بسم الله الرحمن الرحيم ..

السلام عليكم ورحمة الله وبركاته ..

اول شي وقبل ابدأ .. اذا موضوعي مو في قسمه ياليت تنقلونه
لأني بصراحه مضيع ..

المهم ياجماعة الخير انا بصراحه صار لي كم يوم ادخل المنتدى كـ زائر ..

وعجبني بصراحه لـما فيه من افكار ومساعدات افادت الكثير من الناس سواءً من اعضاء المنتدى او الزائرين ..

مع وجود بعض الملاحظات وياليت تعذروني >> اول مشاركه وعنده ملاحظه

ملاحظتي ياجماعة هي : ان فيه اعضاء كثيرين يكتبون موضوع وبلا شك فيه اعضاء يردون عليهم >> اوكي وش الجديد !!

اللي يقهرني ان الردود تحيرني وتخليني (( بين نارين )) يعني الرد يعطيك فكره حلوه لكن ما تدري وش المطلوب منك عشان تنفذ الفكره هذي .. يعني مثلاً يقول المشروع الفلاني كويس وربحه مضمون وووو الخ ..

وانا تعجبني الفكره بشكل عام لكن ما ادري وش اسوي او كيف ابدأ او كم راس المال المتوقع او او او الخ ..

يعني ياليت يا جماعة يكون فيه توضيح قدر المستطاع ..

المهم الحين ندخل في موضوعي .. >> بدري يابو الشباب

ياجماعة الخير انا طالب جامعي وودي بـ دخل اضافي على المكافأة لكن مشكلتي ان ما ودي اشتغل شغل رسمي .. يعني ما يكون في شركه او شغله رسميه بشكل عام .. لأن احتمال تصادفني ظروف خاصه ما اقدر اداوم بعض الاحيان ..

يعني انا دراستي الى الساعة 1 او 3 الظهر بالكثير ..

وودي بعد العصر بدال النوم والجلوس اشوف لي شغله هنا والا هنا تدخل علي مبلع حلو .. (( ماني طماع لا تخافون ))

يعني يمكن احد عنده تجاره خاصه فيه او اي شغله وحاب ان يكون له شريك .. او مثلاً عنده مشكله في المواصلات وحاب اني اشاركه بسيارتي المتواضعه .. او يبي امسك له محل بعد العصر المغرب او العشاء .. او اي شغله تناسبني .. >>> (( طرار ويتشرط )) ..

الزبده ياشباب ابي تنصحوني بمشروع صغير صغير صغير المهم يدخل علي مبلغ يمشي الحال ..

وانا بصراحه من دخولي للمنتدى قريت عن بعض المشاريع ومن ضمن هذي المواضيع .. (( بطاقات الشحن )) .. وعجبني المشروع هذا وخصوصاً ان فيه اعضاء كثر يمدحونه ..

وفعلاً رحت وسألت عن السعر بالجملة .. وكنت ناوي ابدأ بمبلغ بسيط (( 1000 ريال فقط )) لكن وقفت عن مشكلة التصريف ..

فـ ياليت اي احد عنده افاده لي او مشروع سهل ينصحني فيه .. وترى بجد انا بحاجة المشروع هذا .,

وياليت تفيدوني بخبراتكم واي احد وده بشريك بمبلغ بسيط او محتاج احد يساعده وله نسبه وكذا يعني

ويعطيكم العافية وبجد اسف اسف على الاطاله من اول موضوع لي ..

انتظر ردودكم ..

اخوكم : عبدالرحمن