ضاقت بي الدنيا

فتى الحليله · #11 (**permalink**) 13-06-2011, 03:08 AM

اخوي هي فرصه جاتك وصابتك الظروف ربما هالظروف خيره لك

لكن العمر ماهو هم قدام العلم والشهادة لانك بعد الشهادت بترتاح جدا

وبتتوظف بوظيفه اسمك يكفي ( مهندس) شوف فكر المرتبه اللي بتتعين عليها

ادرس الان زمن الشهادات والعمر ماهو عائق

اتمنى لك التوفيق من كل قلبي

شاطئ الاحزان · #12 (**permalink**) 13-06-2011, 03:09 AM

اقتباس:

المشاركة الأصلية كتبت بواسطة يالله بالوظيفه

السلام عليكم ورحمة الله وبركاته

نصيحتي لك ياغالي لاتجي العسكريه إلا إذا خلاص تقفلت كل الأبواب بوجهك الآن كم الهندسه وجد واجتهد والعلم والله ماعمره خذل أحد كمل دراستك ياغالي والله بيرزقك بس شد حيلك وكمل دراستك

أنا لي شهر وكيل رقيب فني بالجيش وأول مربوط باستلمه 8615 ريال ومع ذلك بأسجل انتساب بجامعة الملك عبدالعزيز والله ييسرها من عنده والعلم ماعمره ضر أحد أبد أبد وأنت بتتخرج مهندس وبتلقى ابواب الرزق بوجهك إن شاء الله كثيره

لكن يا الغالي كل اللي كانوا معاي واللي توهم طلعو توضفوا وعينوا من الله خير وبعضهم تزوج وانا مطووووووول واذا تخرجت يمدي العالم مخلفين وكبرانين ورعانهم بعد كل ما اشوف واحد من الجماعه متوظف واصغر مني انقهر واطق ياربي ليييييش يصير معي كيذا ولا اللي كافي خيره وشره ما يمشي في هالدنيا والله امرها عجيب

ياحظ لاتقرب حلمي · #13 (**permalink**) 13-06-2011, 03:17 AM

من وجهة نظري ياااخووووووي كمل دارستك وانت عديت سهل مابقى شي وصدقني تتعب سنين بس راح يكون وظيفة تشوف فيها تعبك والشهاااده الشهااادة وانت مشاء الله هندسه يعني مجالات توظيف متعدده وومرررغوب وتقدر تكمل دارستك بالخارج على حساب الدولة ولا يعطوك كفاة صدقني ماطلعت من العسكريه الا خيرة وحكمة ربك ماتدري وين رزقك فيه وتحمل واصبر لاوتنسى قال رسول الله صلى الله عليه وسلم (( من سلك طريقا يلتمس فيه علما سهل الله له به طريقا إلى الجنة )) احتسب الاجر وانا اخوك لاتياس كمل مسيرت نجاااحك والله يوفقك ويسهل امورك

بني وبينك كل الي الحين بعض عسااااااكر ودهم يرجعون زمن ويصير عندهم شهادة

فخر الوطن · #14 (**permalink**) 13-06-2011, 03:19 AM

طيب قدم في العسكرية وادرس اذا اقبلوك نهائي حول انتساب او اسحب ملفك بكيفك ولاكن لاتخسر دراستك وتجلس عاطل وفي الاخير تندم
عسى الله يوفقك ويسر امرك

شاطئ الاحزان · #15 (**permalink**) 13-06-2011, 03:32 AM

الله يريحكم مثل ما ريحتوني انا اشهد انكم اعطيتوني دافع وابي اصبر الين ربي يفرجها علي مالي الا كيذا مره ارسب والمره الثانية اعدي فيها لكن على الله ما يصير لي موقف ويحطمني

قصة بطاله · #16 (**permalink**) 13-06-2011, 03:44 AM

اخوي شف والله لاتعرفني ولا اعرفك

بس بقوولك

انت عفت العسكريه وطلعت من الدوره

يعني لو ترجع للعسكريه مره ثانيه بتطق رووحك ويمكن مراح تتحمل لانك مجرب وبالاخير بتصير جندي وراتبك 5000 واذا رحت بتخطب وقالو وش عملك بتقول جندي

لكن لو كملت دراستك واخذت شهادة هندسة

العسكريه تطلبك تصير مدني براتب اقل شي 12000 اول من يطلبك وزارة الدفاع والطيران او الحرس وكلها بتكون مهندس عندهم يعني تخصصك مرره حلو

واذا على العمر بتقول بيصير عمري 30 واخوياي تزوجو وخلفو وعيالهم كبار بقولك طيب تزوجو وخلفو بس وضعهم المادي زفت انصحك نصيحه اخو لاخوه كمل طريقك بالدراسه ونشووفك بعدين مهندس

انا مقدم على جندي بالحرس وادعي الله يقبلني وماقدمت الا لان ظروفي ماتسمح اني ادرس بحكم اني كبير العائله والحمل كله على عاتقي ونصيحتي كمل ونشووفك مهندس قد الدنيا

تحياتي لك

رائد العصيمي · #17 (**permalink**) 13-06-2011, 03:57 AM

يارجال كمل هندسة واخذ ترم صيفي ابرك لك من العسكرية

والله الهندسة راتبك تسلم على 15000 الف سلام سلام

هذا غير انك مدني وفال امها موب عسكري ماكلها تبن

انصحك لوجة الله اذا موب محتاج الوظيفة لاتفصل والله اطلق لك مليون مرة

واذا محتاج وظيفة داوم في شركة والشركات ترا كلها شهرين والا 3 شهور الاولى بس لين تثبت نفسك

بعدين اشرح لهم ظروف دراستك والله يساعدونك ماعليك

والله يوفقك

شاطئ الاحزان · #18 (**permalink**) 13-06-2011, 04:05 AM

قصة بطالة
روح ياعل ربي يرزقك من اوسع ابوابه ولا تضيق بك الدنيا

رائد العصيمي

هقوتك مالي غير كيذا يمشي لي الف ريال شهري يكفيني عن منت الناس والله يهنيكم ويسعدكم ويبعد عنكم الاحزان والله ريحتوني الله يريحكم