عائله من عرض هالعوائل يدور بينهم هالحوار ..
=========================
( أ ) = لو سمحت ابي ميتين ريال
(ب) = وش تبي فيهن ؟
( أ) = خوالي مسوين دوريه وابي اشترك معهم
(ب) = اها .. طيب خوالك يستاهلون ... وصلة الرحم زينه .. هاك ميتين وهذي خمسين بخشيش 
========================
(ج) = السلام عليكم
( ب ) = عليكم السلام .. اكيد فيه شي..!! مهيب العاده تسلم بوجه مبتسم وبشوش !!
(ج) = ايدك على ثلاثميه ريال ظروري
(ب) = ليه ؟ ( كان قلبي حاس .. ان ورى هالابتسامه طلب )
( ج) = عيال عمي ماخذين استراحه وابي اشترك معهم بالقطه
(ب) = اها .. عيال عمك ونعم .. والوصل زين.. ونعين .. ونعاون .. رح لمخباتي تلقى خمسميه .. فكها ورجع لي ميتين ... لاتنسى مثل العاده ..
( ج ) = لالا شدعوه .. ماعليك .. وشكرا وماقصرت
( ب ) = العفو .. ولاعاد اشوف خشتك الا بعد ست شهور .. ( تجديد اشتراك الاستراحه ) والقطه الجديده ( هماه ؟)
==========================
رجع ( أ) إلى ( ب ) بس بعد اسبوع مو بعد ستة شهور وفتره تجديد الاستراحه !!
( أ)= اخبارك ( ب) ؟ عساك طيب ؟
(ب) = بخير .. اختصر وش عندك ؟!
( أ) = اذا معصب اقول لك بعدين وش ابي ..
( ب ) = لاعطني وش عندك الحين .. كم تبي ؟ 
( أ) = ميتين وخمسين .. بس وش دراك اني ابي فلوس .. 
(ب) = اها ميتين وخمسين ! طيب وش تبي فيها ؟! ودريت لانك ماصبحت علي لك اسبوع يعني من اخر مره عطيتك الميتين .. تذكر!
(أ) = غصب عني كنت مشغول .. وابي الفلوس ظروري .. عيال حاراتنا ماخذين استراحه وابي اقط معهم ..
(ب) = من عيال حارتكم .. مافيه الا اثنين وانت الثالث خذهم معك لاستراحه خوالك ...
( أ ) = لالالا .. مايبون خوالي احد غريب .. وبعدين حنا سبعه مو ثلاثه .. فيه اربعه من الحاره اللى حولنا مشتركين معنا . 
( ب) = طيب طيب ... خذ بطاقة الصراف ورح خذ اللى تبي ورجعها لمخباتي .. ولاتبطي 
( أ) = إن شاء الله ابشر .. وشكرا 
===========================
(د )= وانا ولد الشغاله !! ابي مثلهم 
.. اخوياي بالمدرسه مسويين دوريه اول خميس من كل شهر
( ب) = ياحليلكم .. قالبوووووش .. حتى انت بعد ؟!!
( د) = افا عليك انا اللى مخطط لها .. وملينا من البيوت ودنا نجتمع ونذاكر << مايعرف يقنع
( ب) = خير ان شاء الله .. تذاكرون ؟ طيب كم تبي انت وهالخشه
( د ) = خمثين ريال .. قصدي خمسين ريال بث .. اوووه قصدي بس
( ب ) = طيب سهله .. بس ترى ماتصيفون .. 12 كل واحد في بيته طيب ؟
( د ) = ولايهمك .. موافق .. شكرا
==================================
( ث ) <<< والدة كل من ( أ ) و ( ج ) و ( د ) وزوجة ( ب )
( ث ) = بالخير ياقلبي ... شلونك ... والله يانا ولهتن عليك ياخلف امي وابوي
( ب )
= الله يستر .. هالدلال شكله يبيله ( قرض ) يالله يكفي .. مهيب العاده كل هالكلام الزين من ( ث )
( ث ) = شدعوه ! طول عمري ادلعك بس انت منتب لمي
( ب ) = كم تبين ؟ 
( ث ) = ياشينك لاقمت تتميلح وتحرجني .... دامك ملزم .. الله لايهينك الفين 
( ب ) = سلامات !! مسويه حادث ؟ والا عليك مخالفات بالمرور .. اها بس مالك الا ربعهن ..! تبين خمسميه والا بصرتس 
( ث) = وانا عاد ابي شي لي !! كله لعيالك ولأمك .. ابشترك بدوريه مسوينها اهلك كل ربوع .. ( مع الوتر الحساس ) وإذا ماتبيني اروح بكيفك بس اخاف خالتي تزعل ( إن كيدهن عظيم )
( ب ) = حطيتيها بأمي .. وبعيالي .. طيب .. وكل الفلوس للدوريه ؟؟!
( ث ) = اجل تبيني اروح للدوريه بقميص البيت ( خلاقين )
( ب ) = لا طبعا ...... اقول : ( مافيك حيله ) دووتس الفين وفوقهن خمسميه شوفي شي للوالده من السوق
( ث ) = إن شاء الله .. ابشر .. تسلم يابعدي ( افلقني ان شريت لامك شي .. مالت عليك انت وامك )
=============================
صدفة ( ب ) شاف ( د ) بالصالة : وين اخوك ( ج ) .. وهو مسرع .. مدري مدري .. يمكن فوق نايم
( ب) يحمي السياره بالشارع يبي يطلع مشوار مهم شاف (ج ) معه شنطه ودخل البيت .. ويلهث .. ناداه .. وين رايح .. ؟ قال : رايح اغير ملابسي واطلع ثانيه مواعد عيال .. ( ب ) = طيب خاونا نبي نروح لجدك بعد مشواري ... (ج ) = لالا روحوا انتم انا مشغول .. وبدل الشنطه وغير لبسه وطلع وعلى ذيك الطلعه
( ب ) بعصريه يقراء جريده .. والبيت فاضي ! غريبة وين العيال وامهم !؟؟ وصدفة مر من قدامه البكر ( أ ) قال هلا بالبكر .. اجلس وعطنا علومك .. ( أ ) = مشــــــــغـــووووووووووول مره مره تكفى خلها بعدين .. ( ب ) = طيب اقعد تقهوى معي خمس دقايق .. ( أ ) = مااقدر مااقدر .. خويي ينتظرني بالسيارة برى .. ( ب ) طيب مااقطعك انت وخويك الله يسهل دربك .. بس وين اخوانك ( ج ) و ( د ) ؟
قال : مدري .. لي شهر ماشفتهم ( ب ) = اوف !! وامك وينها ( أ ) = مدري مدري .. خلاص مستعجل باى
=========================
(أ ) و ( ج ) و ( د ) و ( ث ) كلهم يطالبون مبلغ للدورية .. او للاستراحه .. والاستراحه تعني لقاء الاحبة والاقرباء والاصدقاء .. يعني يجتمعون فيها .. يتكلمون .. يسولفون .. يقضون اوقاتهم بالسوالف الجميله والمفيده .. وهي تعني التواصل والتلاحم .. ( هذا المفروض )
لكن ( أ ) و ( ب ) و ( ج ) و ( د ) و ( ث ) يقعدون بالاسابيع مايجتمعون على سفره اكل وحده !! تصوروا ؟؟؟
فمن يبحث عن اجتماع ودورية واستراحه يشترك فيها خارج نطاق الاسرة عليه ان يتواصل مع اسرته اولا .. وثانيا .. وثالثا .. ثم يفكر بالتواصل مع الاخرين
فالأقربون أولى بالمعروف ......
27-01-2008, 04:31 AM
العرض المتطور
