السلام عليكم ورحمة الله وبركاته

بعد غيبه ....

الاخوة الشباب ... فيه مشروع الان طالع نسبه فوق والتجار والمقاولين مو ملحقين عليه ...

كلنا نعرف المباني والرخام والحجر اللي تتركب بواجهات المباني ...

اليوم اختلفت الموازين واصبحت تلك المباني لا تركب الرخام او الحجر وانما تعمل بنظام يسمى :

الكلادينج ...

قبل فترة جميع البلديات وامانات المناطق سمحوا لجميع اصحاب المباني بتركيب الكلادينج

صورة للكلادينج عشان اللي ما يعرفه .. يعرفه ... تفضلوا :






هذي صوره لمبنى تم تكسيته بألواح الكلادينج ...

معظم الشركات الان والمؤسسات اصبحت تعمل بهذا المجال .. وايضا الكثير من الملاك اصبحوا

يطلبون هذا المنتج لعدة اسباب :

1 / يمنح المنتج لصاحب المبنى خيارات كثيرة من الالوان تصل الي 500 لون

2 / ضمان على المنتج لمدة 20 سنة

3 / ميزة النظافة وهي ان المنتج مهما كان بالجو غبار او مطر الا ان المنتج لا يمسك بهذه الاتربه والغبار ... ويبقى لماع ..

4 / التكلفه تقريبا موازية للحجر او الرخام واسهل تركيب ...

بعض الصور لاعطاء فكرة اكثر ...

:
:

الوان المنتج :












طيب .. الان عرفنا المنتج وشكله والوانه ...

طريقة العمل والتركيب ....

يتم شراء المنتج من المصانع مباشرة او الوكلاء لهم في المناطق

يوجد بالسعوديه مصنعين :

1 / مصنع تكنو كلادينج ( الرياض )

2 / مصنع تكنو بانل ( الرياض )

هناك ايضا بالسوق كلادينج صناعه صينيه ( درجات )

وهناك صناعة كوريه ويقولوا عنها انها الماني وهم يكذبون ...

طبعا راح نشتري الالواح على الشكل التالي :





قطيعه ما اكبر صورهم هذولا .. شوهت الموضوع

تم حذف الصورة نظرا لكبر حجمها .. لكن يمديكم تشوفنها هنا على هذا الرابط :

http://www.sptechs.com/emarket/Thumb...item189445.gif



نكمل ...

طبعا الالواح تجي بالشكل اللي في الصورة السابقه .. واحنا نقطعها ونقصصها حسب المساحات اللي عندنا ... وهذا ما يميز الكلادينج عن الرخام او الحجر

وهو ان الكلادينج ممكن نسوي واجهات اسطوانيه او انحناءات في الواجهه او اي شكل جمالي اخر ..

بعد ما نقصصها حسب المساحات نبدأ نركب الالواح على واجهات المبنى ...

نشوف هالصورة مع بعض وكيفية التركيب :







و كمان وكمان ..






اللي شفناه كان التركيب وطريقته ...

الاحتياجات الفنيه للتركيب ...

1 / سقاله للمبنى عشان الادوار العليـــــا

2 / عماله مدربه وهذولا موجودين وعن طريق الجوال تقدر تجيبهم يركبون لك

3 / ماكينة لحام وهذي طبعا يوفرونها العمال معاهم ... وكمان سيليكون عشان سد الفراغات بين اللوح والاخر ..

نشوف المبنى بعد ما خلصوا تركيب .. شوفوا كيف طلع مزوء واوريجنال وبيعئــــد :





:
:

ملاحظة كبر المنتدى :

اللون الازرق الغامق هذا مو كلادينج لا تتورطوا وتورطوني معاكم هذا زجاج يسمى ستركشر ..

وهذا سعره غالي .. انتبهوا يا اخوان تتفقوا على الاستركشر او واجهات الزجاج بسعر الكلادينج

اللهم اني ابرئ نفسي ...

كمان صورة اخرى جانبيه .....




:
:

الاسعار وطريقة الاتفاق :

مبدئيا المفروض اننا نلف احنا على كل المباني ونحاول نتفق مع اصحابها او مع المؤسسات او الشركات المنفذه للمبنى ..

او ممكن نطبع عند المطبعه مجموعة بوسترات مقاس A4

وطبعا يكون مكتوب فيها اسم المؤسسة وانكم متخصصون بالكلادينج ورقم الهاتف وتلصقونها بكل عماره تمرون عيها

لو مشى الحال شوي ممكن نجيب مندوب عنده خلفيه وخبره عن الكلادينج ونخليه هو اللي يلف ويجيب الشغل .. لان المندوب يبغى راتب وعموله

:

عشان ما نضيع الوقت باللفلفه بالشوارع ارجوا الانتباه لنقطة مهمه وهي :

ان المباني التي يتم تركيب الكلادينج عليها هي مباني تجاريه .. يعني على شارع تجاري

مو واحد يروح للفلل والمباني اللي داخل الحارة ويقول بركب لكم ؟؟ كذا انت قاعد تضيع وقت

:
:

الاسعار :

الاسعار تختلف من منطقة لمنطقة ... ومن صناعه لصناعه .. الصيني طبعا ارخص

خلونا نتكلم عن الصناعه السعوديه وهي الاكثر طلبا ....

مناطق ممكن نتفق على 250 ريال الي 250 ريال للمتر المربع

ومناطق ممكن توصل معانا الي 300 ريال بالمتر المربع

انا اتكلم الان عن سعر الكلادينج .. يوصل الي 250 او 300 ريال

مو الزجاج ؟؟ اللي يسمونه ستركشر .. لان هذا الزجاج سعره فوق الــ 2000 ريال للمتر انتبهوااا ...

:
:

كيف راح نركب ؟؟؟

انا اقولكم ...

لو ما عندنا عمال فنيين .. ممكن نجيب العماله من برا .. نروح لاي عمارة فيها عمال يركبون ونتفق معاهم ...

العماله عادة ياخذون المتر المربع كامل مع السقاله وتركيبها بحدود 220 ريال .. كامل المشروع

انت متفق مع المالك بــ 250 ؟؟؟ معناته مكسبك 30 ريال للمتر المربع

عادة واجهة المبنى كمتوسط مساحات توصل الي 500 متر مربع

لو ضربنا 500 م في 30 ريال بيطلع معانا = 15000 ريال ربحك بالعمارة كامله

شوف كم عمارة ممكن تتفق عليها بالشهر .. او شوف لو كان المبنى مساحته اكثر من 500 م

طيب لو العماله على كفالتي وما احتاج احد من برا ؟؟؟

هنا بيطلع معاك ربح المتر تقريبا حوالي من 80 الي 90 ريال للمتر الواحد

لو ضربنا المساحه 500 م * 90 ريال الربح = 45000 ريال هذا لو عمالتك تحت كفالتك

:
:

طريقة العقد مع المالك للمبنى او المؤسسة المنفذه :

طبعا بيكون فيه عقود بينكم توضح نوعية الكلادينج ( صناعته ) واللون المطلوب .. وطبعا دفعه اولى

50 % من قيمة العقد كامل ... عشان تقدر تمشي امورك وتشتري الالواح

و 25 % بعد نهاية الدور الاول مثلا ... و 25 % الاخيره بعد الانتهاء من كامل المبنى ...

:
:

خلونا اللحين نشوف بعض الملاحظات المهمه اللي ممكن تفيدنا بعملنا هذا :

1 / بأمكانك الان الاتفاق على مبنى كامل .. او التجربة الاولى على محل

بمعنى ان المحلات الان صارت البلديه تطلب منها تركيب كلادينج على وجاهة المحل

ياريت لو نبدأ بمحل عشان يكون تدريب لنا ومعرفة ادق التفاصيل بالعمل

2 / اعلنت جميع الامانات والبلديات ان محطات البنزين يجب ان تكون مكسيه بألواح كلادينج

بدلا من الرخام او الحجر او البويه ...

يعني الامر مفروض فرضا جبريا يعني مو بكيف صاحب المحطه

للمعلومية الان المحطات مساحاتها لا تقل عن 800 متر مربع ....

3 / اعلنت وزارة التربيه والتعليم ان يتم تكسيه جميع المباني المدرسيه التي يتم انشاؤها الان بألواح الكلادينج ..

والمباني القديمة يتم تكسيتها بالكلادينج في حال الترميم والتجديد

وان يكون لمباني مدارس الاولاد لون والبنات لون مختلف

الفقرة ( 2 ) و الفقرة ( 3 ) اعطت سوق الكلادينج قوة ودعم للتجارة بهذا المجال .... يعني سوقك مطلوب بدون تعب وتسويق ...

4 / امكانية التعامل مع وكالات الدعايه والاعلان لتركيب اللوحات على الكلادينج

الان معظم وكالات الدعايه والاعلان اصبحت تحتاج الي خلفيه من الكلادينج لتركيب اللوحه عليه

خصوصا لوحات الزنكروغراف او الحروف البارزة مثل الاستانلس تسيل او الحروف المضية او النيون

5 / الاستركشر او الزجاج سعره يختلف وياليت ما تدخلون بهالشغله .. الا بعد ما تكونوا عرفتوا السوق تمام المعرفة ...

للمعلومية معظم مؤسسات تركيب الكلادينج حاليا بالحجز ... يقولك احجز وادفع دفعه اولى وانتظر دورك

:
:

عشان ننجح بكل ما سبق ... ماذا نحتاج ؟؟؟؟؟؟؟ سؤال مهم وضروري جدااااا

نحتاج ذيب امـعـط

نحتاج أســــد ما ينام بالنهار .. يلف ويدور ويتابع شغله وعماله بنفسه

اما انه يتفق على شغل وبالاخير يرميه على العمال ويروح ينام ؟؟؟

بقوله من اللحين بليز خلك بالمدرجات وتفرج على الاسود وسط الميدان

الفكره مربحه جدااااااااااااا .. وعملها غير متعب كثير فقط متابعه وشوية ذكاء .. وصدق مع الله

اعتقد الفكره مشروحه بشكل كامل ..

لا يجي واحد يقول مافهمت ترى انتحـــر ..

موفقين لكل خير .... واسأل الله لي ولكم اجابة الدعوة ...

مع السلامة .... اخوكم

يعطيك العافيه فكرة ممتازه للشباب

اتمنى تدعم البنات بافكار جديده


وبالتوفيق للجميع

الله يرزق الجميع

ويبارك فيك يا اخويااا

ويسعدك

طيب لو بغيت ادرب لي عمال على تركيبها كيف ؟؟؟

يعني لو معي عمال فاضين بس يبغى لهم يتعلمون الطريقة ...

بارك الله فيك ودائما افكارك مميزة بس صعبة شوي

يسعدكـ ربي
فكره بالفعل ممتازه اشكرك يالغالي