السلام عليكم ورحمة الله وبركاته

تحركت للمعهد الساعه 5 الفجر ودخلوني على 5 ونص

المهم جلسنا في الميز وانتظرنا تقريباً من نص ساعه الى ساعه بالكثير

وقبل الدخول للميز فيه كشوفات كل واحد يجي ويشوف رقم ترتيبه بالتسلسل

بعدها دخلونا للميز ماصات وكراسي ..

المهم طولنا وشوي وزعوا علينا ورقة الاختبار التحريري

طبعا الاختبار كلها اساألة عامه ومسألة رياضية و انجليزي سؤالين فقط

بصراحه الاسألة فيها صعوبة شوي نوعاً ما

المهم ينادو بالرقم التسلسلي ويصفوا كل 20 شخص بطابور

وندخل على ملازم اول يقيس الطول و الوزن ، وبصراحه متشدد

طرد كذا واحد قدامي

المهم بعدها تروح للدكتور مدري وش حقه يسأل كم سؤال

طبعا انا ما سألني ناظر فيني وابتسم وحط علامة صح

المهم نجي عند المقابلة الشخصية طبعا فيه نقيب وملازم اول ورائد

من حسن حظي جيت عند الرائد رجال بقمة الاحترام والاخلاق والذووق

جلس يضحك معي كأني صديقه

المهم من ظمن الاسألة اللي سألني عنها :
س1- من هو وزير الداخلية
س2/ من هو مساعد وزير الداخلية للسؤون الأمنية
س3/ من هو نائب وزير الداخلية
س4/ عدد الخلفاء الراشدين
س5/ ماذا يسمى الايام 11 و 12 و 13 بشهر الحج
س6/ عدد 5 قطاعات تابعة لوزارة الداخلية
س7/ خال عمتك ايش يقرب لك

المهم بعدها رحنا للمسح الأمني ، بغرفة فيها دكتور نفسي ومطوع وعميد ونقيب واعتقد ملازم

تروح لواحد منهم وبعد ماتخلص تروح للمطوع يسألك حافظ آية الكرسي ؟

وبعدها يحاول يختبر صبرك ويقولك جوالك فيه مقاطع مش كويسه !!

بعدها تروح للدكتور النفسي ويسألك كم سؤال عن طلعاتك وعن علاقاتك مع والديك ..آلخ

بعدها رحنا لأختبار اللياقة < وبصراحه متعب جداً رجولي الى الان توجعني

خلونا نلف الميدان واول اثنين ياخذو الدرجة كامله . انا جبت الرابع

بعدها تروح للمسبح ، ويخلونا نسبح واحد واحد بالدور ينادو بالاسماء !

والحمدالله بسيطة بس مع الركض والبشم والشد الواحد يجي تعبان وضايق خلقه

وكذا واحد رفض يسبح مافيه حيل يكمل

ونصيحة : اللي موعده قريب يسوي رياضة ويعود نفسه ع الركض وينشط عضلاته



واي استفسار ثاني انا بالخدمة ~

المشاركة الأصلية كتبت بواسطة غريب الحياه شكراً لك ماقصرت والله يوفقك

المشاركة الأصلية كتبت بواسطة عبادي والرصيف يسلموو واللهـ مــاقصرت ويعطيكـ العــافيه..نفس سؤال ^^^ ونجيب معنـا حذاء في كيس وانت بكرامه..؟