في البداية احب امسي على الجميع

شوفو هو صحيح اني مو نضامي وجبت العيد بس الله يستر على المشروع الفاشل من الفشل
اخوكم في الله توهق في مشروع راس ماله 2000 ريال طبعا هذي البدايه
المهم مالكم في الطويل اقص عليكم القصه
قدمت على تاشيرة سواق هندي 2000 ريال قيمة الرسوووم
تبون الصحيح ولا ابن عمه
سمعت من كذا واحد ان تاشيرة للهندي 6000 ريال المهم قلت والله كويس 4000 مكسب وناسه حق مصاريف العيد وفرتها هذي الحقيقه المهم قدمت على السواق وطلعت تاشيرة
هههههههههههههههه توهقت بعدها ما عرفت اصرف تاشيرة جلست في نحري كذا شهر
وانا جالس على براد الشاهي عصريه واقلب في اوراقي لقيت كرت محل لتصليح المجالس العربيه والكنبات وضربة الفكره في راسي
اجيبه خياط بس كيييييييييييييييييييييييييييييييييف
المهم رحت يم خياط هندي وقلت له عندي تاشيرة سائق بس ابي اجيبه خياط يعني يعرف يخيط
ومثل العادة اول شي قلي انته يبي يبيع تاشيرة ولا يبي يشتغل
حكيت راسي شويه حنيت على 4000 ريال قلت انت وش تبي قال تبي عامل انا اجيب نفر يشتري انا مافيه معلووووم
قلت كويس جيب عامل يشتغل المهم جلس يسئلني كم سؤال يعني الراتب كم قلت 600ريال جلس يضحك اقال مافيه نفر يجي براتب كذا المهم مني منه وصل راتبه 1000 ريال وعليه الاقامه والسفرالاهم من هذا كله قااااااااااااااال خساره 2000 ريال حق تاشيرة انا اعطي عني ههههههههه فرحت لاني كنت طفران ومصدقت المهم قلي ادق عليك عشان يعطيني المكتب اللي في الهند عشان اوكله اسبوع واتصل ورحت يمه واعطاني الكرت ورحت لمكاتب الاستقدام وارسلت التفويض 150 ريال ورجعت للهندي واعطاني 2150 ريال لحد الان ما خسرت شي
المهم جلس الهندي حوالي شهرين وجاني الهندي ههههههههههههههه شوفوا المصيبه وصل وانا طفران ما معي غير 600 ريال
لا محل استجرت
ولا قماش شريت
ولا مكينه شريت
ولا فيه شي مره
المهم بعد تفكير عميق شوفو وش سويت
رحت لصحيبي الهندي صديق انا فيه مشكله
مكينه ما فيه احصل كلها غالي فوق 3000 ريال
المهم اخذني ووداني على الحراج وشريت مكينه حالتها ربع عمر 450 ريال
وين محل انته قلت ما عندي محل
قال كيف يعني وين حط محل وربي وهقت الهندي معي المهم
قلت صديق هذا نفر يجي بسرعه انا كنت افكر يجي بعد سته اشهر او سبعه ما فكرت يجي بسرعه
قال الهندي خلاص يحط في غرفه عامل انته قلت كويس
قلت صديق كيف طريقه نزل اسفنج وقماش تبي صحيح انا فلووووووس قليل مره
وابغاك تنزل الاسفنج والقماش عن طريقك واعطيهم على دفع
وافق
نزلت الاسفنج ولقماش هههههههههه ورص في غرفة الهندي
وقلت اشتغل وسو مقاسات 4×5 وثلاث مراكي وستاره
نجي لتكلفة المشروع

200 ريال غرفة عامل
450 ريال مكينه
500 ريال مقدم للاسفنج
500 ريال تنزيل قماش وادوات الخياطة من موزع واحد
عملية التسويق
اخذ الاطقم اللي يسويها العامل
وانزلها على الحراج واجلس جنب سيارتي وثلاجة الشاهي جنبي وكل شوي واحد يجي يسعر واقلهم 650 ريال مع الستاره واذا تبي افصلك افصلك وهذا كرتي اتصل عليه واجيك اخذ المقاسات
واذا سئلوني وين محلك اقول في بيتي هذي انا اللي اخيطها والحمدلله ليه اسبوع اشوف الوضع طيب والله يستر

التكلفه الاجمالية لطقم 4×5 مع الستاره يكلف 400 ريال ولكم الحساب
والحمدلله بعت في الخميس الجمعه الماضيه 6 طقوووم يعني الحمدلله طلعت راتب العامل

هذي حكايتي والله يوفق الجميع نزلتها لعل تفيد احد والله يستر لاني غير نظامي وان شاء الله اذا سلكت الامور توسعت وخليتها نظاميه

ربي يوفق لك ياخوي
ويرزقنا من واسع فضله

الله يوفقك
حضك حلو
وامك داعيتلك وصيه تدعيلك كمان
ولا تنسى الزكاه وانشاء الله ربي بيكرمك
ويفتح عليك وتصير تاجر بس استمر مع الهندي
صاحب المحل يوجهك ويدلك عنده خبره
موووووفق خير

مشكورين على المرور ودعواتكم تزيدني اصرار على العمل والمواصله

تفكير حلو
والله يوفقك استمر

الله يوفقك والله همة عالية الله يستر عليك

هههههههه والله معاناه بس بالاخير زبطت معك الله يوفقك ويزيدون الزباين عليك

الله يوفقك يارب تفكيرك حكيم ماشاء الله عليك

الله يوسع لك يارب ويرزقك من اوسع ابوابه .

ما شاء الله عليك

بس نصيحتي لك اولا لا تتكاسل

ثانيا لا يلعبون عليك بني بنقال ترا اذا فرحك انك بتكسب ٢٠٠٠ بالاسبوع اعرف انه بيكسب منك ١٠٠٠٠

تراهم ما يسوون شي لعيونك

وانتبه لا تتوهق بشي مب نظامي

ماشاء الله عليك

والله انك عجبتني وانبسطت منك

لكن حاول حاول حاول بكل ما تستطيع انك تجمع المكاسب اللي تجيك لين تصير مبلغ محترم

وتفتح لك محل رسمي وتغير مهنى العامل اللي عندك او تجيب غيره وتستمر