الأخوة والأخوات مدراء ومشرفين وأعضاء وزوار منتدى حلول البطاله
السلام عليكم ورحمة الله وبركاته ,,,, أما بعد
ها أنا ذا أعود إليكم بموضوع آخر ومشاركتي الثانيه ولا زلنا في سجال مع ما يسمى بوزارتي التربية والتعليم ووزارة الخدمة المدنية
طبعا أمس أسعدني خبر فتح المجال للمغضوب عليهم من المعينين على الوظائف الادارية بإدخال الرغبات المكانية ,, وبصراحه انا كنت في مشوار بالسياره بعيد شوي عن المنطقه اللي انا فيها وتلقيت اتصال من احد الزملاء يبشرني بهذا الخبر ،، طبعا ما صدقت خبر واتصلت على المدام اللي اوجه لها تحيه عطره من هذا المنبر ,, وقلت لها ( أبشرك فتحوا الرغبات المكانية ضبطي القهوة والحلى خلينا نختار الرغبات مع بعض ) وماشي بالطريق 180 خايف يتقفل النظام على حظي لأنه تعودنا على المفاجآت الكثيره والمتميزه منهم وصادني ساهر الى أن وصلت بحمد الله وسلامته . ودخلت على النظام ووصلتي رسالة على جوالي صراحة أي شخص فاهم في الحاسب الالي راح يتضح له اشياء كثيره اول مره اشوف كلمة سر كنها رقم هيكل سيارة مستخدمين _ وشغلات غريبه وربي تحسها مشفره ،، ماعلينا دخلت ابي أزين الرغبات واحصل قدام وجهي حصة جغرافيا اذا صح التعبير حاطين قدامي كل مناطق المملكة ويقولك رتب الرغبات وصدق المثل اللي يقول ( إذا بغيت تحيره خيره ) حتى يوم جيت احرك الرغبات وربي يديني نملت وانا ماسك الماوس بالقوه الرغبات تتحرك واستخدمت اكثر من متصفح عشان اقدر احرك الرغبات وطبيت في متصفح الشيخ قوقل ( لله دره ) قدرت احرك افضل من متصفح الاكسبلورر ,, المهم يوم خلصت ادخال الرغبات وسويت طباعه النظام ما صدق على الله وشاتني من النظام وقال راجع ادارة التربية والتعليم واطبع الرغبات وكنه يقول ( لا عاد نشوف خلقتك هنا مره ثانيه ) يعني بإختصار الواحد ماعنده مجال يراجع او يشاور نفسه يا تدخل الرغبات مره وحده او يتقفل النظام بوجهك ووقتها على ما قالوا ( تمص حمر ) على العموم انا تعليقي على قسم الحاسب الالي في وزارة الخدمة المدنية ووزارة التربية والتعليم وهذا نداء لكل شخص درس الحاسب الالي بالله عليكم هذا موقع يمثل وزارة ؟؟ واخص بالذات موقع وزارة الخدمة المدنية وربي انه قالب جاهز ومركبين عليه موقعهم صراحة شيء يفشل والا النظام اللي مسوينه في ترتيب الرغبات وربي لو احد درس في معهد كمبيوتر يمكن يضبط لهم شيء أحلى من كذا ,, نفسي اعرف من اللي موظف في قسم الحاسب عندهم ؟؟ وربي اتوقع انا او اي احد غيري من اللي تخصصهم حاسب وما حصل فرصه يمكن يبدع ويسوي لهم شيء احلى من كذا بكثير ,, لكن للاسف ضاعت الامانه ووليت المسئولية لغير اهلها ,,,

هذا ما حبيت اني اقوله والله يوفقنا وإياكم الى ما يحبه ويرضاه ,,

يغلق الموضوع ...........