولله الحمد وراتبي 4600 ريال و هو الوافد العربي ما كان متزوج و الان توه عريس وراتبه 22000 ريال ســـعـــودي !! ذنبي اني سعودي !! و حظه انه وافد عربي (اردني) توسط له و احد اردني مثله عشان يصير مديري و مدير القسم و هو مايدري عن شيء اسمه ادارة و الاسواء انه يمتهن الكذب في الادارة و الصعود على اكتاف الاخرين و الحسد رغم راتبه الكبير.
يا خوان الهجوله و الشده و البطاله ، شركات الاتصالات و مقاولي الاتصالات مليانين اجانب و صار شعارهم ان الوافدين العرب هم المدراء و يفضلون ان الي تحتهم يكونون الاسيوين (هنود و باكستنانين و فلبينيين ووو) و بالنسبه للسعوديون لديهم فهم اما يكونوا خدم ممتهنين من قبلهم مثل حراس امن يطلبونهم يسوون الشاي لهم او سواقين او عمال سنترال او اذا مره اكرموهم خلوهم معقبين داجين يجددون اقامتهم و يمنحوهم تأشيرات زيارة للتلاعب بأنظمة العمل بالبلد .. و الأكثريه من الاجانب بفضلون السعودي يكون عاطل بالبيت مع النسوان .. هذه حقائق من واقع تجربه الكل يعلمها بس البعض يحاول ان يخفيها.
ومن اساليب التحايل على انظمة العمل بالمملكة ان ترى الوافدين داخلين البلد على تأشيرات زيارة و لكنهم يعملون تحت غطاء و حمايه مديري الموارد البشريه بالشركات الذين هم للأسف سعوديون و لكنهم سعوديون متخاذلون و متأمرون (طابور خامس) .. و كذلك ترى تأشيرات الوافدين و اقاماتهم عبارة عن عامل عصائر او دهان او معلم فطائر او سباك او عامل او سائق خاص و هم يعملون مدراء مشاريع و محاسبين و مهندسين و فنيين و اداريين !!! و السعوديون هم حراس الأمن و السائقين و سواقين اللموزينات و عمال السنترال !!! حقا نسأل اين مكاتب العمل و وزارة العمل عن هذه الانتهاكات و التحايل على الأنظمة ؟؟ !!

للمعلوميه ايضا فإن الأجانب مسويين عصابات و رواتبهم على النحو التالي:
العرب و الاسيوين (الصغار و المبتدئين الجدد) تبداء رواتبهم من 4000الاف و حتى 12000 ريال
العرب الوافدين المشرفين رواتبهم من 10000 ريال الى 16000 ريال
العرب المدراء للأقسام رواتبهم حوالي 20000 ريال الى 28000 ريال
العرب مدراء شبه كبار و كبار (الهواميراصحاب الأيادي السوداء تجاه الوطن و ابناءه) رواتبهم تبداء من 25000 ريال و الى 60000 ريال

و السعودييون هم اهل 1500 ريال و 3000 ريال و بالكثير اذا كان صورة امام مكتب العمل و ببغاء للأجانب الذين خلفه فيأخذ 10000 ريال !!

الحل في ثلاث نقط مبدئيه:
1- ايقاف الاستقدام لمدة 3 - 5 سنوات و معاقبة المتاجرين بالفيز على حساب مستقبل و رفاهية ابناء هذه البلد
2- تحسين اوضاع الموظفين السعوديين و وضع حد ادنى للأجور لعموم القوى العامله و وضع كادر هندسي للوظائف الهندسيه
3- ايقظوا مكاتب العمل و وزارة العمل من اوهامهم و سباتهم حتى يتم اعطاء الوظائف بشركات الاتصالات للسعوديين ابناء البلد كفايه حوالات الى الخارج بالمليارات من الريالات قطاع الاتصالات فيه اكبر دورة للمال و لهذا يتم التعتيم الاعلامي على الفضائح و المخازي و الخروقات التي تتم فيه بعيدا عن اعين العاطلين و اعين الشرفاء

حسبي الله ونعم الوكيل
ولو تفتش ورا الاجانب تحصلهم اصحاب سوابق ومهنته سمكري ولا حداد
وغير كيذا وش يبي يصلح لهم يصنع القنبلة الذرية فيه كفائات وطنيه اولى بمناصب الشركات وتغيير طاقمها الاداري
انا اطالب مكتب الهمل الي نايم على اذانه يصحى ولا والله وبالله ان فيه كفائات وطنية عندنا مستعده للعمل
بس الاجنبي وش زوده الا انه عبد بالفين ريال واقامته الف ريال وشهادته مزوره ووووو الخ
وحسبي الله ونعم الوكيل

مهندس اتصال ربي يعينك ويعوضك خير
الحل الامثل في نظري ايقاف الاستقدام لفتره طويله وتشغيل الخبرات والكفائآت السعوديه من الجنسين ومثل ماتفضل الاخ عاشق دينا عندنا كفائات وطنيه بمؤهلات عاليه وحتى لو نقصتهم الخبره ماراح تنتهي الدنيا لو عطونا فرصه للتدريب وشغل الوظائف اللي مستحوذين عليها الاجانب ..وصلونا لفساد مالي واداري لكن بكره ينقلب السحر على الساحر مااقول الا الله المستعان

كلام عين الصواب بس متى يطبق الضاهر حلم بليس بلجنه
وهذا زمن الفسااااااااااااااااااااااااااااااد من اسواء الازمنه

اخوي اوافقك الرأي
تدري في يوم من الايام اتصلت على رقم 1100 حق شركة موبايلي رد عليه بنغالي
المهم هو مافهم عليه عربي كلمته انجليزي مافهم شفت بنغالي جنبي خليته يكلمه قاله سكر سماعة
واتصل مرة ثانية توهق الرجال ماعرف ينفذ الخدمة

ليه مايتم ايقاف الاستقدام للابد

خلاص كافي جرائم ومشاكل

حسبي الله ونعم الوكيل

شيئ يقهر

الاجنبي متنعم بديرتنا ونحن ماكلين هواء

لاحول ولاقوه الابالله يااخي انا حسب مهنتي اني مندوبه موبايلي
استغرب لما افعل شرائح للعميلات واخذ اقاماتهن اكتشف انه مكتوب لها بالاقامه غير مصرح له بالعمل
وتشتغل بااكبر المستشفيات او الشركات...ولما اسئلها يكون زوجها المدير او خالها مسؤل التوظيف
وفعلت 6 شرائح لمدرسات مدارس اهليه كبيره مصريات ونفس الحكايه غير مصرح لهن بالعمل
وبنات السعوديه ماسكات طابور على مكتب التوظيف واللي تسوي لهن المقابله وحده سوريه نفسها بخشمها بعد
لاحول ولاقوه الابالله

يارجال بكل مكان نصب مو بالاتصالات وبس .... انا كنت مؤظف اداري سابق بشركة كيك امريكانا

بجده والله العظيم انا ككذا مؤظف سعودي وكلنا جامعيين رواتبنا ثلاثه الاف فقط ... واقسم بالله اني فية واحد مصري نفس العمل اللي اسويه هو يسويه وياخذه سته الاف ؟ طيب ليش راتبه اعلى من راتبي وحنا نفس الشهاده ونفس الخبره وجايين سواء للشركه ؟؟؟ تدري ليش ؟ لان المدير العام مصري ولازم ينفع عيال عمه ولا احنا مالنا احد واقسم بالله العلي العظيم المدير العام مصري وراتبه فوق ثلاثه وستين الف ريال ... وجميع المدراء .. المدير المالي والمدير الاداري ومدير التسويق والمبيعات ان كلهم مصاريه وراتبهم وانا اشوفها بعيوني بالكشوف مسيرات الرواتب انها فوق 35 الف ريال ... وعلى فكره والله مايدرون وينهم ملقين ...

واقسم بالله ان هالمدير المصري معه سواق وسياره مرسيدس وتسدد جوالاته وجوالات زوجته وبناته وعياله ..

طيب وش نسوي في هالحاله ؟؟

وعاشت بلادي ......

الله يكون في عونك وعوني وعون جميع المسلمين

اخواني و اخواتي الاحباء في الله تعالى :
مملوحة 2006 و عاشق دينا و عبدالله الظفيري و عبدالله العنزي و يارحمان و حممدان و اخصائية 2007 ... اشكركم جميعا على تعليقاتكم و مروركم الطيب

واتمنى ان بعد هذه التعليقات و الشواهد على الظلم الواقع على ابناء و بنات البلد انه تصل هذه الأصوات الى المسئولين او بعضهم على الأقل حتى يتحركوا لإنقاذ مستقبل اخواننا و اخواتنا و اسرنا و ابنائنا من هذا الظلم و التحايل و التراخي المدمر.

و أسأل الله تعالى لكم و لجميع اخواننا و اخواتنا المعطلين و المظلومين ان يفرج الله تعالى همهم و ضيقهم و مظلمتهم

دمتم سالمين،،، مهندس اتصال