|
شراء وبيع السيارات المستعمله ( شريطي) مشروع ذهب
يعتقد الكثير أن شراء وبيع السيارات المستعمله تحتاج إلى خبره طويله ومعرفه ... وفي الحقيقه الأمر عكس ذلك تماما.....كل مافي الموضوع انك تحتاج إلى شوية تعليم وتأني <<< ركز على الأخير وانا صراحه نزلت الموضوع هذا لعدة أسباب: اولا اني بعد ما دخلت هذي التجاره شفت فيها ربح جيد جدا ينفع للموظف وللعاطل وأحسن مافي الموضوع ان السياره ما يبي لها مصاريف يوم الواحد يشتريها بغرض التكسب فيها ... يعني لو توقفها شهر او شهرين ماراح يضرك هالشي.... ثانيا ان اغلب الي يبيعون في السوق اجانب ويشتغلون لأصحاب المعارض ..... تحصله جاي له شهر او شهرين وتشوفه معلم في الشغله يسوم السياره منك ويبيعها عليك ........ وثالث شي قلة المواضيع الي تتكلم عن التجاره في السياره...... انا قبل ما ادخل هالمجال والله يا اخوان تعبت وخسرت اكثر من مره لين قدرت اوقف على رجلي وللأسف اخوانا السعوديين الشريطيه تلاقيهم اذا مثلا ما يعرفونك ولا راح تنفعهم مستقبلا ..... ما يعلمونك الطبخه.... مدري هو خوف مثلا انك تاكل الجو عليهم او لأي سبب كان.......... المهم انا قررت اني انزل هالموضوع واتمنى انه يستفيد منه الشباب وخصوصا العاطلين عن العمل ...... والله ياشباب ان الموضوع سهل بس يبي له شوي تعليم على شوية صبر واهم مافي الموضوع ان الشخص يكون مفتح ومايفكر نفسه انه اذكى شخص.... لازم يحط في الحسبان ان جميع من في السوق اذكياء وفاهمين ...... واهم شي (ان الشخص يكون يخاف الله ) ... والله يا اخوان على كثر مافي هالتجاره فلوس على كثر ماهي هم وغم على صاحبها... ياما شفت ناس يمكن يطلع مكسبه في اليوم او اليومين بالآلآف بس والله ما تحصل معاه ريال...... اهم شي انك تراقب الله سبحانه وتجتهد.... وصدقوني ان الي راح يتعلم ويفهم السوق ما يحتاج يغش الا في حاله واحده الي هي ( الطمـــــع) تحصل الشخص من كثر مايشوف من الفلوس يصير يطمع الين ما يصير كذاب وغشاش ولا حول ولا قوة الا بالله........... عموما ما ابي اطيل عليكم ..... شرطي الوحيد هو الدعاء لي ... والدعوه في ظهر الغيب مستجابه...... واتمنى من كل من يقرا موضوعي انه يدعي لي بالتوفيق..... وانا راح انزل الموضوع على مراحل واذا شفت في تفاعل راح اكمل .... لاني ما ادري يمكن يكون الموضوع ما ينال استحسانكم فأوفر على نفسي وأوفر عليكم......... وأنا حاضر لأي استفسارات والشخص الجاد راح اوقف معاه ألين ما يوقف على أرجوله لوجه الله سبحانه... ومحاضرتنا هذي تنقسم إلى نظري وعملي.... النظري راح اعطيك اياه واذا فهمت يبقى عليك العملي الي هو الذهاب إلى المعارض وتطبيق ما تعلمته واذا شفت انك فعلا طبقت صح معناتها انك فهمت الشغله مضبوط وبإذن الله راح تشوف الأرباح.... واحلى مافي الأمر ان الموضوع مايحتاج رأس مال كبير .... ممكن تبدا بملغ صير جدا ويتضاعف معاك على بركة الله أولا : يجب ان تعلم ان سوق السيارات ( المعارض) ينقسم إلى عدة فئات وهي كالتي: 1- فئة يريد البيع بأسرع وقت: وهذا تقريبا يشكلون 50 % من السوق (وهي الفئة التي نبحث عنها) 2- فئة ليس مستعجل على البيع: ويشكلون تقريبا 30% من السوق (تحتاج إلى شريطي محترف) 3- فئة تشتري وتبيع في السيارات ويشكلون تقريبا 20 % من السوق (الي انت منهم) طبعا الأحصائيات الي فوق غير دقيقه لكن من ملاحظتي في السوق والأرقام الي تمر علي . طيب يجي واحد ويسأل يقول كيف انا اميز بين الفئات هذي؟....... أقوله ماعليك ياحبيبي انت بعدين اذا جيت تطبق العملي وجلست فتره في السوق راح تتعرف على الوجيه الي تجي دائما وراح تعرف الي يبي يبيع بسرعه والي مو مستعجل..... سبحان الله في قواسم مشتركه ... ماعلينا مو موضوعنا اهم شي انك تحط الفئات الثلاثه السابقه في مخك طيب نجي لنقطه الثانيه: الشراء والبيع في السيارات ينقسم إلى قسمين: شراء سياره رديئه وإعادة تجديدها ( تحتاج إلى محترف ) شراء سياراة حالتها مقبوله ( تحتاج إلى معرفه قليلاً) شراء سيارة نظيفه ( هذي الي نبحث عنها ) وهي اسهل قسم ولا يحتاج إلى تعلم وهي الي راح تبدأ إلين ما تشوف نفسك صرت فاهم بعدين تنتقل إلى المرحله الثانيه ومن بعدها الثالثه...... طيب بما ان السيارات النظيفه هي الي نبحث عنها خلوني اصنف لكم السيارات النظيفه على حسب السوق وهي كالتالي: سيارات نظيفه سيارات نظيفه نظيفه سيارات ورده سيارات مخزنه طبعا بغض النظر عن الممشى في الثلاث تنصيفات الأولى والممشى يفرق فيها من خمسين الف كيلو يعني ممكن تزيد من ثلاث إلى أربعة آلاف طبعا المخزن سعره لحاله ما يلتزم بالسوق طيب خلوني اقول لكم وش اهم شي في السوق اهم شي في السوق العرض والطلب....... بغض النظر عن الموديل......... طبعا هذي النقطه مو لازم تعرفها لأنك مع الوقت والممارسه راح تعرف ايش النوع الي مرغوب بس ضروري تحطها في بالك ثاني شي مهم هو موديل السياره اذا كان الرغبه في النوع ككل وليس في موديل عن موديل مثال ( الكابرس موديل 89 يفضلونه على موديل 90 ) هنا قلنا الفارق في الموديل ومثال ثاني ( الكامري من موديل 2001 إلى 2003 مرغوبه مثلا اكثر من 2004 وطالع) ...... لكن مثلا نقول ان الكوريلا مرغوبه بشكل عام ( أذا هنا يحكمنا الموديل يعني كل سنة موديل جديده راح يزيد المبلغ عن السنه الي قبلها) طيب خلونا ننتقل إلى المفيد والأهم من هذا كله وهو (مين الي يحدد سعر السوق) طبعا الي يحدده هم الشريطيه الكباره الي لهم علاقه بالمعارض...بس هالشي انت مايهمك...... الي يهمك شي واحد..... انك تكون عارف أسعــــــــــار الســــوق وهذي اهم نقطه في الموضوع والي راح تبني عليها نجاحك وربحك واحذر ثم احذر ان تعكس الترند (اتجاه السوق) ويجب انك تكون عارف بسعر السوق اول بأول مو مثلا تجي لسوق اليوم وتجلس شهر ثم تطب السوق على بالك ان السعر واحد وتشتري بغالي ثم تتوهق ترا الأسعار تختلف من شهر لشهر ....ويمكن من حدث إلى حدث......وهذي الأشياء راح تتعلمها مع الوقت يعني لا تشيل همها ولو تجلس بس اسبوع في السوق راح تحس انك فهمت بس طبعا ضروري تفهم الجانب النظري لأنك اذا مافهمت الجانب النظري الي راح اقولك عليه راح تتعب كثير في السوق ويمكن تخسر كثير الين ما تتعلم لكن بإذن الله اذا فهمت الجانب النظري وعرفت نظام السوق تصير نسبة الخساره ضئيله وحتى وإن خسرت فراح تكون بسيطه جدا.......... طيب الشي الي راح ننتقله بعد ذلك يجب ان تعلم ان السعر يتم بناء على أربعة أشياء في السياره 1- المكينه ( تقريبا 35% من السعر) ويمكن اكثر على حسب المكينه وتوفرها 2- القير ( تقريبا 30 % من السعر) ويمكن اكثر على حسب سعر القير وتوفره 3- البودي ( تقريبا 25% من السعر) ويمكن اكثر على حسب قوة الصدمه 4- قطع الغيار ( 10 % من السعر ) على حسب أسعار قطع السياره وهذي الأربع اشياء مهمه جدا جدا عشان تقدر تسوم تثمن السياره او ما يسمى ب(السومه)رجوعا إلى سعر السوق الي قلنا عنه في البدايه وعشان بعد ما تنغش ولا حد يقدر يمشيها عليك وترا الحين ولله الحمد في كمبيوترات تفحص المكينه والقير والبدي وجميع القطع يعني مافي خوف وإذا عجبكم الموضوع وشف في تفاعل راح اكمل أشلون تتعلم الجانب النظري ووين تروح وكيف تعرف اسعار السيارات ....... واتمنى منكم الدعاء لي وتمنياتي لكم بالتوفيق |
مـــا شاء الله ....مشروع بــبيع السيارات المــستعملة ( الشريطية ) مـــربح إن شاء الله ,,لكن يحتاج إلى خبرة ومـعرفة ,,,
شـــــــــــكراً لكـ ,,, |
الله يجزآآآآآآآآك خير والله مشرووووووووع ارباحه دبل بس المهم الي قلته الواحد يخاف الله فالناس
ورزق الحلال حتى لو قليل فيه بركه انا اصوت لك تكمل لنا وتفيدنا بخبرتك وجزاك الله خير |
اقتباس:
الموضوع يحتاج إلى تعليم مثله مثل اي سوق اخر |
اقتباس:
وبإذن الله راح اكمل بس خليك قريب تحياتي |
كمل الله يحقق جميع اللي في بالك وبال جميع الشباب والأخوات المحتاجين ويجعل نصايحك بميزان اعمالك يوم لا ينفع مال ولا بنون الا من أتى الله بقلب(ن) سليم
على فكرة انت من أي مدينة؟؟؟ عشان نكون على بينة ومعرفه بموقع المعارض التي تتحدث عنها نحن بانتظاااااااااااااااااااااااااااااااااااااااارك |
ماشاللة جزاك اللة خير
وكمل احنا بانتاظرك وياليت تقولنا عن الراس مال من المعرض واشتري السيارة والربح بالنص تنصحنا في هذي شـكرا لك وبارك الله فيك... لك مني أجمل تحية . |
والله فيها رزق كبير جدآوالمشكله انها قريبه مني(معارض الدمام) بس يبيلي سياره او راس مآل عشان ابدأ ...
السيارات المرغوبه الكورلآ..الكآمري..الترسل..الصني..الددسن..الهآيلوكس ...الآكسنت..الآنترآ<< اسعارها رخيصه من (6الآف الى 25الف) ويشترونها اغلب السعوديين والآجآنب بشكل عآم لآن الآغلب الشعب دخلهم متوسط ..وشرآيك بآلكلآم هذا ؟!! ووش تنصحني كـ بدآيه ليِ وللمعلوميه معارض الدمام اعرف محلات الفحص وناس شبه شريطيه ومضبطهم :q والله يعطيك العافيه ع الموضوع الشآمل وبآرك الله فيكِ :h |
ألف شكر لك أخوي ,,
بالفعل شغل السيارات مربح ,, لكن يبي له واحد خبير وفاهم السوق ,, هناك فئة من الناس يشتغلون على سيارات تويوتا الصالون والجيب والهايلوكس ويجدون فيه أرباح ,, لكن هناك أشخاص اعرفهم جيدا تميزوا في السوق وأصبحوا من كبار الشريطية أكثر عملهم هو البيع بالآجل ,, يعني يبيعك السيارة على أن تسدد خلال 3 أشهر أو 6 أشهر ,, بربح عالي جدا ,, وطبعا ما يبيع إلا على ناس يعرفهم أو يكفله شخص يعرفه ,, طريقة بيع أظنها مجدية بشكل كبير جدا ,, بالتوفيق للجميع ,, |
ما شاء الله عليك
الله يرزقك ان شاء الله * استمر بارك الله فيك* |
ماشاء الله عليك .. الله يرزقك .
كمّل الموضووع .. وصرااحة ودّي اشتغل بالمعارض بس ما اعرف شيء ولكني استفدت من موضوعك كثير وعندي سؤال لو ابدأ كم يكون راس المال علما اني الدخل محدود.. وشكرا |
كـــــله الشريطيه ماعندهم ذمه والله
بالتووووفيق لك يالغلا |
أخوي أوم الحاله ماشاء الله عليك واسأل الباري ان يرزقنا ويرزقك بالحلال
والله الفكره تدور براسي لها شهرين بيع وشراء السيارات وكل جمعه انزل الحراج اطقس الاوضاع واشوف السوق وعندي بعض الإستفسارات وفيك الخير والبركه تفيدنا كم يحتاج راس المال حتى ابداء . وش افضل والي فيها مكاسب حلوه ولها زبائنها تمشي من انواع السيارات وياليت تحدد الموديلات المرغوبه. سمعت من شريطيه ان السيارات في بعض مناطق المملكه تكون رخيصه وتبيعها في مناطق اخرى تكون مرغوبه واسعارها مرتفعه شويه ايش رائيك في هالنقطه. في خلال الشهر تقريباً كم تشتري سياره وخلال كم تبيعها والمكاسب الشهريه تقريبا. ولك وافر الشكر والتقدير |
[align=center]
الله يجزاك خير موووضوع و لا احلى اتمنى تكملـــــــــــه وتجيب على استفساراتنا هذا المشروع الي بنفذه ان شاء الله في بالي من سنتين تقريبا والان فضيت له وبأذن البدايه قريباا استفساري بارك الله فيك : 1_ على كم يكون تركيزي على 3 انواع من السيارات واعرف اسعار كل موديل او ايش الافضل ؟؟؟؟؟؟؟ 2- وش رايك لو احدد سعري بعد الشراء على حسب سعر السياره ((بالمعارض)) يعني اشوف مثل سيارتي بالنظافه و اعرض بنفس السعر او احدد مثلا كل سياره اعرض بــــــــــ زيادة 2000 او كم ؟؟؟؟؟؟؟؟؟؟؟ 3- وش رايك في الشراء من تحت المكروفون؟؟ 4- كيف اجراءات البيع والشراء مدري فيه نقل ملكية وتأمين ........ من يتحملها انا او صاحب السياره ياليت لو تكتبها كلها و بكم كل وحده ؟؟؟؟؟؟؟؟؟؟ 5- وش رايك في البحث عن سيارات غير مرغوبه ورخيصه في مناطق وبيعها في مناطق مرغوبه عندهم ؟؟؟؟ آسف على كثر الاسئله والله يرزقك من حيث لا تحتسب ويوفقك في الدنيا والاخره [/align] |
يعطيكِ العآفيةَ يرآعيَ الموضوعِ ’’ موضوعكِ مكسبةِ مدبلَ وخسآرتهِ قليلةِ آللهَ يجزآكِ خيرَ ’’
3 نصآئحِ لكمِ يآخوآنَ ، 1- لأتشتريَ سيآرةِ منَ شريطيَ يعنيَ لأصرتِ اشريطيَ لأتشتريَ منِ شريطيَ مثلكِ حتىَ لوِ هيَ نظيفةَ ، لأنِهمَ يحبونَ يضحكونِ علىَ بعضهمَ ويمسكونِ عليكَ آيَ شيَ ، و80% ذمتهمِ بجيوبهمَ ويحلفِونَ كذبَ منِ الطمعَ .. 2- لأتضمنِ آحدَ آوِتشتريَ سيآرةِ ويقولكِ بكرآِ اجيبَ لكِ آلأستمآرةِ وآلأورآقَ ، لأنِ خويئِ شريطيَ ، ويقوليَ دآيمِ تنبآعِ سيآرآتِ بعضهِآإَ مسروقةَ ولأِ عليهآَإ قضآيآِ ، مثلِآِإ ، رآعيَ السيآرةِ مطلوبَ بديونَ .. تحجزَ عليكَ السيآرةِ ويمكنَ تروحِ عليكُ .. 3- لأتبيَع آوِ تشتريَ مكروفونِ ، لأنهمَ دآيمَ يبخسونَ آلسعرَ لأجيتِ تبيعَ ، ويغلونِ سعرِ السيآرةِ لأجيتَ تشتريَ ، ويطلعونِ عيوبَ الدنيآِإ بسيآرتكِ .. وسلأمتِــ،ـكمُ ، وآليَ بيكسبَ خبرةِ ميحتآجَ يروحِ المعآرضَ يومِ الجمعةَ وبيتعلمِ آنِ شاءِ اللهَ .. |
والله مشروع ناجح بس راس المال يحتاج على شان تضمن نفسك زين
|
[align=center]
ما شاء الله شرح موفق ,,, بارك الله فيك اخي الكريم ـــــــــ =========== واصل فنحن متابعون [/align] |
اقتباس:
الله يجزاك خير ومشكور على الدعوه الجميله وأنا من مدينة الرياض وعلى فكره النقاط الي ذكرتها تشترك فيها جميع المعارض الإختلاف بينها يكون فقط الطلب على انواع معينه من السيارات لكن باقي النقاط مثل فئات السوق وتحديد اسعار السيارات تكون مشتركه حتى في الدول المجاوره مثل الإمارات تابع معاي باقي المحاضره وراح تفهم بإذن الله |
اقتباس:
حياك الله اخوي رأس المال كما ذكرت سابقا انها لا تحتاج لرأس مال كبير قد ما تحتاج إلى انك تشتري النوع المرغوب من السيارات وحتى لو الموديل قديم بس اهم شي النظافه ومافهمت عليك ايش تقصد الربح بالنص انت تابع باقي المحاضره وراح تستفيد |
اقتباس:
اخي تجارة السيارات المستعمله لا تعتمد على رأس المال قد ما تعتمد على الذكاء والصبر ووقت الشراء والبيع...... ممكن تشتري سيارة بـ 5000 ريال تبيعها بـ 10000 ريال يعني مكسب 10% بينما ممكن تشتري سيارا قيمتها 40 ألف تبيعها بـ 42 ألف !!......... اذا هنا يحكمنا شي واحد انك تصير تعرف متى تشتري ومتى تبيع وتكون واثق من سيارتك لأن في اشخاص يجون يعيبون فيها عشان يطيح سعرها .... فأنت تابع معي باقي المحاضره عشان تستفيد ولا تستعجل وركز على الأنواع المطلوبه في السوق |
موفق بإذن الله ... لك مني أجمل تحية .
|
اقتباس:
فعلا السوق فيه ربح لكن اختلف معاك انه يكون خبير....... انا بدأت في السيارات وماعندي اي خبره لكني كنت مفتح وعرفت نظام السوق فقط....... وماجلست تقريبا 4 شهور الا صرت فاهم الطبخه السوق درجات فيه مبتدأ وفيه خبيره وفي محترف وفي شخص عنده ذمه وفي شخص طماع حنا راح نعطيكم الأساسيات الأولى عشان تصير مبتدأ وانت مع الوقت راح تصير خبير..... والي قصدته انا ان السوق لا يقتصر فقط على الخبراء مثله مثل اي مجال آخر |
اقتباس:
|
اقتباس:
بقدر ما يتحاج الى صبر وتأني ويمكن تبدأ حتى بـ 3000 الآف اذا انك فهمت الشغله تابع معنا وراح تستفيد اكثر |
اقتباس:
وحنا هدفنا من هالموضوع انا نخرج اكبر عدد من الشباب يكون عندهم ذمه ويخاف ربه والإصلاح مطلوب في جميع المجالات ...... وللأسف سوق السيارات صار حكر على مجموعه معينه وعلى قولهم الطيور على اشكالها تقع......... وللأسف يجي واحد او اثنين ويخربون على الباقي وهذا الشي للأسف يعطينا فكره خاطئه خصوصنا حنا يالعرب لأنا دائما نبي على الإنطباع الأولى وحتى انت مثلا لو يصير بينك وبين شخص موقف وجيت تتكلم عنه تذكر قبيلته ولا تذكر اسمه وهالشي الي صاير بالضبط مع شريطية السيارات لو يغشك واحد منهم على طول تروح تقول والله شريطي غشني حتى ساد المفهوم ان الشريطي هذا انسان مايخاف ربه وغشاش مع ان الغش حاصل في كل تجاره ويمكن في السيارات بشكل اكبر وذلك بسبب جهل الناس الي بالسوق بعضهم حتى ما معه الإبتدائيه ولا يعرف شي او تحصله يماني جاي تهريب ولا يعرف شي في الدين ........ لكن نطمح ان شاء الله ان يكون من بيننا شباب يمتهنون هذا الشي ويطبقونه على اصوله ................. تحياتي |
اقتباس:
رأس المال تكلمت عنه سابقا وقلت لا يحتاج الى رأس مال كبير ممكن تبدأ بـ 3000 الآف وومكن تبدأ بـ 50 ألف والأفضل من 15 الف ألين 25 الف كبدايه وبالنسبه للأنواع الي عليها طلب تختلف من منطقه إلى منطقه وتكاد تشترك في انواع معينه مثل الكامري والهايلكس....... وفعلا كلامك صحيح في ناس تشتري من مدينه وتبيع في مدينه أخرى مثل الكابرس مثلا يشترونه من الرياض ويبيعونه في الطايف والهايلكس يباع في القصيم وهكذا وانا راح اتطرق لها النقطه في المحاضره الجايه وراح تستفيد اكثر ولا تستجل وبالتوفيق |
اقتباس:
حياك الله اخوي وسررت بلقائك اغلب الأسئله الي سألتها انا راح اجيبها في باقي الدرس بس انت استعجلت شوي وراح اجاوب بس ضروري تتابع باقي الدرس على شان تستفيد اكثر 1- اخي بالبدايه تركيزك يكون على نوع واحد من السيارات بمختلف موديلاته من اقدم موديل الى احدث موديل الي يناسب رأس مالك..... مثلا رأس مالك 15000 ريال تبدأ في الكابرس من موديل 90 إلى موديل 2002 وهذا النوع من السيارات مرغوب في المنطقه يعني على حسب منطقتك تشوف النوع الي ماشي وهالشي راح اتكلم عنه ......... هذا كبدايه فقط وبعدها تنتقل إلى نوع اخر وهكذا حتى تنتقل إلى القسم الثاني من المتاجره بالسيارات وهو إعادة تجديد السياراه وهذا فيه ارباح خياليه اكثر من الأول ولا تستعجل اخوي اكل العنب حبه حبه 2- بالنسبه للأسعار قلت ان السوق هو الي حدد وانا راح اعطيك طريقه تصير تعرف فيها الأسعار بإذن الله 3-الشراء من تحت المكرفون مخاطره كبيره ولا ينصح بها كمبتدأ لان في الغالب مايباع تحت المكرفون يكون فيه عيوب كثيره وصاحبها لا يرغب في ان الشخص الذي يريد ان يشتري يفحصها ولذلك يجيب ان يكون عندك الخبره الكافيه في السيارات وفي الأشخاص ايضا من طريقة لبسه ومن كلامه تميز اذا هو كاذب او صادق او انسان مستهتر وهذي المرحله الأخيره من مراحل تجارة السيارات 4- نعم فيها اجراءات نقل ملكيه وفيها تأمين بس اهم شي تكون مفحوصه واستمارتها مجدده او يتحملها البائع........ وترا ما تكلف شي يعني اذا انت بتكسب في السياره 4000 ريال ما تستاهل اجراءات نقل ملكيه ؟ 5- طبعا هالشي حاصل كثير بس ما انصح فيها كمبتدأ انصحك انك تنزل لسوق وشوي شوي الين ما تتمكن منه... ومع الوقت والخبره راح تتعلم اتمنى اني اكون افدتك يالغالي |
.. موفق بأذن الله وبارك الله لك فيها .. مشروع ناجح ..
|
اقتباس:
مشكور على النصائح اخي وشي طبيعي انك ماتشتري من شريطي لان الشريطي يبي يتكسب ولكن انت راح تشتري تبعا لأسعار السوق الي انت عارفها وتبعا لنظافة السياره اذا فهمت هذي النقطتين مافي ابن امه يقدر يضحك عليك وبالنسبه لإجراءات نقل السياره والأوراق اصلن المعارض ما يعطونه باقي فلوسه لين تنقل السياره بأسمك يعني مامنها خوف حتى لو ماجاب باقي الأوراق ماراح يتسلم سياراته واصلن المعرض مستحيل يكتب المكاتبه بينكم الا بإستمارة السياره وبطاقات الهويه اما بالنسبه للفحص والتأمين حتى لو ماجابها امرها سهله تقدر تطلعها اهم شي استمارة السياره بالنسبه لسيارات تحت المكرفون هي دائما للأشخاص الي يرغب في البيع بسرعه ودائما يحدث فيه بيع النجش اي انهم يزايدون في السعر عشان تطلع لهم نسبه اكبر عند البيع لكن انت مع الوقت راح تصير تعرف الأشخاص لانو دائما يغير لبسه مره تحصله لابس شماغ مره بدون مره لابس لبس رياضي اهم مافي الموضوع الصبر ثم الصبر وخليك في السوق شهر او شهرين لمدة ساعتين يوميا ماراح يضرك هالشي بالعكس حتى الناس اذا عرفوك انك تنزل المعارض وتخاف ربك يصيرو يوصونك على سيارات ويعطونك سياراتهم تبيعها لهم وبتعين خير ومن يتق الله يجعل له مخرجا |
اقتباس:
وطبعا ضروري تحط مبلغ على جنب عشان اذا طلبت السياره منك شي يكون عندك مبلغ متوفر تحياتي وسررت بتواجدك |
اقتباس:
شكرا اخي نورت صفحتي بمرورك تحياتي |
اقتباس:
تحياتي |
بارك الله فيك
برايك ايش السيارات اللي ممكن يستوردها الشخص من الدول المجاورة مثل قطر - الامارات ويبيعها عندنا هنا !! |
بإذن الله اليوم راح نكمل الجزء الثاني والأخير من الدرس السابق
ذكرنا في الدرس السابق عدة نقاط مهمه يجب التركيز عليها وهي كالتي الفئات الموجوده في السوق <<<< مهمه في عملية الشراء فئات السيارة الموجوده في السوق (رديئه ، نظيفه ) <<<مهمه في عملية تقييم سعر السياره وعرفنا ان هناك اربعة عناصر هي التي تحدد لنا مستوى نظافة السياره وهي المكينه والقير والبودي وقطع الغيار...... وكل ما اكتملت هذه العناصر الأربعه في سياره ماء صارت السياره نظيفه جدا جدا او مايسمى (ورده) ملاحظه( السياره الورده الفرق الوحيد بينها وبين المخزن في الممشى فقط ) بمعنى آخر ان المخزن تحصل ممشاه قليل جداً بالنسبه لموديل وهو بالعاده تحصله الي ممشاه في السنه ما يتعدى 5000 كيلو او حوله <<< تقسم الممشى الكلي على عدد سنوات الموديل حتى السنه الحاليه يطلع لك هذا الرقم .... فقط وقلنا ان المخزن بالعاده لا يتلزم بسعر السوق وسعر السوق يشمل الثلاث انواع التي هي ( المقبول، والنظيف. والورده او اللقطه) اما المخون فليس له قاعده ويمكن يخترق الترند وبالعاده المخزن يتشريه ناس هواة لسيارة معينه ومستعد انه يدفع أي ثمن.. نرجع لموضوعنا ويجب انك تعرف ان هناك سيارات سعرها لا يتأثر بالممشى وعدد السنوات مثل المرسيدس والألماني عموما اما التويوتا وباقي السيارات فغالبا يتم قياس سعرها على عدد الكيلوات وهي تفرق يمكن كل خمسين الف كيلوا لنفس الموديل ويجب الحذر في السيارات اليابانيه والأمريكيه من التي ممشاها يتعدى 300 الف بينما في الألماني والمرسيدس خاص لايهم بشكل كبير قدر مايكون اكثر ميزه اذا كانت السياراة مامشت كثير <<< لا يعيب السياره كثرة الممشى ويعتبر ميزه قلة الممشى ويزيد سعره بعد هذا الكلام كله خلونا نبدأ في التطبيق النظري وكيف تصير تعرف اسعار السيارات وقبل هذا خلوني اقول لكم كيف نظام السوق او المعارض اول ماتدخل السياره يستقبلها الشريطيه الي عند مداخل السياره فمثلا سياره من ((نوع معين بمواصفات معينه لموديل معين بمستوى نظافه معين بلون معين)) يسوى سعرها عند البيع 18000 ألف الشريطيه يقومون ببخس السعر الى النصف مثلا يعني يعطونه 9 او 10 الآف .... لانهم عارفين انها راح ترتفع اذا دخل السوق ويقومون بالإتصال على اصدقائهم عشان يبلغونهم ان السياره الفلانيه من الموديل الفلاني الي لونها فلاني عطيناه فيها مثلاً 10 الآف وبعدها يراقبون السياره واذا كان نوعها مرغوب وعليها طلبيه كل شوي يجيه واحد ويسأله عن سعر السياره واذا قاله مثلا انسامت ب10 الآف يقول له الله يرزقك ويمشي حتى يقتنع البائع ان سعرها في السوق تقريبا 10 الآف الا اذا كان هو من قبل فاهم الشغله وسأل عن سعرها فراح يصبر عليها وبعد كل حين يأتي اليه شخص بنفس الطريقه حتى يأتي إليه شخص ويجلس يتكلم معاه وبعدها يزيده 500 وان وافق فمرحبا وان رفض تركوه وعملو معاه نفس الطريقه حتى توصل مثلا الى 12 او 13 بالكثير وان وافق او تركوه واذا جاء اليوم الثاني عطوه سعر اقل من سعر اليوم الذي قبله وهكذا حتى يبيع غصب عنه خصوصا اذا كان مستعجل الا في حاله واحده اذا جاء شخص يريد ان يستخدم السياره وكان عارف بسعر السيارات وهذا قليل لأن اكثر الذين يدخلون السوق بغرض الشراء لا يعرف معلومات كامله عن اسعار السيارات فهو يسأل عن السومه فإذا قال له بـ 10 الآف تحصله يزيده فقط 1000 او 2000 بالكثير او انه يكون الشخص الذي يرغب بالشراء عارف بالأسعار في هذي الحاله يختبر الشخص البائع ان شافه مو عارف شي بالسيارات ما يزيده كثير ويصير يراقبه وهذا مايسمى بـ (الشريطي المستخدم) أي انه شخص يريد ان يستخدم لكنه يرغب يحصل سياره رخيصه وفي نفس الوقت ممكن انه يزيد عن اسعار الشريطيه الباعه بشي قليل يعني يوصلها حول سعرها في السوق طيب ارجوا انكم استوعبتوا النظام جيدا لأنه هو الي راح يبين لك مدى نجاحك في السوق ويجب انك تمشي معاه وما تعكس الإتجاه يعني مثلا ماتزيد اكثر من 500 ريال في المره الواحده او بالكثير 1000 ريال اذا كان سعر السومه بعيد جدا عن سعرها الحقيقي في السوق ويصير تراقب السياره مضبوط وتجيه اذا شفته يبي يطلع من السوق وهذي راح اشرحها لكم طيب الآن قبل كل شي خلونا نروح نطبق الجانب النظري بعدها نتعلم كيفية النزول لسوق نجيب كوب شاهي نفتح أي موقع لسيارات يكون مشهور ويعرض السيارات الي في السعوديه ونبدأ في نوع معين من السيارات على حسب الي تشوفه انت ويفضل انه يكون نوع سوقه ماشي........ خلينا نقول الكورولا مثلا رأس مالي 20000 الف << مجرد مثال اروح للكورولا من موديل 95 وابدأ اشوف الإعلانات مثلاً أول اعلان شفناه شخص عارض كورولا لون أبيض << (ملاحظة اللون له تأثير على سعر السياره وهالشي راح تعرفه مع الوقت ). كورولا لون ابيض مثلا ماشيه 250 الف مكينه شرط قير نظيف بودي وكاله كل شي فيه تمام وشفت صورة السياره <<< (يفضل ان الإعلان يكون فيه عدة صورة لسياره واضحه وحتى من الداخل).... والرجال شارط السياره شرط وقال يحق لشاري انه يفحصها.... حلو المهم شفت الرجال طالب فيها مثلا 14 ألف!! طبعاً ان شخص جديد على السوق ولا تعرف الأسعار طيب جيت لردود....... طبعا تحصل الي معطيه 5الآف والي معطيه 8 الآف والي معطيه اكثر والي معطيه 14 الف ...... طيب وبعدين؟ نروح لأعلان ثاني يكون بنفس المواصفات السابقه لنفس الموديل حتى وان اختلف الممشى قليلا يعني مثلا شفنا اعلان ثاني تقريبا نفس نظافة السياره وكانت السياره ورده يعني تلق لق ماشاء الله الويه تلمع والداخليه نظيفه يعني بالعربي شبه جديده لكنها مو مخزنه يعني ماشيه ... طيب وكان الممشى هذي المره مثلا 230 ألف او 210 ألف كيلو لكن هالمره الرجال صاحب الإعلان حاط الحد 12 ألف... .. نروح نشوف الردود نحصل مثل شخصين معطينه 10 الآف وواحد معطيه 11 ألف ورأينا شخص معطيه مثلا 13 ولاهو حاط رقم جواله ولا شي <<< هذي سومه غير جاده دائما حنا نبحث في الردود عن امرين وهي اهم مافي الموضوع نبحث عن الردود الجاده الي تحصله من زمان في الموقع بغض النظر عن انه شريطي او مو شريطي ونحصله حاط رقم جواله..... ونبحث ايضا عن أعلى سعر مكرر .. يعني دائما شوفه طيب رحنا لسياره من نفس الموديل ونفس كل شي والممشى تقريبا 260 ألف وشفنا اقصى مبلغ وصلت له مثلا 11 ألف وصرنا نسوي عملية مقارنه وطلعنا بنتيجه الي هي ان سعر الكورولا النظيفه الورد موديل مثلا 95 لون أبيض اقصى سعر له في السوق يساوي 11 ألف <<< أعلى رقم مكرر في الردود وهكذا مع باقي الموديلات كل يوم اويومين تاخذ لك موديل حتى مثلا توصل لموديل 2000 وتوقف مع مراعات النظر في تواريخ الإعلان والردود مثلا اخر رد شفته كان بـ 11500 قبل يومين وبعدها شف واحد معطيه 10 الآف قبل اسبوع واليوم واحد معطيه 11 الف وقبل شهر واحد معطيه 11 الف وحاط رقم جواله وقبل اسبوعين واحد معطيه 10800 ريال يعني عرفنا ان السياره هذي سعرها حول 11000 ألف...... من 10 الى 11 ويفضل انك تشوف اكثر من موقع يعني ماتعتمد على موقع معين وكل ما توسعت وكونت قاعدة من المعلومات حول نوع معين كل ما زادت خبرتك فيه وترا الشغله بسيطها ما تاخذ منك يمكن اسبوع وهكذا.............. طيب الحين مثلا وصلنا لكوريلا موديل 2000 وعرفنا اسعارهم وعرفنا الورده كم تسوى طبعا انا ليش ركزت على الورده يعني النظيفه مره؟ ... لانها راح تعتبر مرجع لك بعدين راح تبني عليها وتقيس عليها أي سياره تشوفها من نفس النوع والموديل والمواصفات طيب بشكل اوضح نزلت السوق وبعد ثلاث ايام وبالصدفه شفت شخص اول مره تشوفه (قصدي خلال الثلاث ايام هذي لم تراه ) معاه كورولا موديل 2000 وانت عارف مسبقا مثلا ان سعرفها في السوق يساوي 18000 عند البيع <<< حط تحتها خط وشفت السياره شكلها نظيف والبويه تلمع والداخليه نظيفه وسألته عن المكينه والقير قال لك على الشرط وقطع غيارها تمام وماشيه 200 ألف....... طبعا انت توك في السوق مبتدأ وما تعرف الرجال يمكن يكون شريطي او يمكن يكون ماهو شريطي المهم سألته عن السومه قلت لك كم انسامت قال لك بـ 17 ألف <<<< على طول اعرف ان الرجال شريطي او انه كذاب ما انسامت منه....... فهمت هذي النقطه؟؟ لانو مافي سياره تطب السوق وعلى طول تنسام هذي السومه...... الشريطيه دائما يخفسون بسعر السياره وانت عارف ان سعر السياره يساوي 18000 الف فكيف هذا يقول انها انسامت بـ 17الف؟....... انت في هذا الحاله تقول له الله يرزقك وتعطيه ظهرك وتمشي طيب مثلا لو قال لك ما انسامت..... او قال لك عطنا سومتك....... يمكن يكون انسامت منه بس ماعجبه السوق او يكون شريطي يبي يمشيها عليك طبعا السياره مثل ماقلنا ماشاء الله شكلها حلو ووقفها حلوه وهذا كله قبل الفحص وانت بعدين راح تفحصها........ طبعا انت حاط في بالك انك راح تكسب من السياره نقول 3000 وهذا شي حلو لأن السياره ماشاء الله مو محتاجه شي على كلام راعيها وراح تمشي اول شي تعطيه 10 الآف ...... غالبا راح يرفض..... وخصوصا اذا كان واثق ان سيارته نظيفه وما يهمه...... اذا شفته وافق على طول اعرف ان السياره فيها مشكله وحاول تصرفه طيب شفت الرجال رفض بس رفضه ماهو هذاك الرفض..... يعني تشوفه متردد ويبي يبيع ومستحي ...... برضه يجب انك تحذر منه لانه يبي يمشيها عليك ومو عارف كيف طيب واحد رفض رفض بس رفضه عادي قال لك جزاك الله خير وبنشوف السوق..... هذا يا اما انه يكون مو عارف سعر السوق او انه شخص يبي يتكسب ... يعني يبي ربح طيب كيف نعرف.......... نسأله بعيد انت او قريب ؟؟....... اذا قال لا والله بعيد هذا اعرف انه شريطي ..... اذا قال لك نشوف السوق اعرف انه شخص مو مستعجل على البيعه....... وخلاص في كلتا الحالتين قول له الله يعطيك البيعه الي ترضيك وعطه ظهرك وامشي مثلا سألته انت بعيد او قريب وشفت الرجال جالس يمدح لك الموتر ويعطيك مواصفات فيه ويبي منك بس تزود...... هذا اعرف انه شخص مضطر يبي يبيع وش تسوي انت تزوده 500 ريال عن سومتك الأولى واذا شفت الرجال او رفض رفض عادي اسأله انت بعيد ولا قريب اذا قال لك ماني بعيد او ودي ابيع عطه 1000 ريال ان وافق اشرط عليه التالي: قول له اذا المكينه او القير او البودي فيها شي اسحب سومتي وتتحمل قيمة الفحص واذا السياره تحتاج شغل مثل قطع غيار او شي اخر ماعدا القطع الإستهلاكيه تخصمها من سومتي الي سمتها لك....... ان شفته وافق توكل على الله وروح محل يفحص السيارات وما انصح يكون قريب من المعارض ..... شف لك واحد ثقه اتفق معاه يفحصها لك فحص من والى وان شفت الرجال رفض وعيى او تردد اعرف انه يبي يمشيها عليك ولا تطول معاه طيب لو قلنا انه رفض السومه من الأساس؟..... في هذي الحاله اتركه وخليك مراقبه لين يبي يجي يطلع من السوق وزد على آخر سومه انسامها من 200 الى 500 وخليك صارم ولا تتردد وسوي نفسك انك مو عارف في السيارات ولا تتفلسف كثير وبشرط ان بينها وبين سعرها الحقيقي ما يقل عن 3000 الآف من آخر سومه سمتها يعني مثلا السياره تسوى عند البيع 18 الف اذا شفته طالع من السوق ووقفته وسألته قلت كم جابت قال مثلا 14 الف قوله 14 ونص وخمس ميه حقت الفحص والمكاتبه يعني يطلع المجموع 15 الف <<<<<< هذي في حالة ان السياره نظيفه ومايبي لها شغل واذا كانت الإستماره منتيه او الفحص منتهي اشرط عليه انه هو الي يتحملها اهم شي انك تطلع منها بملغ حلو مايقل عن 3 او 2 ونص.....وان شفته رفض خليه بيجي بكره ونفس الشي بيصير معاه ويمكن مايحصل السعر الي حصله اليوم ونصيحه لا تطمع بأكثر ولا تبخس سلعة الرجال يمكن يكون محتاج او مضطر ولا تحلف كذب وان شف فيها شي يتصلح خليه يخصمها وان شفت شي خصوصا صدمه بالسياره ابعد عنها ولا تجامل وخليك صارم ولا تضحك كثير والي اول شرط اخر نور ومن البدايه خليك على بينه طيب نجي لموضوع الصدمات والرشات الصدمات تأثر على السياره بمقدار الصدمه مثلا السياره الي جايتها صدمه في الوجه هذي لها سعر السياره الي جايتها بيبان هذي لها سعر السياره الي جايتها صدمه من الخلف هذي لها سعر السياره الي جايها رفرف لها سعر السياره الي جايتها دقشه خفيفه لها سعر السياره الي عدة دقات خفيفه لها سعر السيـــــــاره المرشــــــوشه بغرض التجـــديد لهـــا سعر طبعا السعر موجود في السوق يعني كل شي موجود اهم شي انك ما تنخم فيها ولا تفكر ان السياره الي بدون صدمه تساوي نفس السياره الي بصدمه لانك انسان تبي تتكسب والي راح يشتري منك راح يعطيك بسعر السوق هذي النقطه لازم تحطها في الحسبان (سعر السوق هو الي يحكمك والي تبني عليه مصيرك) خلونا ناخذ مثال كورولا موديل 95 نظيفه ورده قير عايدي (المواصفات مهمه في السعر ايضا) ودرايش كهرب << الدرايش الكهرب والفتحه تزيد في سعر السياره وايضا القير التماتيك والقير العايدي مثلا تساوي 19ألف في السوق هل اذا كانت مصدومه تساوي نفس السعر؟........ معنى ان مكينتها وقيرها وقطع غيارها والبودي شكلها نظيف....... طبعا تفرق ولها سعر خاص راح تعرف من خلال ملاحظتك لأسعار نفس السياره المصدومه...... الصدمه الي بالوجه تختلف عن الي بالجنب اقصد بالسعر هل السياره الي بويتها وكاله تفرق عن السياره الي بويتها مجدده حتى لو مافيها سمكره ؟ نعم تفرق ويمكن تكون سياره موديلها قديم بس بويتها وكاله تساوي اكثر من سياره موديلها جديد وبويتها مرشوشه وهالشي يرجع لرغبة الشخصيه ورغبة الناس انت الآن لو شخص يجيب لك سياره نظيفه وحلوه بس يقول لك تراها مرشوشه... تحصلك تتردد بس اذا كان سعرها مغري وكنت تبي تستخدم تحصلك يعني ممكن توافق او اذا كانت مصدومه صدمه وجه يجب ان يكون سعرها مره مغري عشان توافق يعني تفرق اضعاف كثيره عن سياره اخرى من نفس النوع والموديل والمواصفات بس بويتها وكاله وهذا الحاصل في السوق وانا قلت من اول خليك دائما في مكان الي يبي يشتري وترا الناس دائما قبل ماتشري خصوصا في سوق السيارات تكون حذره وماتشتري على طول وتحصله يسأله اكثر من واحد ويلف المعارض...... فضروري انت تكون واثق من سلعتك وعارفها عشان لا تطيح في الغش والخداع والي يغش مره صدقني راح يغش على طول لأنه خلاص كسر هذا الحاجز اذا القاعده الرئيسيه الي راح تتخذها انت هي ( اشتري صح عشان تبيع صح) قاعده بسيطه لكن معناها كبير جدا ملاحظه: ليس من الضروري ان يكون ممشى السياره صحيح حتى وان كان العداد قراءته صحيحه فيمكن التلاعب فيه.... وبعض انواع السيارات مثل المرسيدس يمكن الكشف عن ذلك بفحصها في الوكاله بالمكمبيوتر لأنها تخزن ممشاها في الكمبيوتر الخاص بها وطبعا العداد الإلكتروني يحتاج الى محترف عشان يتلاعب فيه عن العداد العادي يعني الزبده لا تشتري من شريطي لانه اذا في احد يبي يسوي كذا بيسويها عشان يتكسب فيها ومايدور الكسب الا الشريطي ولا صاحب السياره اصلن هو بايع بايع بخساره فما تفرق معاه سالفة العداد المعذره يا اخوان ان لم استطع ان اوصل المعلومه بالشكل الصحيح لاني كتبت الموضوع ولمن جيت ابي انزله الصفحه علقت عندي واضطريت اني اكتب الموضوع مره اخرى ولي تقريبا اكثر من ساعتين وانا اكتب الموضوع ويشهد الله على كلامي اتمنى منكم الدعاء لي ولوالدي واي استفسارات انا حاضر واتمنى من اي شخص قرا موضوعي وطبقه يحكي لنا تجربته واذا شفت ان في شباب استفادوا منه راح انزل موضوع اخر عن إعادة تجديد السياره وهذا ارباحه اضعاف اضعاف بس يبي لها شوية تعلم وتركيز تحياتي للجميع |
ماشالله عليك ربي يوفقك ويرزقك يارب
صراحه سوق السيارات اعرف ناس دخلوه ورصيدهم الان (+مليون) ولكن بنفس الوقت اعرف ناس دخلو السجن بسببه وبسبة الديون) يعني الواحد لابد يكون عنده راس مال ملك له مو ياخذه دين حتى يدخل السوق ويكون حريص كثير ماينضحك عليه بسيارة غاليه ويروح فيها اشكرك اخوي على طرحك الموضوع وتقبل مداخلتي^_^ |
انا من المتابعين لك من البدايه ....وفقك الله
وشكرا جزيلاً على مجهودك الرائع في خدمة اخوانك |
جزاك الله خير وغفر لك ولوالديك ورزقك من حيث لاتحتسب
والله ياخوي هذه الفكرة تدور براسي من فتره طويلة لكن خوفي وعدم معرفتي بخفايا الصنعة صرفت النظر عنها لكني استفدت من موضوعك هذا فبارك الله فيك اخي وكثر من امثالك تحياتي لك |
انا من المتابعين لخبرتك وذكاءك ماشاء الله
اخوي انا اقلك اذا كتبت موضوع خلك مثلي قبل لاتضغط ع اعتماد الموضوع انسخ الموضوع كله بعدين اضغط عشان اذا طاااار انت نسخته ع طول لصق وانتهى الموضوع وجزآآآاك الله خير وننتظر تكمل لنا وتفيدنا ولاتعبت يالغلا |
بارك الله فيك على حبك للخير لإخوانك
عسى الله يفتحها في وجهك وين مالقيته استمر وحنا متابعينك |
اقتباس:
طبعا هذا الشي يعتمد على النوع الي عليه طلب في المنطقه الي انت فيها وعموما انا انصح بإستيراد الجيوب لاند كروزر والجيوب الشاص وترا في الوقت الراهن اصبح الإستيراد غير مجدي مو مثل اول لأن اغلب الي في سوق الإمارات وقطر شريطيه سعوديين عارفين بالأسعار عندنا ....... هذا والله أعلم |
| الساعة الآن 03:34 PM |
Powered by vBulletin Version 3.8.9
Copyright ©2000 - 2024, Jelsoft Enterprises Ltd
جميع الحقوق محفوظة لحلول البطالة
استضافة، تصميم مواقع، برمجة تطبيقات، من توب لاين