السلام عليكم ورحمة الله

طبعا المنتدى تاسس لجلب المنفعه للجميع وانا حبيت استفيد منكم يا اخواني الكبار
انا طالب بصف ثالث ثانوي عمر 18 ما بقى الا شهر على انهاء الادراسة ولاختبارات
حبيت استشيركم واخذ برايكم السديد بما هو متاح لي
اول شي انا ما احب الدراسة حيل
ثاني شي ما ودي ابعد عن اهلي مسافة كبيره جدا جدا
ثالث شي ما قدر اعيش الا في السعوديه لا طلعت برا السعوديه احس بضيقة صدر
الحين نجي للخيارات المتاحه امامي
اقدر ادخل معهد الفرابي الخاص واتخرج دكتور اسنان ومدة الدراسة 7 سنين اول سنة تحضيري
وخمس سنين دراسة التخصص واخر سنه امتياز طبعا على احساب الدوله ابتعاث داخلي بس بدون مكافئه
واقدر اروح امريكا على حسابي الخاص ثم احول على بعثة الملك عبد الله مدة الدراسة اول سنة لغه
والسنه الي بعدها تحضيريه واحتمال بدون تحضيريه واربع اسنين هندسة مكانيكا
ثالث شي وهذا الي نفسي فيه بس اخاف ما انقبل نفسي ادخل سابك ولا شركة العمليات المشتركه بين الكويت والسعوديه شكره محترمه طبعا ودي ادخل فيهن بنضام تدريب منتهي بالتوضيف او يسمونه التدرج
رابع شي ودي ادخل جامعة الملك فهد للبترول والمعادن بالضهران بس يقولون صعبه حيل
او ادخل جامعة الدمام تخصصات هندسه او ادارة اعمال
ويا ريت تفيدوني بالموضوع ولكم الاجر ان شاء الله في تحديد مصيري
ادري ان موضوعي مو مرتب بس احس اني فضفضت الي بقلبي
وشكرا لكم

استخير قبل كل شيء وربي راح ييسر لك الأمر اللي فيه الخير لك

رضى والديك مهم جداً

لايوجد مستحيل ولايوجد صعب إلا بإرادة الشخص نفسه

نصحية : إذا بتدرس إن شاءا لله خلي بجانب الدراسة عمل منها تستفيد خبرة ومنها تكون منحز لنفسك قبل الآخرين وهذا يضيف لك في السيرة الذاتية .

بالتوفيق يارب

جزاك الله خير ومشكور لاهتمامك بي

وعلى فكره جايب بالقدرات 78 اعلى درجه ونسيتي السنه الماضيه 82 واتوقع نسبتي الموزونه السنه هذي ممكن 84
والتحصيلي للحين ما اختبرت

انصحك بكليه ينبع الصناعيه

انصحك بكلية الجبيل الصناعيه اذا كنت تبي تدخل الشركات


لان الكلية مطلوبه من الشركات ويكفيك انك اذا تخرج ان الشركة تجي الكلية وتتعاقد معاك والشي الثاني ان شركة


معادن تقبلك اذا انهيت السنة التحضرية والشي الثالث اذا انت تقدر تكمل دراستك سواء دخل السعودية او خارجها

او قدم علي نظام اي تي سي

موفق بإذن الله ... لك مني أجمل تحية .

السلام عليكم
أخي أنا أنصحك بالدراسة وإن كان لابد من العمل فليكن بجانب الدراسة
يعني ادرس واشتغل بس لاتفرط في الشهادة مهما كان .. الحين العالم ماجستير ومالقو وظايف كيف بس ثانوي...
ركزز في اختيارك وشاور والأهم استخير وماحاب من استخار.

عزيزي : اذا أنت مو حق دراسه أبعد عن الطب والعلوم الطبيه التطبيقيه الخ ..

اذا تبي تدرس سنتين .. وبعدها الوظيفه مظمونه بإذن الله .. مالك الا ( معهد الادارة العامه )

المعهد ما يحتاج أتكلم عنه .. راح تتوظف قبل ماتتخرج من المعهد بـ 4 شهور معهد قوي جداً .. أهم شيء تكون عندك للغه أنجليزيه ..

أتمنى لك التوفيق ..

ماخاب من استشار ..

اولا خذ خبرة من اخوانك اللي اكبر منك جربوا العمل والدراسة .. الدراسة مهمة والشهادة مهمة لاتفرط فيها .. لكن اذا انت مانتب راعي دراسة ومهمل في المذاكره لاتدخل تخصص صعب شف لك تخصص تحس انك تحبه ويكون سهل وادخله ولايهمك كلام الناس لانك لو تبدع فيه راح يكون لك اسمك

ثانيا اذا ماتحب تبعد عن اهلك اجل كنسل موضوع الدراسة برا لانك بتفشل وصدقني لان الغربة صعبه واغلب المبتعثين رجعوا بسبب اشتياقهم لاهلهم .

انا مااعرف توجهاتك وش تحب تدرس لكن نصيحتي لك انك تشوف تخصص من التخصصات المالية اما ادارة اعمال او اعمال مصرفية او تمويل او اقتصاد هذي مطلوبة او تخصص انظمة "قانون" هذا حلو او تخصص نظم معلومات"نصف حاسب ونصف ادارة" ممتاز

ابعد عن التخصصات المعقدة مثل الطب والهندسة والمحاسبة ...


واذا انت مستعجل على الوظيفة مالك الا معهد الادارة سنتين وانت موظف باذن الله في احد البنوك وبراتب طيب .

ايضا العمل مهم والخبرة مطلوبة لو انك كاشير .وصدقني العمل مع الدراسة ينشط اكثر ويخليك ترتب وقتك ويعلمك التنظيم وادارة الوقت .. اذا تقدر تشوف لك شغلة فالليل مع الدراسة وتكون هادية اما بائع او كاشير راتبها 3000 تقريبا نعمة وتتخرج باذن الله ومعك خبرة وشهادة .


الله يوفقك