السلام عليكم ورحمة الله وبركاته
اعرف وحده مطلقة ولديها ثلاث اطفال وهي موظفة في مدرسة اهلية راتبها 1700 ريال هل يحق لها أنها تقدم على الضمان مع العلم أن والدها عايش لكن مايصرف عليها ولا على ابنائها

اختي ام لنا العيب ان محد يفكر بالاطفال واحتياجهم يعني بالله لو ما قبلوها عشان ابوها مثلا راتبه 20 الف ولا يبي يصرف عليها وش تسوي ابوها ماهو مسؤول عن بناتها تروح تشحذ بالشارع؟ طيب الباحث لو ابو البنات رافض يصرف عليهم مع ان رتبه عالي ...بعد مالهم حق ينقبلون بالضمان يعني من جد حرام اعرف وحده قالها زوجها تبيني اصرف على عيالي عطيني اياهم بالله وش تسوي هالمسكينة مافي وحده تستغني عن ضناها حملت وربت وتعبت واخر شي تتنازل عنهم صعب مره وخصوصا ان ابوهم ما يحب الا نفسه وشديد من جد محد يعاني الا المطلقه والاطفال مالهم احد يعينهم الا الله ثم الضمان الاجتماعي

اختي المكافحة
مشكورة على تفاعلك معاي على الموضوع وأنا ارحم المطلقة هذي لأنها تعاني معاناه مع ابنائها وبالذات انهم بعمر 11 و 10 و4 سنوات قاعدة تحرم نفسها من كل شي عشان توفر لهم أكلهم ولبسهم ودفاترهم والأغراض الي يحتاجونها يعني الله يكون بعونها حالتها تحزن واحس انو بدا يجيها أكتئاب بسبب الشي هذا وأبوهم مايصرف عليهم ولاريال ولا يدري عنهم .

عزيزتي الرجل عندنا يشعر بالاهانه لو ساله احد انت تصرف على عيالك او ما تصرف واحسن حل لهذا الرجل حتى يرجع اعتباره ياخذ اطفالها انتقام من الحرمه انها اشتكت عن عدم تحمل الاب مسؤولية اطفاله واحرجته ... طيب ليه من الاساس تحط نفسك بهالموقف وش ذنب الام واطفالها
مدام يا اخوي Mihs الام حاضنه عيالها دليل كبير انها مسؤوله عنهم ليه ينفتح لنا باب لمشاكل مع الطليق حنا واطفالنا بغنا عنها
وصك الاعاله موضوع لحاله عذاب في بعض المحاكم للمطلقه لازم تجيب صك عسر لزوج يوه طيب الزوج رافض يصرف وشلون تجيب صك عسر؟...والضمان من شروطه لقبول الابناء وجود صك اعاله من هنا المحكمه والضمان ضيقها على المطلقه وابنائها وش ذنبهم
انا جبت صك اعاله واثبت ان الاب رافض يصرف وبرضوه رفضوني ياخي بالهم اننا نلعب عليهم والله حاله يخلون الوحده تفقد الأمان والثقه وتخاف اكثر من المجهول اذا هم ما صدقوها من بيصدقها؟؟
صدقوني الام بعد الطلاق تتعرض لظغوط نفسية فوق ما يتصوره العقل تدخل في عالم الاكتئاب كله من خوفها على فلذات اكبادها انهم ما يحسون انهم انقص من غيرهم او يحسون بالضياع بعد الطلاق لانها تحس انها هي السبب في معاناتهم
انا ابنائي 16و14و12سنه والبنات9و5سنه كل ما كبرو طلباتهم تكبر معهم الله يخليهم لنا ويجعلهم من الابناء الصالحين والمصلحين دمتي بود

المكافحة
الله يخلي ابنائك لك ويرزقك نفعهم ويجعلهم من الصالحين.
وكلامك صح 100%.