الله يسامحك ..

النترا · #1 (**permalink**) 26-10-2010, 03:26 AM

بسم الله الرحمن الرحيم
السلام عليكم ورحمة الله وبركاته

الحب .. طفل ٍ سكن شعري وهوجاسي
وفي ظلوعـي العـوج ربيتـه وكبّرتـه
خذاني من .. الوطن والناس وانعاسـي
وابـلا قناعـه .. تقبّلتـه و بـرّرتـه
سلمت أمري إليه وطحـت متواسـي
إلين ماصـار شـي ٍ مـا تصوّرتـه !!
حبيبتي .. كيف اكذّب حزني وياسـي
لو العذر يعـذرك قبلـك تعذّرتـه !!
الله يسامحك .. مـا قدّرتـي احساسـي
وانا على شانك .. الاحسـاس قدّرتـه
نسّاني الهـم .. غالـي ربعـي وناسـي
وذكرت ربي .. وقلبـي فيـك ذكّرتـه
ودوّرتي اسهل طريق .. لضيقة انفاسـي
ماكن درب الفرح .. لرضـاك دوّرتـه
يا سيّـدة خافقـي ومحطمّـة باسـي
كم مـرة ٍ لمـت خفّاقـك وحذّرتـه
صحيح احبك .. وآخاف فراقك القاسي
وخطـاك .. يامـا تجاهلتـه ومرّرتـه
لكنّـي اليـوم لا ذاكـر ولا ناسـي

ودّعتك الله .. وقلبـي عنـك صبّرتـه
عساني الموت .. كان بينحنـي راسـي
ويا جعلي الضيم .. لو مبداي غيّرته !!