يسعدلي صباحكم / مساكم بالمسرات
بفضفض لكم من اللي لاحظته من تجاربي في اجراء المقابلات


عندما نعمل مقابله ولانقبل فيها شي من الحظ والنصيب
لكن عندما تعمل المقابله ويتم انتقادك على اشياء شخصيه لاتخص الوظيفه التي قدمت عليها ماذا يسمى؟

ندخل في الزبده
قبل فترة تقريبا ثلاث اسابيع عملت مقابله في احد الشركات المعروفه ولها سمعتها
كانت المقابله مع رجل وامراتان كاشفتان حطوا خط عند كاشفتان المهم حكينا في المقابله كثير
في اخر شي المديره قالت لي بسألك سؤال قلت تفضلي طبعا سؤال لم اتوقعه
كان السؤال لماذا تضعين الكحل علما_ اني كنت منقبه _ليه الكحل وانتي عارفه المكان فيه رجال ومعانا رجال في المقابله انا هنا سكت اناظر في وجهها واقول وجهك الفتنه بكبره مطلعته جت عالكحل وليت الكحل اوفر عادي كان توقعتها تستفزني بس كانت جاده تنقد وقالت هذا شي يقلل من نقاط توظيفك يعني ماتشوف نفسها المهم طلعت مغبونه منها تذكرت المثل لاتنه عن خلق وتأتي مثله عار عليك اذا فعلت عظيم
الحرمه تمسك منصب تشوف نفسها على ايش ماادري
الله كريم ويرزق كل المحتاجين يارب

سلامات سلامات تبي كاشفة مثلها شكلها المفروض سالتيها هل السؤال هذا له علاقة بالوظيفة هاذي كانت تختبرك

مدري عنها حسستني جايتها ببدله رقص تقول كيف مشيتي كذا من عند الرجال
بالغت كثير كل ماتذكرت الكلام انقهر اني سكت عليها

راضين بقدرك يسلموو عالمرور

لكل شركة سياسة في اللبس والهندام بعضهم يفرضوا على الموظفين غتر بيضاء والنساء كشف الوجه
وشكلها تدق في الكلام يعني مو عاجبها النقاب والكحل وبتقولك يا نقاب بدون كحل او تكشفي مرة وحدة

عالعموم كان قلتيلها اذا ممنوع الكحل فالأمر بسيط اشيله واذا كشف الوجه إلزامي فانا اعتذر عن قبولي لهذا الشرط

عالعموم لا تخلي المقابلة هذي تحبطك بالعكس التجربة هذي بتفيدك مستقبلا اذا احد سألك سؤال استفزازي تكون عندك اجوبة جاهزة وتقدري تردي على الاسئلة الاستفزازية بأسلوب حازم يبين قوة شخصيتك

وهي صادقة ليه تحطين كحل .. دامك عارفة ان المكان فيه رجال ...؟؟!!!

ابعطيكم نصيحه بالمقابله
الاولاد .... روح وانت كاشخ على سنقه عشره يعني لابس شماغه وعقالك والساعه والنظاره حطها على الجيب والعطر ... والباقي تعرفونه يا شباب اول ما تدخل سلم مو تسلم بالكلام سلم باليد المصافحه المهم ادخل وحاول تكون مبتسم اكيد هم الي بييسون لك المقابله بيحاولون يغيرون لك الجو مثلا يستهبلون عليك او شي حتى لو استفزوك خليك رايق وهادي وعطهم الكلمه وغطاها لا تكثر كلام لانك اذا تكلمت بشي وانت ماتعرفه يمكن يحشرونك فيه وتاكل ملح وخلك واثق بنفسسسك واذا سمعت كلام يمين بالمقابله سوي نفسسك كانك ما سمعت الكلام حتى لو عاده لك الكلمه مرتين او ثلاث وهو مو مهم مثلا يقول فهمت فهمت فهمت كذا لانك لو تقوله فهمت بيقولك وش فهمت ههه لا تستغرب اي شي بالمقابله يمكن يجيك انا سويت مقابله والجميل بالمقابله في احدى الشركات الكبرا دخلت سلمت اول شي قالوه لي ثلث الثلاثه كم ههههه انا عارف المعلومه من زمان جاوبت على طول راحو سكتو ههههه مع استغراب جاه واحد بيستفزني يقولي ذا سؤال ولا جواب ما رديت لين دخل الثاني وغير الموضوع على العموم ما اطول عليكم بس خليكم واثقين من انفسكم وشيلو خوف المقابله من قلوبكم
اما ل البنات .... اذا جيتي تروحين ل اي مقابله خليكي رايقه نفسسسيا حاولي تاخذين كوفي اي شي معك وروحي وانتي رايقه وهاديه اي شي يستفزك لو كحل لو تقولك نعالك لا تستغربين جاوبيها بحكمه وحاولي تتاخرين بالجواب مهما ما كان وبالتوفيق ل الجميع اسف لاني طولت كلامي ....