صباح يوم السبت الموافق 25 ذو القعدة /1427هـ جهزت نفسي كاني رايحه حفله حطيت كل مساحيق المكياج اللي عندي في البيت صار وجهي علبه الوان ولبست احلى ماعندي وشلت ملفي العلاقي عشان التقديم اللي اعلنوا عنه في الجريدة (الادارة العامة للتربية والتعليم للبنات بجدة -بند التعاقد بالساعةشارع الامير ماجد الدور الخامس) وطبعا زي كل البنات الامل قدامنا والفرحه ماهي سايعتنا على قولة ام كلثوم من فرحتي تهت مع الفرحه من فرحتي لابنام ولا باصحى ويافرحه ماتمت لمن رحت هناك تجمع جماهيري ومئات من المتقدمات اللي طبعا رفضوا انهم يدخلونا وحولونا لقسم الرجال عشان يتفاهموا معانا والله ورحنا قسم الرجال طبعا اول شي عملوا الموظفين هناك قليلين المروة بداوا يصورونا بكاميراتهم وطبعا هم متلثمين (قله نخوة) وقعدنا تقريبا في الشمس مايقارب الساعه بس الحمد لله الشمس بارده وهم يحاولوا انهم يشتتونا ويصرفونا لمن شافوا مافي امل مننا دخلونا المقر عندهم وصار وا الرجال مع الحريم اتقلب البحر طحينة وكل واحد من الموظفين بيصور اللي يقدر عليه ماعندهم شغله اليوم الا احنا المهم جا واحد مسؤل من غير مايعرفنا بنفسوعشان لاحد يعرفوا قال وبكل بساطة : انفيلكم صحة الخبر اللي اتنشر في الجرايد واللي نشر هادا الخبر واحد محرض ولو سمحتوا اطلعوا برة ماعندنا وظايف واذا ماخرجتوا اجيبلكم الهيئة والله كدا قال بالحرف الواحد الدنيا انطبقت طبعا صاروا البنات يصرخوا وانا اول وحدة منهم ليش ايش سوينا داخلين مقر دعارة ولا ايش يعني اللي بيدور وظيفه حلال عندكم تجيبلوا الهيئه مو احنا جيينا مع الخبر المنشور في الجريدة طبعا بكلامه اللي صرح بيه امامنا اساء لبنات الوطن واساء لمقر التعليم المهم بغينا ناكله لحم ونرميه عظم حسبي الله عليه محل ماهو جالس الان كاننا بنشحت من عندو ولا طالبين شي يغضب ربنا صار وجه هادا المسؤل قد السمسمه وشرد والله العظيم انه شرد ماكان قد الحشود اللي ملتمه هناك لانو اصلا ماعنده ماعند جدتي
لمن شافوا المظاهرة اللي عملناها فتح القسم النسائي ابوابه لنا وقدموا لنا قوارير مياه صحيه (يحسبونا حنسكت ) وجلسونا قاعه المحاضرات واستقبلتنا الدكتورة ساميه بن لادن ( شكلها زي اسامه بن لادن ) وقالت كلام مناقض تماما لما قاله المسؤل في قسم الرجال مسكت المايك وقالت : اقدر اهتمامكم وحرصكم للحصول على وظيفة وهناك وظائف تكفي الكل ولكن لسنا مستعدين الان لاستقبال ملفاتكم لاننا لم ندشن الموقع اليا فردينا عليها خدي ملفاتنا بناء على الاعلان المنشور فردت قائله بكل برود :اي خبر (بالله دكتور قد الدنيا ماتقرا جرايد والله فضايح فينكم يالمسؤلين نايمين على عينكم والله العظيم اهم شي تستلموا اخر الشهر وبس وخلي الدنيا تولع حريقة ) وريناها الجريده قالت والله ما اعرف انا وصارت تتلعثم في الكلام واخر شي وصلت له من العباطه قالت : يابنات فكروا فيها احسن تدخلوا معلوماتكم عن طريق النت وانتوا مروقين لاننا في عصر التكنولوجيا ..الخ الخ فصاروا البنات يصارخوا ويقولوا ليش يادكتورة مانعرف نقرا ولا نكتب مانعرف الالف من الباء احنا متخرجين من الجامعات والكليات فاتعلعثمت مرة اخرى وقالت بكل برود (شكلها سهرانه في الكوفي اخر الليل ) : خلاص يابنات حنوزع عليكم اوراق تكتبوا فيها اسمائكم وارقامكم واهم شي تخصصاتكم لمن سالناها ليش قالت : عشان لمن نبغاكم نتصل عليكم (شبعنا هرج والله شبعنا ماعندها ماعند جدتي حسبي الله عليها كمان )والورقة اللي وزعوها علينا مافيها خانه للتخصص والله الدنيا مقلوبه بس خلوها على الله والفضيحه الكبرى ان احد معاوناتها فجاه اخذت المايك من الدكتورة ساميه واتهمتنا بتصويرها وتصوير الدكتورة وقالت حنفحص جوالاتكم جوال جوال فاتحولت القضيه من تعليمية الى اخلاقية بحته ميه بالميه فاحد مسؤلي التعليم من الرجال حيجيبلنا الهيئة عشان نبغى وظايف حكومية (هادا واحنا معلمات المستقبل مشكوك في شرفنا وعرضنا ) والاخرى من النساء تتهمنا بتصويرها وتصوير الدكتورة وطلبت مننا مخافه الله وقلبتها محاضرة دينيه (عشان نطلب حقنا في التوظيف بناء على مانشر في الجريده ) وبعد كدا طفوا اللمبات حقت القاعه يعني طردونا عشان مايبقى احد ويفككونا عن المطالبه بحقنا في التوظيف
اين المسؤلين؟ اين المسؤلين؟ ماحنقول غير حسبي الله ونعم الوكيل قدر الله وماشاء فعل اتمنيت اليوم امنيه غريبه عجيبه بناء على ماحصل
اتمنيت اني اكون امريكيه حتى اتمتع بالديمقراطيه والاستقرار والافتخار بوطني لكن ماكل يتمنى المرء يدركه المواطنه السعوديه ماهي لاقيه مكان في بلدها لانو هنا السعودية فاتحه اذرعها للاجانب والوافدين
قدر الله وماشاء فعل وافضل العبادة انتظار الفرج والغيب مستور لعل الله يحدث بعد ذلك امرا وان مع العسر يسرا
(عندي مقطع مصور لبعض الاحداث بس كل ما ارفق ملف يقولي ملف خاطيء مادري ليش )