اخوي مون اكس مان
ما عرفت اقدم عن طريق النت يطلعلي اكتب باسورد ويوسر نيم ومادري ايش
في ايميل نرسل السيرة الداتية عليه
طيب تقوول الراتب 4200 بعد ثلاث شهور يزيدواا 1000 ريال اكيد وكيف يكوون دوام الاوفر تايم؟؟؟
مو لازم خبرة بس مكتوب من شروط القبول معرفة تامة بأساسيات الحفر ؟؟؟
الشغل تحت اشعة الشمس؟؟؟
تكفى جاوبني اخوي ان عاطل عن العمل كيف بعد اقدمم
متى ينتهي التسجيل؟؟؟؟ووين التدريب والتوظيف؟؟؟
ااسف على الاطااله

شـكرا لك وبارك الله فيك... لك مني أجمل تحية .

مرحبا

ياغالي ممكن اعرف انت داخل في الشركة على وظيفة شنو الي تقول راتبك 4200 وبعد ثلاثة شهور تجيك زياده 1000

؟


انا موظف سابق في شركة الحفر العربية صار لي سنه تقريبا من طلعت منها
وكنت عامل حفر(رستبوت )

وياليت اذا ماعليك امر تقولي كم الاساسي الي وقت عليه ؟؟ وكم البدلات
طبعا لاي مكتوب بالعقد مو الي قالك اياه الموظف

اخوي مون اكس مان طيب التدريب والتوظيف وين؟؟
هل التوظيف رسمي؟؟؟ وهل العمل تحت اشعة الشمس؟؟؟
متى ينتهي التسجيل بضبط؟؟؟ مـتأكد اخوي اي ساعة تشتغله اوووفر تايم بمائة ريال؟؟؟
وايش يعني ادا جت الشهادة من اوروبا بزيدوا راتبك 1000 ريال؟؟؟

اسف على ازعاجك اخووي والله حمستني ان انسان عاطل
ياليت تجاوبني بتفصيل الممل

انا اعطيكم بعض معلومات عن الشركة

- لما دخلت قبل سنه الراتب الاساسي 2000 وبدل السكن 500 ويدل النقل 200 والراتب كامل مع الاوفر تايم 3700 اكثر شي واقل شي 3300 ريال .
- دوامك 14 يوم في مكان العمل ماتشوف اهلك ولاتطلع و7 ايام متكي في بيتكم
- اكل وسكن وقت العمل هناك على الشركة والاكل يختلف من رق الى رق ( الرق هو مكان العمل الي تشتغل فيه )
- تأمين مستشفى لك ولزوجتك ولعيالك .
- التسلسل الوظيفي : رستبوت - فلور مان - ديركمان - شيف رستبوت - مساعد حفار - حفار - نايتبشر -تولبوشر - رق منيجر .... والميكانيكي والشيف ميكانيكي والكهربائي وشيف كهربائي
- الترقيات في العمل انت وجهدك ونصيبك بالعمل يعني يمكن تترقى في شهر ويمكن في سنتين ثلاث انت وجهدك
- الزيادات لكل وظيفة اربعه درجات او بالاصح اربع زيادات اما 150 او 250 تقريبا على الراتب الاساسي والمفروض كل سته شهور يرفعون لك زياده لكن برضو على حسب الرئيس الي عليك الي هو الشيف رستبوت وحب الرق وحسب موافقة المنيجر ... انا ضليت 11 شهر وبعدين بالموت رفعو لي زياده وطلعت بنفس الوقت هع .
- العمل اول 7 ايام من 12 الظهر الى 12 الليل واخر 7 ايام من 12 الليل لين 12 الظهر
- بريك الساعه ثلاث ربع ساعه وللصلاة والعشا نص ساعه والساعه 9 ربع سااعه هذا الرسمي لكن على حسب الشيف الي عليك لكن الاغلب يخلونها نص سااعه للساعه ثلاث وتسع ووساعه للعشا والصلاة الانادرا .
- بعض الرقوق يمشو يوم السبت وبعضهم الاحد وبعضهم الاثنين
- وفي بحر وفي بر , البحر دوامهم شهر هناك واسبوعين في البيت الا ماندر تحصلهم اسبوعين باسبوع والبر كلهم اسبوعين باسبوع الا رق واحد شهر باسبوعين لانه بعيييد
- بعد ماتسوي المقابلة يعطونك موعد للدورة او الكورس مدتها 5 ايام من الساعه 7 لين الساعه 4 للي بيروحو بر اما الي بيروحو بر برضو لهم كورس ثاني غير هذا مدته 3 ايام
- الكورس 95 % مافيه رسووب الا الي مفهي وقت الدراسه وعقله مقفل حده راح يرسب لان في اختبار اخر الكورس تحريري وشفوي والامووور سهله حيييييل جدا
- دوامك طبعا بالشمس والحر والرطوبة وجميع الاحوال الجوية وشغلك كله بين حديد يعني خلك مشغل مخك عشان لاتنصاب ولاشي
- كلن ونصيبه الشركة عندها تقريبا 15 رق مدري اكثر وكل رق ادارته ومعاملته تختلف على حسب الاشخااص طيبين ولاسيئيين لكن المثل يقول امشي عدل يحتار فيك عدوك
- شغل الرستبوت الي هو عامل عادي كل شي يسوووووووية مافي شي تقول هذا مو شغلي تنظيف ترتيب غسيل تشيل وتحط وتسااعد وكل حااااجه .
- شغل الفلور احسن شوي لانه في مكان واحد وعارف شغله كل يوم نفسه مايتغير
- الدركمان اخطر شي لانشغله فووووق اعلى شي بس شغله حلوه والله ويبي لها قلب
اما الباقي تعرفوووه اذا رحتو للرق مابي احرق عليكم كل الامور
- شركة الحفر فيها سعودة كبيير يعني نسبة 70 بالمية من العمال سعودين لكن برضو فيها اجانب ماسكين مناصب مو شوي لكن السعودين اكثر وماسكين مناصب وبعضهم حتى شهادة متوسطة ماعنده لكن بجهده وبعقله وصل للمنصب الرفيع الا بعضهم واصلين بالواسطه طبعا .
- الشركة الان قامت تعطي العامل 50 ريال يوميا فوق راتبه بدل حراره لمدة اربعه شهور .
- لما تداوم اوفر تايم فوق 12 ساعه حقتك يعني تداوم ساعه ولا ساعتين وقليل الي يداوموو لان تعب حيل يعطوك على حسب ساعتك كم في اليوم والساعه بساعتين يحسبوها لك يعني لو كنت تاخذ في الساعه 12 ريال يعطونك 24 ريال اما كلام اخونا صاحب الموضوع انه في الساعه 100 ريال هذا ماتوقعها ومستحيلة بعد .
- الشغل في هالشركات يبي له صبر وصبر وصبر وصبر وصبر وصبر وصبر .
- انا كنت مرتاح من الرق الي انا فيه ومن المجموعه الي معاي حيييييييييييييييل لكن فضلت الاجازه على الراحه النفسيه ورحت شركة ثانيه دوام شهر بشهر مثلها حفريات وتحسفت اني طلعت الى يومك اني متحسف ولو اقدر ارجع في نفس الرق كان رجعت بدون تردد لكن للاسف لو برجع راح يودوني رق ثاني .
- انا طبعا الى الان متواصل مع ربعي في هالشركة واخذ اخبارها اول باول غير كذا معي ناس هنا ربعي ويجلسو معاي يشتغلو في هالشركة وماسكين مناصب بعد .
- الشركة تعطيك في كل سنه راتب اساسي بدل اجازه لان مافيها اجازه سنويه وايضا في نص السنه تعطيك ربع راتب اساسي .
- بعض الرقوق يجيها بوونص يعني زياده من ارامكو لما يخلصو البئر بدري او يشتغلو بدون اصابات لكن بعضهم مايعطو شي

واي سؤال عن طريقة الشغل وكذا حاضر اجاوب
لكن عن الراتب الي قال عنه صاحب الموضوع مدري عنه
لان يمكن خلو الراتب الاساسي 3000 ريال مثل ماوصى الملك عشان كذا وصل الراتب لين اربعه

وهالشركات الحفريات عليها طلب دائما مو وقت معين يعني دوووم عليها طلب خصوصا برمضان لان الناس تطلع وتفصل وينقص عمال كثير .


بالتوفيييق لكم جميعا

بو عشوق


التقديم مفتوح على طوول لكن الان يبون عدد كثير لانهم ناقصين