السلام عليكم ورحمة الله وبركاته


اهلا وسهلا بكم ...

كفايه تعبت ارحموني ..


ارجوكم تكفون حسو فيني والله العظيم انا تعبت ارحموني ربي يرحمكم

انا انسانه لي مشاعر واحاسيس وعواطف ا نا مو حيوانه انا ادميه .

ارحموني ربي يرحمكم دنيا واخره ليه تتعاملون معاي كذا شنو سويت

انتم دمرتوني ايه والله انتم انتم يا اعز الناس انتم يا هلي انتم

يا امي ويا ابوي ويا اخوي


حرام عليكم والله حرام انا مو بهيمه ليه اهملتوني ليه دمرتوني ليه اشعرتوني ان مالي قيمه

ليه خليتوني بكيفي ليه ما وقفتوا في وجهي ليه ما عاملتوني بطيبة الاب وحنان الام ووقفة الاخ .


ليه اسئلو انفسكم وبعدين حاسبوني انتم السبب انتم ومحد غيركم


انتم الا عطيتوني ريموت التلفزون وخليتوني بكيفي

انتم الا اعطيتوني المسجل واستمع للاغاني

انتم ما راقبتم صديقات وماعرفتوهم وماعرفتوا اخلاقهم


انت يا ابوي مشغول عني وتعصب علي ....

وانتي يا امي مشغوله عني مع الجارات والتلفون ...

وانت يا اخوي تمد يدك علي وتضربني ...

انتم الا خليتوني اطلع من البيت بكيفي
انتم الا خليتوني اطلع الاسواق لحالي

انتم الا عطيتوني جهاز محمول او مكتبي ومارقبتوني واهملتوني وما تدرون وش انا اشوف



انتم انتم انتم السبب


والان يوم وقعة تتخلون عني وتبون تذبحوني وتتخلون عني لاني اصبحت بصمة عار

ليه لاني تعرفت على شاب عطاني الحب والاحترام واشبع رغباتي بالكلام المعسول
والان يوم مسكوني بخلوه مع شاب بتتبرون مني وصرت عار


اخوي حق غزل ومعاكسات بنات ويجي يضربني


وابوي لاهي عني وامي بعد ...

منوا لا دمرني مو انتم مو انتم الا خليتوني وحيده وعندي رفيقات سوء

ليه خليتوني اشكي همومي لغيركم ليه ما سمعتوني ليه ليه ليه

الان عار ( اه اه اه ) صحيح اخطيت وخطا كبير بس ربي غفور رحيم

الله يغفر الذنوب جميعا

بس انتم تركتوني بالسجن ولا زرتوني لان قبض علي مع شاب اخوي يتوعد يذبحني

وما سال نفسه اخوي الا كم مره اكتشف ان له علاقه محرمه

والا هو له حلال وانا علي حرام وبصمة عار


ارجوك يا ابوي تعال وشوفني تعالي يا امي وظميني لصدرك واعطيني حنانك تعال يا اخوي ..

وخلك سند لي بهالحياه . انا غلط صحيح بس ربي غفور’ ابيكم تحبوني وتعلموني ابيكم بجنبي ..

لا تقولون صرت كبيره بس انتم حرمتوني حبكم وتعاملكم الطيب الا كل فتاه تبي الحب والعاطفه

من اهلها لو وجد ذا عندكم والله ما يضحك علي شاب ولا يستدرجني افهموني وارحموني


ابوي – انا احبك كثير بس تعامل معاي احسن من كذا لا تهملني وتجرحني


امي – اعطيني من وقتك شوي وسولفي وياي انا كبرة بس ظميني كطفله



اخوي- انت املي انت سندي, لا تضربني ,ولا تجرحني ,ولا تتحكم فيني, اخدمك بعيوني طلعني
مشيني حسسني انك اخوي ومسئول عني اضحك وسولف وياي ارجوك انا اختك ياخوي



اه اه اه

حال بعض الاخوات ربي يكون بعونهم الاهمال الاسري والعائلي يسبب الانحراف
اذا كان الاخ يضرب اخته وما يتعامل معاه بافضل معامله والاب والام اهمال بالله عليكم
ماراح تكون لهذه الفتاه حاله نفسيه وتعب والم


في احد البرامج
عرض قصة شاب انحكم على اثنتين من اخواته سجن فتره وراح الاب يطلعهم فاتى الاخ واطلق عليهم النار


الحاله الثانيه
فتاه يقبض عليها ويتصلون هيئة الامر بالمعروف والنهي على المنكر على ابيها قال والدها
انا راح اجي ولما اخذها لا تقولوا لي انكم مسكتوها مع شاب قولوا لي ان لموزين تعطل وجت عندكم واتصلتوا فيها سالوا الاب وش سر هذا التعامل قال بنتي غلطة واذا علمت الحقيقه سوف تكون مكسوره فسبحان الله التزمة الفتاه هذا هو الاب الحقيقي


لكل رب اسره اقول له حط اهلك بعيونك
لكل اخ حط اخواتك جوه عيونك
اللهم احفظ بنات المسلمين من كل سوء واهدي شباب المسلمين يارب العالمين



بقلم

اخوكم القلعه التجاريه - كتبته في منتدى اسلامي قبل فتره واحببت انسخه لكم