السلام عليكم ورحمة الله وبركاته
اخواني لدي عدة اسئلة عن طريقة فتح مؤسسة وهل لابد من استئجار محل...او يكفي احضار عقد ايجار فقط...وهل استطيع فتح مطعم بمجرد فتح المؤسسة ام هناك فرق بينهما...وكذلك السجل التجاري...وماهي الاجراءات.
وهل استطيع فتح مؤسسة نشاطها مقاولات وتجارة عامة واستيراد وتصدير

نعم لازم تستاجر المحل على اساس يطلع مراقب البلديه يشوف المحل قبل ما تطلع الرخصه
جراءات استخراج سجل تجاري؟
التوجه لوزارة التجارة والصناعة واصطحاب المستندات التالية :

1- صورة دفتر العائلة أو صورة بطاقة الأحوال المدنية مع الأصل لكل من التاجر والوكيل المفوض ومدير المؤسسة مع تقديم ما يثبت المهنة من الأحوال المدنية.
2- صك ملكية أو عقد إيجار المؤسسة.
3- ترخيص من الجهات الحكومية ذات الاختصاص للأنشطة التي يتطلب مزاولتها ترخيصاً لها .
وبعد استخراج السجل التجاري يتم الانتساب للغرفة التجارية عن طريق فرع الغرفة بوزارة التجارة.

شـكرا لك على الفائدة..لكن هل هناك رأس مال معين لفتح المؤسسة...وهل يتم الاكتفاء بعقد الإيجار ام لا بد من تأثيثه

لازم تاثيثه انا فتح محل ادوات كهربائية نزل المراقب للمحل مرتين ويكتب المحل غير مجهز قلت انتو طلعو الرخصه وابشر من يعبي المحل قال لا اول تأثث المحل قلت كيف ياخي يمكن ااثث بعدين ما تطلع المواقفه والله ما طلعت الرخصة الين نزلت في المحل تقربياً 40000 كله ادوات كهربائية راس لمال تسجله في اوراق وزارة التجارة استمارات تعبيها وتحصل فيها راس المال تكتب 10000 او 20000 من جهت البلديه والغرفه التجاريه ما يطلبون تحديد راس المال بعقد الايجار اناقدمت

بعد اذنك اخوي عمر سهيل ....

فيه امور ما وضحتها للاخ .. يمكن غابت عنك وانت تكتب ... خلني اشرح له لو تسمح لي :

اولا : وزارة التجارة ( السجل التجاري ) :

وزارة التجارة تطلب منك عقد ايجار ... يعني لو جبت لهم عقد ايجار اي كلام راح يقبلوه منك

لان وزارة التجارة ماعندها احد يطلع ويتأكد ان المحل موجود او لأ ... هم يشتغلون فقط على ما تقدمه لهم من اوراق .

ثانيا : البـلـديــــــــــــه :

هذولا بالذات لازم تستعيذ من الشيطان الرجيم منهم وتقرأ المعوذات قبل تروح لهم ..

لازم محل فعلي وموجود ... ولازم تأثثه بأثاث مكتبي

مو لازم بضاعه لكن لازم اثاث ... لازم يقتنع مراقب البلدية ان المحل مجهز فعلا للعمل وليس محل وهمي لاستخراج تأشيرات واغلاقه فيما بعد .

( وقد تختلف البلدية من منطقة الي منطقة في طلباتهم ومن مراقب الي اخر )

ثالثا : الدفاع المدني : لا تنساه ياحبيبي ...

البلدية بعد ما يطلع معاك المراقب ويكشف على المكان راح يحولك على الدفاع المدني

وبيقولك جيب تصريح الدفاع المدني عشان نكمل باقي اجراءات الترخيص لك ...

يعني ترخيص البلدية مقرون بترخيص الدفاع المدني ...

الدفاع المدني راح يعطيك موعد مع مراقب عسكري بيمر على المحل ويكشف عليه ويطلب منك طفايات حريق وامور اخرى ...

انت بتجيبها وتيجب معاها الفواتير الاصليه لها .. لازم فواتير اصليه ... عشان تثبت انك اشتريتها فعلا وما جبتها من صاحبك تمشي الحال ...

بالنسبة لتسجيل رأس المال بالسجل التجاري كل ما قللت المبلغ كل ما نفعك فيما بعد بموضوع شهادة الزكاة والدخل .

بالنسبة لسؤالك :

هههههه اي والله البلدية طيب الغرفه التجاري ووزارة التجارة والدفاع المدني كلها يطلبون عقد وان فاتح محل ابشتغل ماني ابلعب ما ادري عن الاخ يمكن نيته ثانيه

لا اخوي عمر .. الغرفة التجاريه ما تطلب منك عقد ايجار .. تطلب منك السجل فقط ....

الدفاع المدني : اصلا ما يطلع الا بعد ما يطلع مراقب البلدية ... ومراقب البلدية ما يطلع الا لما يكون عندك محل

فتلقائيا الدفاع المدني لازم يكون عندك محل ...

شوف اخوي عمر ...

انا كتبتها من اول وقلت البلديات تختلف من منطقة الي منطقة اخرى بل انها تختلف بطلباتها وهي بنفس المدينة الواحده

وكمان تعتمد على مزاج المراقب ... ان ربي طيحك بمراقب لئيـــم .. عــز الله انك بتحسب النجوم تالي الليل ...

وان ربي طيحك بمراقب حليل .... فأمك داعيه لك بصلاة الفجر ....

وفكلا الحالتين ما راح تسلم من البلدية .. ياعليهم اساليب تعذيب وتطفيش ولا اساليب سجن ابو غريب ...

الله يحلل القذافي عند ولــــده ....

عندنا بالموعد تقدم الاوراق يشوفها لك كامله سجل لك موعد الله يسر امورنا وامورك

الصراحة كلمات الشكر ماتقدر تعبر عما في نفسي للأخوين عمر سهيل وموسيقار...جزاكم الله خير...
بس ممكن تساعدوني في انواع الأنشطة التي ممكن اضعها حتى ما ارجع ثاني مرة لهم...يعني مثل مطعم..منجرة..حدادة..بقالة..أي شيء ممكن يخطر ببالكم حتى يساعدني...
لكن لو كانت مؤسسة مقاولات وخدمات تجارية واستيراد وتصدير..و..و..و..إلخ.
هل اكتفي بوضع مكتب واحد او عدة مكاتب لكل وحده مكتب يعني للاستيراد والتصدير مكتب وللمقاولات مكتب.
الامر الآخر انا موظف حكومي..ومهنتي طالب إلى الآن ماغيرتها هل اقدر اطلع مؤسسة باسمي او لا؟
وإذا كان ممكن لكن اكتشفوا لاحقاً اني موظف ماهي العقوبات المترتبة على ذلك, لأني اخاف يدمروني
ولو خليتها باسم اخوي هل اقدر اسجل اسمه في التأمينات على انه موظف سعودي او لازم اجيب شخص آخر غير اخوي ثاني.