السلام عليكم ..

الاخوه الاعزاء لدي مبلغ من المال تقريباً (100،000 ريال) وحاب استثمره في غير مجال سوق الاسهم .. فكرت في امور كثيره منها واسهلها على مااعتقد هو مغسلة ملابس .. هذا المنتدى كان له فضل كبير بعد الله في معرفة معلومات كثيره عن المغاسل وخاصه موضوع الاخوان (عالم القهوه وتسويقار) فشكرا جزيلا لهم ولادارة المنتدى ..

بحثت عن مكان جيد لإقامة المشروع في مدينة اقامتي (الجبيل الصناعيه) وبالصدفه وجدت مغسله قائمه معروضه للبيع وسأذكر تفاصيلها وسبب البيع:

مساحة المحل ( 30م فقط) صغيره جدا ..

المغسله تتكون من :

1 مكبس
2غساله
2 نشافه
وسير تعلق عليه الملابس ..

لا اعرف انواع الاجهزه ابدا .. ولا عندي اي خلفيه عن اجهزة المغاسل وانواعها ..

سبب البيع حسب صاحب المغسله هو عدم وجود عماله .. يقول جب عامل وشغل المغسله ..

مطلوب فيها 60،000 ريال قابل للمفاوضه .. يعني راح ينزل السعر ..

اجار المحل 20،000 ريال سنوياً

دخل المحل حسب المالك 7-9 آلاف ريال ..

من مميزات المغاسل او المحلات بشكل عام في الجبيل الصناعيه انه بكل حي يوجد مركز تجاري .. يعني المغسله هذي تخدم حي كامل ولايوجد منافسين ..

اخواني سؤالي هو . هل السعر معقول بالنسبه للاجهزه الموجوده والمغسله بشكل عام .. مع اني اشوف ان الاجهزه قديمه نوعا ما .. كيف يمكنني معرفة ان الاجهزه جيده تقنياً .. كم تقريبا كلفة مستلزمات المغسله الدوريه من صوابين وغيرها .. كم متوسط دخل المغاسل بشكل تقريبي .. كيف يمكنني ايجاد عامل بأسرع الطرق وهل الاستقدام ياخذ وقت طويل؟


علماً اني افكر بفتح وكالة لاحد المحلات للملابس النسائيه وقمت بالتواصل مع الشركه وابدوا موافقه مبدأيه .. وايضاً تواصلت مع احد مصانع مستحضرات التجميل في امريكا وابدو رغبتهم بالدخول للسوق السعودي عن طريق وكيل .. ولكني متخوف ان لايسعفني رأس المال في المشروعين وآجلته لوقت لاحق ..


عموماً اتمنى ان تثروني بنصائحكم ومعلوماتكم .. واذا فيه افكار اخرى ياليت تطرحونها مشكورين ..

اخوي ادخل داخل المغسلة تحصل الشدير تحت الشدير صنبور افتحه ان حصلت المويه نظيفه هذاء يدل انه تمام شوي تعبانه يدل انه شوي تعبان وانصحك تاخذ معك مهندس مغاسل اتفق معه كم يكشف علي اداوت المغسله بالكمال ويقلك كيف وضعها هذاء افضل طريقة





اخوي اشوفك مستعجل تاخذ وكالات او انك تفتح عدة مشاريع بوقت واحد بالله كيف تديرها بوقت واحد علما ان كل مشروع ببدايته يبله مراقبه وتكون في المشروع

اخوي اول ما تدخل داخل المغسله تحصل الاله درجه حرارتها عاليه مثل الحنفيه ام صاروخ وتحصل قريب منها حنفيات الديزل هذاء هو الشدير




اما عن الفني تحصله في محلات بيع اداوت المغاسل او روح لاقرب مغسله وقوله ابي فني مغسله وهو يجيب لك




مشكله المغاسل ان تعطل شي عليك توقف ويبلك تجيب فني علي الكشفيه عاد شوف كم قيمة اصلاح




الوكلاء حقت الملابس النسائيه والله حلوة

ياخوي انا لي شهرين يوميا انزل السوق وابغى افتح مشروع بس المشكلة مبدئيا المنافسة اذا ماكان في منافس استخير وتوكل على الله بس لازم تخلي عينك على المغسلة او تأجرها على العامل بالشئ الفلاني شهريا مقطوعة وبالنسبة للماركات انا فكرت فيها بس ماعني خلفية فياليت لو تفيدنا في طريقة اخذ الوكالة وعمل المشروع مع ان عندي راس مال من 150000 الى 400000 بس انا اتوقع والعلم عند الله وماعندي خبرة بالسوق بس يعني لو يكون قروب يأخذوا وكالة ويدخلوا السوق بقلب جامد يعني يكونوا مجموع والملبغ يوصل فوق المليون يفتحوا على طول فروع وكل واحد يهتم في فروعه راح يكون الاسم معروف وعليه دعاية وراح ينتشر على طوووول بس انا الين الحين ماحد يوجهني لشئ واتمنى منك انك تعطيني رايك في الخاص ^_^

٦٠٠٠٠ الف كثير حاول تاخذهاا ب٤٠٠٠٠ او اقل بالنسبة للمعدات لا تأخذ الا امريكي نصيحه عشان اذا جئت تبيع بكره تمسك سعرها وماتخسر فك نفسكً من المعدات الوطني وغيرها . صحيح انها عمليه بس ما تخدمك وقت البيع ..انا اشتريت مغسله ب٣٠٠٠٠ الف وبعتها ب٥٥٠٠٠ والسبب المعدات امريكي . الله يعينك على العماله اليمنيه عندهم اسلوب يخلونك تكره المغسله عشان تاجرها لهم او تبيعها لهم وانا اكتشفت كان عامل عندي يمني يحاول تطفيش الزبائن عشان أجرها عليه بس طيرته خروج نهائي وبعدها الي كان معاه مشى معاي صح .
اصبح روتين المغاسل الان معروف ولكن اذا حبيت تميز عملك فعمل على التوصيل للشقق والفنادق مجانا وجب لك سياره صغيره للتوصيل وهذا الي سويته انا والحمد لله بنسبه ٧٠٪ من الفنادق والشقق رقم مغسلتي لديهم . الله يعينك ويوفقك