صباح الخير للي يشوف موضوعي الصبح ومساء الخير لاهل الليل

سيرتي الذاتية عبارة اني انسان نشأت في عائلة مرتاحه ماديا وهنا بداية المشكله ....درست واتخرجت من الثانوية بمجموع مايخليني افكر اقرب من سور جامعتنا العزيزة بالتالي سافرت للخارج ودرست وجلست سنة وبعدها اتوفى الوالد الله يرحمه وقررت ارجع لديرتي وتركت دراستي بحكم وجود مشاكل مع بعض شركاء الوالد في مجال تجارتهم وانعكست خلافات الشركاء على وضعنا المادي واطريت اني انزل لسوق العمل عشان اقدر اصرف على نفسي وعلى اهلي واشتغلت في احد الفنادق بالواسطه طبعا في وظيفة سنترال ومع الايام وبحكم لغتي الانجليزية مش بطاله على قولتهم اترقيت لين صرت سوبر فايزر في الاستقبال وبعد سنة من حياتي العملية الي كان الراتب فيها مايتعدى ثلاث الاف انتهت مشاكلنا مع شركاء الوالد وتمت تصفية الشركاة بينهم واخذت حقي وكان عبارة عن مبلغ كبير جدا بالنسبة لي ولا كنت في يوم احلم اني امتلكه...
وبوجود هالمبلغ الي كان معي بدأت الهواجيس تلعب فيني وبديت افكر في المشاريع واستقلت من عملي وفتحت لي مشروع له علاقة بالاسهم ونجح المشورع نجاح يرضي طموحي واحلامي وكنت اتذكر الثلاث الاف الي كنت اخذها نهاية الشهر وابتسم ابتسامة ناصر القصبي في دور فؤاد واستمر مشروعي وابتسامي لمدة ثلاث سنين عشت فيها الحياة الي كنت ارسم لها من صغري وبعد الثلاث سنين ومع انهيار الاسهم انهرت وانهار مشروعي وانهارت احلامي معهم ومابقي الاسيارة بعتها وبفلوسها بدأت في مشاريع صغيره لعلي اقدر ارجع لوضعي السابق وكلهاالمشاريع كانت مصممه انها تفشل بعد مشيئة الله... ورجعت لسوق العمل ثاني وماتركت مكان الا ماتركت شركة الا وتارك فيها ملف لين جا فيوم عامل على كفالتي يطلب مني تجديد لاقامه والاجودي كان عالم بوضعي المادي وعرض علي وظيفة في الشركة الي يشتغل فيها وبدون تردد رحت مع واسطتي بعد الله وتم توظيفي بمسى وظيفي غير معلوم (معقب +سواق + مسئول إيجارات) وبراتب ثلاث الاف
ولقيت بنت الأجاويد الي توافق علي وتزوجت وبعدها بسنة قفلت الشركة الي اشتغل فيها ورجعت لعالم البطاله مرة ثانية وصارت بينا علاقة قوية لحد هاذي اللحظة..
اتوقع اني وجعت راسكم بس هاذا المكان الوحيد الي الي اقدر انا وغيري من العاطلين اننا نفضفض فيه بدون استحياء.....
وهاذي هي سيرتي الذاتية وواتوقع انها تشابه لحد كبير معظم السير الذاتية للعاطلين مع اختلاف الاحداث ولكن التشابه في النتيجه.....

والله مادري وش اقولك وفاة ابوك قلبت حياتك فوووق تحت والحمد لله على كل حال
لكن اسأل الله العلي القدير انه يجعل لك من كل ضيق فرجا

ان مع العسر يسرا والله يوسع لك بعد هالضيقة على خير

واوصيك بالاستغفار ياخووي وابعد عن الحرام والمعاصي ترا هي اللي ضيعتنا وحنا مانحسس

وبما انك راعي مشاريع ليش ما تبدا بمشروع صغير وارباحه مضمونه 100% ومافيها خساير باذن الله

وهي انك تشتري مؤن و اغراض بسعر الجملة وتقسطها على المحلات بسعر اغلى

والله انا لو رجال لا اسويها لكن ماباليد حيلة =(

الله يرزقك ويعوضك عن كل مافاتك
لاتيأس من رحمة الله
وواصل التقديم على الوظايف او مواصلة مشاريعك الى ان تعود افضل مما كنت

الله يوفقك ويرجعك لحالتكم مثل اول ويرحم والداك ويغفر له والله ينور عليه بقبرة
والله ياليت عندي فيتامين واو كان اوظفكم كلكم يالاعضاء العاطلين والعاطلات

الله ييسر اموري وامور كل عاطل ....واشكر كل شخص دعالي