السلام عليكم ..

من المعلوم ، انه بالإمكان نسخ أي منتج و عمل مثله بالضبط في بعض الدول.
السؤال هو ..

يوجد لدي منتج و هذا المنتج غير متواجد حاليـًا في السوق السعودية ، و واثق باني اول من ياتي به للسوق ، و لكن يعيب هذا المنتج أنه سهل النسخ .. أي انه بمجرد أن ياتي صاحب تاجر ذو خبرة بالسوق ، بإمكانه بخبرته و علمه نسخ هذه السلعه ثم إغراق السوق بها ! و ياخذ الفكرة ( باردة مبردة )


هل يوجد استراتيجيات تحمي سلعتي ؟ او على الاقل تحد من عملية أغراقه لكي اتمكن الخروج باكبر عائد؟

على سبيل المثال .. ابتكرت قلم (مثلا) .. و لكن يعيبه انه سهل التصنيع .. يعني بمجرد أخذه للصين تقدر تنسخ منه !! هل عندكم استراتيجيات ( للحد ) من استغلال فكرتي لكي اخرج باكبر عائد ؟؟



بالتوفيق

السلام عليكم :
يوجد نظام يحميك ولا يوجد ؟ تقول لي كيف اقول صبرك علي .....
يوجد نظام حماية الحقوق الفكرية ، وهذا لحماية حقوق مثل الشعار والتصميم والاعمال الفنية والشعر وأشياء من هذا القبيل ...وهذا تقدر تطلع عليه بقوقل ..اكتب نظام حماية الحقوق الفكرية...بس اذا دخلت بمشكلة وتبي تثبت حقك وتاخذ تعويض يبي لك صبر ايوب وسنين يوسف في السجن وبعد خروجه وذكاء اياس ودهاء عمرو ...
اما للسلع والمنتجات فلا حسيب ولا رقيب ولا احد يحمي حقوقك ولا فكرتك والدليل شوف البلد مليان بضائع مقلدة لماركات عالمية.....

طيب تقول لي والحل مع فكرتي اللي تكسب ذهب ؟
اقول لك الحل...
اذا كانت الفكرة ناجحة وخطيرة فالناس أكيد بتقلدها بسرعة الصاروخ...

طيب وش تسوي ؟
اضرب ضربتك واطلع...

كيف؟
بدال ما تستثمر فيها عشرين الف وتكسب خمسين الف...

استثمر ميتين الف واكسب سبع مية الف...وقول باي باي وشف لك مشروع ثاني...
لانك لو فكرت تكررها بتلقى السوق مليان ويمكن ما تقدر تصرف بضاعتك...


اتمنى لك التوفيق

طيب ليش ما تعرض فكرتك على صاحب شركة
بماقبل و قدره و بكذا راح ترتاح من التسويق و بنفس الوقت
تضمن حقك

بارك الله فيك يا الحارث و يا تاجر مبتدئ .. لكن يا حبيب قلبي المشكلة أن الواحد ما عنده سيولة كبيرة مرة علشان يزود السلع.
إضافة لهذا الشي .. إني ما ودي علطول انزل كل الي عندي في السوق .. أبي انزل على خفيف و أشوف ردة فعل السوق ...

ممكن توضحين يا ام العبادل ؟؟

-


عليكم السلام والرحمه ..

شلون نظام حماية الحقوق الفكريه وهو جايبها من برا ؟
الصراحة صعبه ، لانه حتى الماركات العالمية يعانون من هالشي
ممكن تعتمد هنا على جودة المنتج حتى لو بيتقلد بعدين المستهلك بالنهايه يهتم بالجوده ، على ان حتى هالحل مايحمي بس بيساعد شوي .

بالتوفيق .

الله يوفقك ويرزقك ماتتمنى واكثر

بالتوفيق للجميع


.

البزنس مبني على الثقه ..
اذا كنت تشوف ان فكرتك مميزه جدا بس انت ماعندك راس المال .. ممكن تخبر من تثق فيه ويملك راس المال ..

وانا مع كلام الحارث بن همام .. اضرب ضربتك و اطلع

تحيتي

اخوي مقبل شوف
على ما ينتشر المنتج و يصير عليه اقبال و يطمع فيه من يطمع و بروح يقلده تكون انت بعت و انعرفت بهذا المنتج
بالعربي رح تكون متقدم خطوة عن من يريد تقليدك
و حاول كل مرة تطور فيه شي جديد بحيث الناس تترك القديم و تقبل عالجديد

و الارزاق من رب العالمين ولا تظن ان المنافسين شئ سيئ لك بالعكس هذا ينشر منتجك اكثر و يساعدك تطوره

طبعًا تستطيع اخذ وكالة من الشركة لكن الصينيين ما يعترفون بوكالة ولا حقوق فكرية

الله يوفقك .

السلام عليكم ورحمة الله وبركاته للجميع

أخ مقبل على الدنيا وينك ياخوي عن بعض مواضيعك ليش تشغل الناس معك وتتركها وكل شوي تطرح موضوع وفكرة جديدة ورايكم وشوركم وو..وهكذا؟!! , والا الشغلة هواية مثلا؟

عموما من خلال قراءة سريعة لكتاباتك يصبح واضح للقارئ أنك من النوع كثير التنقل بين الافكار كثير التفكير كثيرالتردد قليل التنفيذ وهذا لاينفعك أبدا , فنصيحتي إن أردت نصيحتي أن تنتقي فكرة أو مشروع معين وتركز عليه ..تدرسه جيدا..تستشير أهل الخبرة ثم تبدأ متوكلا على الله ولاتنتقل للتفكير في بديل له الا اذا ثبت لك عدم جدواه من خلال الدراسة والاستشارة أما البقاء طويلا على موجة (( وش رايكم )) فلن يوصلك لأي ميناء.


تمنياتي لك وللجميع بتوفيق الله تعالى .