اسعد الله صباح الجميع
كيفكم شباب وصبايا ( حلوه صبايا ) حسيت اني من الشام
كيفكم كلن باسمه ( خاصه بأهل الجنوب )
المهم يا سامعين اقصد ايها المطلعين الاعزاء
هي نسمات الصباح بل تغريدات العصافير بأجمل البساتين اهديها لكم حبا وشوقا واحتراما ( احلى يا انا ما نيب هين )
قدر الله علي وتخرجت من كلية الهندسه طبعا التخصص هندسه كهربائيه والتقدير جيدجدا والى الان ما قدرت اقدم في ارامكو ولا سابك ... ودخلت هالمنتدى الطيب قلت لعل الله يرزقني بمن يحمل من الخبره يفيد ومن الاخلاق الحميده وحب الخير ما يحدوه للإهتمام بتسجيلي فأحب الناس الى الله انفعهم للناس وله دعوة بضهر الغيب
اسال الله للجميع التوفيق والسداد ولكم بالغ شكري وتقديري

آهلين

أنصحك تحط موضوعك في القسم دآ حيفيدوك كتير,,,حتلآقي إستفسآرآت عن آرآمكو وسآبك

التدريب المهني والفرص الدراسية > الإستفسارات التدريبية والدراسية


https://www.btalah.com/forumdisplay.p...aysprune=&f=51


ربنآ يوفقك,,ويسهل لك طريقك.

السلام عليكم ورحمة الله وبركاته

حياكم الله إخواي الطلاب وألف مبروك للخريجين جميعا ،،
موضوع بسيط أحببت أن أفيدكم به ربما تستفيدون منه بعض الشي ، وربما يكون أحد سلسلة مواضيع أطرحها في شأن الخريجين ،،

الموضوع هو شرح لنظام التوظيف في سابك وأرامكو لأنهما أكبر شركتين وطنيتين في المملكة وكثير من الخريجين مهتمين في هاتين الشركتين ،

أولا :سابك :

كما تعلمون أن سابك تعتبر مجموعة شركات أو مصانع مثل : الجبيل ( ابن زهر ، صدف ، حديد ،..) وينبع ( ينساب ،ينبت، ،،، ) ، كل شركة من هذه الشركات هي عبارة عن شراكة بين شركة سابك وشريك أجنبي مثل شل الهولندية التي تملك نصف شركة صدف وهكذا ،

التوظيف في سابك يتبع شركة سابك الأم أو سابك الرئيسية والتي يقع مبناها في الفناتير ( بالنسبة لمكتب الجبيل) ، وكل شركة من شركات سابك لديه ممثل يتبع المركز الرئيسي ، وظيفة هذا الممثل هو توظيف الشباب في شركته ،

فأنت عندما تقدم على الشركة في موقعها الرئيسي جميع ممثلي الشركات التابعة سوف يطلعون عليها ، وأي واحد يشوف انك تناسبه أو هو محتاج لتخصصك سوف يقوم بسحب اسمك أو كما هو متعارف عليه راح يسوي Shortlist لاسمك ، إذا سوا شورت ليست لاسمك معناته انه حيتصل عليك للمقابلة ، ربما يكون بعدها أسبوع وربما تمتد لشهور ، وهنا يجي دورك بالاتصال عليهم وتذكيرهم ومعرفة وضعك وزي كذا ،

سؤال : ما هي آلية التوظيف في سابك؟
جواب :
1. تقدم عن طريق الموقع
2. الطلب يرى من جميع ممثلي شركات سابك.
3. إذا أحد كان يبغى موظفين بنفس تخصصك وشاف السي في حيسوي شورتليست لاسمك.
4. سوف يتصل عليك إن شاء الله ، إما لاجراء اختبار أو للمقابلة ، (ماني متأكد بس ممكن تعتمد على العدد) .
5. بعد المقابلة واجتيازهاسوف يرسل لك العرض الوظيفي مشروط بالفحص الطبي.
6. بعد اجتياز الفحص ،يكون توقيع العقد وألف مبروك

سؤال : إذا ممثل شركة س سحب اسمي هل ممكن يسحبها ممثل شركة ص ؟
جواب : نعم يقدر بس في الغالب انه حيكلم مسؤول س انه يحتاجك بسرعة مثلا ، أو يكون مسؤول س ما صار محتاجك وهكذا ،

سؤال 2: إذا اتصل علي مسؤول شركة س وأنا ما كنت أبغى هذه الشركة فهل أرفض أم لا ؟؟
جواب : الأفضل لك انك ما ترفض ، واذا مرة ما جات معاك لا تقول له أبدا إنك ما تبغى هذي الشركة وحاول تعتذر انك مثلا تبغى ينبع أو الرياض وزي كذا ،، أو روح لها وريح نفسك

سؤال 3: ما هي الفترة اللي تاخذها الشركة عبال ما يتصلوا عليك ؟؟جواب، تعتمد على الطلب ، أحيانا أسبوعين وأحيانا أشهر ، وأنصحك بالتواصل معهم دائما .

سؤال: هل أقدم في يوم المهنة بالسي في ولا ما يحتاج ؟؟
جواب ، يفضل ، زيادة الخير خيرين ، ولا تجي الا ومعاك رقم الطلب ، عشان إذا سويت مقابلة مع شركة وعجبتهم يأخذوا منك رقم الطلب ويسووال لك شورت ليست بسرعة بدل ما يجلسوا يدوروا على طلبك.

سؤال: عملت مقابلة في يوم المهنة ، ماذا بعد ؟ ..
جواب: إذا عجبتهم بإذن الله عز وجل حيسووا لك مقابلة أخرى مع المدير العام ( جنرال مانجر) وبعدها يكون العرض الوظيفي


سؤال هل هناك اختبار ؟؟
جواب ، بعض المرات ، بس ما أعرف تعتمد على ايش ،

سؤال ، اذا اتصلوا علي ورفضت إجراء المقابلة ، ماذاسيكون ؟
جواب: حيحطو أمام اسمك rejected ويذكروا السبب ( مثلا لقى عرض وظيفي أو ما يبغى سابك) أي أنك رفضت فيصيرما أحد يسحب اسمك من الشركات ، طبعا تؤثر عليك بعدين الا اذا هم محتاجينك فيقدروا يوظفوك بعدين بسهولة،

سؤال : عملت مقابلة مع أحد الشركات ، ما هي نتائج المقابلة؟
جواب :
1. مقبول في الشركة فيرسل لك العرض الوظيفي .
2. غير مقبول في الشركة ، لكنه قد يقبل في سابك ( مثلا مؤهلاته للوظيفة هذي بالذات غير مقبولة لكن يمكن يشتغل في وظيفة في شركة أخرى من سابك )
3.غير مقبول في سابك ،هذا واحد جايب العيد .

سؤال : ماهي صلاحية التقديم ؟
جواب :طلبك في سابك صالح لمدة سنة من التقديم ، إذا مرت سنة وما صار شي يلغى من السيستم ، فيصير تروح وتقدم من جديد .

سؤال : ضيعت رقم الطلب فماذا أعمل؟؟
جواب :اتصل على مكتب التوظيف وأعطيهم رقم بطاقة الأحوال ويعطيك رقم الطلب ، ومنها حاول تسأله اش صار على طلبك

سؤال ، ماذا أفعل إذا لم يتصلوا علي؟؟
جواب: حاول تحدث بيناتك باستمرار ( مهمة) ، واتصل عليهم بين كل فترة وفترة لتعرف اش حالة طلبك هل هو شورتليستد من شركة ولا لسا ماصار عليه شي، وكمان سوق لنفسك بالكلام اذا انت فاهم في حاجة في الكو أب مثلا ،

سؤال: كم هي رواتب سابك :
جواب :
تعتمد على المعدل :
من 2.5 إلى 2.74 : 8836 ريال
من 2.75 إلى 3.49: 9300 ريال
من 3.5 إلى 4 : 9800 ريال

طبعا أضف عليها 25% بدل سكن و 10 % بدل مواصلات ، وخصم ( الأساسي +بدل السكن)* .09 للتأمينات الاجتماعبة،

س
ثانيا : أرامكو
إلى درجة كبيرة يعتبر نظام التوظيف في أرامكو مشابها لنظيره في سابك ، حيث يكون التقديم عن طريق الموقع ، وجميع الإدارات في الشركة تطلع على طلبك وتقوم بسحب الطلب لدائرتها، لتقوم الدائرة بمراجعة الطلبات واختيار الأنسب للمقابلة
لكن قبل ذلك وبعد التقديم بفترة ربما شهر تقريبا سوف يطلب منك إجراء اختبار وهو الأسسسمنت تست وهو اختبار سهل ، وبعدها بفترة ربما شهر أيضا سوف يقومون بالاتصال عليك لإجراء المقايبلة،،

هناك نقطة مهمة عند التقديم عن طريق الموقع وهو أنه عند اكتمال التقديم وإرفاق الملفات وكل شي يجب عليك أن تضغط على أيقونة ريليز أو كومبليت الطلب ، وهي بمثابة اعتماد الطلب ونشره ، عندما لا تضغط هذه الأيقونة فإنك تعتبر غير مقدم لأن الطلب لن يظهر لهم في السيستم،،
أحد الشباب قدم ونسي ما يعتمد الطلب ، بعد سنين جا يشيك الطلب وضغط الأيقونة واتصلوا عليه بشهر تقريبا ، وأنا نفس الكرم قدمت من أربع شهور ولما اتصلت عليهم قالوا إنه ما عندي طلب في أرامكو ، دخلت مرة ثانية واعتمدت الطلب واتصلوا علي بعد شهر تقريبا ،

سؤال / مرت أربع شهور تقريبا منذ قدمت وما أرسلوا لي أي شي ، فماذا اعمل ؟
اتصل عليهم وحاول تكلم المسؤول عن هذا الاختبار وخليه يدرج اسمك فيه ( زي ما سويت أنا) وتأكد إن طلبك كامل وعندك رقم الطلب

سؤال أنهيت الأسسسمنت تست ، ماذا بعد ؟؟
حيتصلوا عليك إن شاء الله بعد فترة بسيطة لإجراء المقابلة

سؤال: ما هي آلية المقابلة في أرامكو ؟
مثل ما ذكرت سابقا ،، الدائرة اللي تكون محتاجة موظفين حيطلعوا على الطلبات وحيتصلوا على المرشحين ،
المقابلة في العادة تكون في يوم مخصص يجمع فيه جميع المرشحين وتكون المقابلات شغالة طول اليوم ،
طريقة المقابلة ممكن تتغير من دائرة لدائرة ،،
بعض الأقسام ممكن يتصلوا عليك يقولوا لك ، يا فلان عندك مقابلة في قسم كذا في دائرة كذا ، مثلا يا محمد عندك مقابلة في قسم الفحص في دائرة الظهران أو خريص ، فهل تود الحضور ،
بعض الأقسام ممكن يتصلوا عليك يقولوا لك عندك مقابلة في قسم كذا في المنطقة الفلانية ( أوسع من الدائرة) مثلا :
يا محمد عندك مقابلة مع قسم الإنتاج في المنطقة الشمالية ( شيبة ، تناجيب، السفانية ، راس تنورة ، ...) وهكذا ،
في الحالة هذي يكون في المقابلة حوالي 6 أو سبع أشخاص من كل الدوائر هذي ( شيبة وراس تنورة ووو) ويسوا معاك المقابلة .

سؤال: سويت المقابلة للحالة الأولى ( اللي حددوا لي الدائرة بعينها ) ما هي النتائج المترتبة ؟1. اجتزت المقابلة ، فيرسل لك العرض الوظيفي ،
2. لم تجتز المقابلة ، عندك فرص أخرى لعمل مقابلات ، حيث يرجع طلبك زي ما كان .

سؤال سويت المقابلة للحالة الثانية ( اللي هي كانت مع المنطقة الشمالية كلها ) ، ما هي النتائج المترتبة ؟
1. اجتزت المقابلة ، يخبروك أن لديك عرض في المنطقة الفلانية ، ولك الحق في الرفض لكن المرة الثالثة يتم استبعادك

سؤال هل ممكن إني أسوي أكثر من مقابلة ؟
نعم بشرط أن يكون اللي سوا لك المقابلة الأولى لسا ما وافق عليك ، يعني اليوم سويت مقابلة مع المنطقة الشمالية ، بكرة ممكن يتصلوا عليك الجنوبية عشان مقابلة ثانية معهم ، إذا أحد منهم أكد انك اجتزت المقابلة في السيستم ، خلاص ما تقدر تسوي مقابلة أخرى لأن اسمك يكون محجوز في السيستم والأقسام الأخرى ما تقدر تشوفو إلا إذا الأولين سحبوا عليك فتقدر تسوي مقابلة ثالثة ورابعة،

سؤال اتصلوا علي ، وقالوا لي عندك مقابلة في قسم أنا مأبغاه ؟
إذا اتصلوا عليك وأخبروك أنك مرشح لمقابلة في قسم معين وانت ما تبغى هذه الوظيفة اما أنها في منطقة لا تريدها أو الوظيفة نفسها ما تناسبك ، فلك الحق بالاعتذار ، وهم سيضعون ملاحظة في طلبك انك ما تبغى هذه الوظيفة مع ذكر الأسباب ، عشان ما يجي أحد عنده نفس الحالة ويتصل عليك ، ولك فرص أخرى حسب الطلب ،

طيب حبة حبة:
سابك : راتب على حسب المعدل .. من 2.5 الى 2.75 ما ادري كم الصراحة .. من 2.75 الى 3.5 9300 ريال .. من 3.75 الى 4 9800 ريال الرواتب هذي ممكن تتغير خلال ايام لأن في كلام عن زيادة و ما ادري ايش. بدل السكن 25% من الراتب بحد ادنى 30000 ريال و ما في حد اعلى.. بدل النقل 10% حد اعلى 1000 .. تأمين صحي بكل المستشفيات بكل مناطق المملكة لك و للوالدين و الزوجة و الابناء لكن المشكلة التأمين ما يبقى بعد التقاعد. طبعاً بعد 3 شهور من استلامك الوظيفة يعطونك 5000 ريال بدل تعيين. البيوت هنا تملك .. يعني سابك تبني البيت و تسلمه لك بقراطيسه .. و تسحب من راتبك 14% الى ان تسدد البيت و تاخذه . الدورات الخارجية: يحق لكل مهندس دورة داخل و دورة برا و مؤتمر برا .. طبعاً اذا كان مديرك ممتاز بتطلع اكثر من كذا. البونص على حسب ... اقل شي راتبين و قد وصلت 4 رواتب .. السنة الماضية كانت 3 رواتب. الاجازة 22 يوم عمل(بدون خميس و جمعة ). برنامج البي دي بي و مستحقا التقاعد بانافشه بعدبن و اسوي مقارنة مع ارامكو .

ارامكو : اقل من 3 الراتب 9500 اعلى من 3 الراتب 10260 .. ما في بدل نقل اذا كنت مو ريموت اريا ..و بكذا صار الراتب نفس الشي لأن سابك عندها الف النقل الزيادة .. بدل السكن 25 بالمية و عندك راتبين بونص ثابتة بالعقد ما تتغير .. و في 0.6 بالمية بدل اجازة .. الدورات كثيير بس كلها داخل ... انا اعرف كثير من ارامكو ما قد شفت واحد منهم طلع برا شغل للشركة ... نادراً ما تشوف واحد زي كذا . الاجازة 35 يوم بس داخلة فيها الويك اند .. البيوت يعطيونك قرض و انت روح ابني او اشتري.التأمين الطبي تختار مستشفى من المستشفيات اللي متعاقدة معها ارامكو و تظل عنده .. و في حالة الطوارئ و رحت مكان ثاني تدفع فلوس و تجيب الفاتورة و يعطيونك حقكو طبعاً يستمر بعد التقاعد. باقي الاشياء نفس الشي بين الشركتين .. لهم تخفيضات بكل مكان و مميزات ثانية كثيرة مشوار اقولها لكن ما تفرق لأنها نفس الشي بالشركتين.
نجي للبي دي بي . كانت تتميز فيه ارامكو عن سابك الصراحة .. بس الان صارت سابك افضل .. طبعاً البي دي بي ميزته انه برنامج تدريبي مدته 3 سنوات و يزيد الراتب كل ست شهور ..ارامكو ييسوون تقييم كل ست شهور لك و يزيدونك على حسب التقييم بس نص الزيادة السنوية .. يعني جبت اكسيلينت بنص السنة ..تاخذ 10 بالمية من راتبك اللي مثلاً يطلع 500 ريال .. يعطيونك 250 ريال.. سابك لا الزيادة ثابتة .. جيد تاخذ 300 ريال .. جيد جداً 500 و ممتاز 700 ريال .. البرنامج جديد و انا ان شالله بادخله خلال ايام . بس البرنامج بسابك مدته سنتين مو 3 سنوات .

نجي للتقاعد .. كل شركات المملكة بما فيها ارامكو تعطلك نص راتب( من اخر راتب وصلت له ) عن اول خمس سنوات من خدمتك و راتب عن بقية السنوات اللي خدمتها .. سابك الدبل .. تعطيك راتب عن اول خمس سنوات و راتبين عن بقية السنوات ..

بالنسبة لأرامكو إذا كنت أقل من 3.0 الBasic salary بيكون 9500 ريال (أتكلم عن تخصصات الهندسة طبعا).. الرواتب الأساسية + مجموع البدلات = 17.6 راتب. أما لو كان معدلك 3.0 فأعلى فالBasic salary بيكون 10260 ريال.. هذا لتخصصات الهندسة. أما تخصصات Geology/Petroleum Engineering/ Geophysics فالراتب الأساسي 10 آلاف للي معدله أقل من 3.0 و10800 للي أعلى من 3.0

أرامكو غالبا في البداية بيحطوك في منطقة نائية، ويمكن يحطوك في راس تنورة أو الظهران.. إذا حطوك في نائية، بيعطوك: 450 بدل مواصلات + 14% بدل منطقة نائية. في overtime طبعا، بما أنك بتشتغل 12 ساعة بدل 8. ما أعرف كم بالضبط، ولكنه بين ألفين إلى أربعة آلاف في الشهر.

الرعاية الصحية أرامكو في مستشفياتهم، في الظهران مثلا، وفيه دورات خارجية وداخلية والشركة مهتمة بدا الشي، ولو توصل لمنصب معين ممكون يودوك Stanford في أمريكا تاخذ دورة في الManagement. أما الترقيات، فممكن ما تواجه مشاكل ولا شيء من البداية، بس صدقني شبه مستحيل توصل لمنصب مرة عالي في الشركة، فيه تمييز طائفي في الشركة، وعنصرية.

سابك.. ما أدري بالضبط، بس الراتب الأساسي أقل من أرامكو + 25% سكن + 10% مواصلات، وطبعا الوظيفة يا في الجبيل أو الرياض أو ينبع. وفيه بونس حسب ارباح الشركه

وسلامتك

1- المناطق النائيه يختلف البدل والاوفر تايم من منطقه إلى منطقه وتعين المهندسين غالباً يكون في الظهران أو بقيق أو رأس تنورة
2-الرعايه الصحيه تكون في مستشفى أرامكو أو أحد المستشفيات المتعاقده معها مثل المانع وسعد والمواساة وغيرها
3-بخصوص ستانفورد هذا غير صحيح وموظفي أرامكو الكبار قديماً كان يتم إبتعاثهم لأحد أقوى الجامعات العالميه للحصول على برنامج تطوير الإداريين

4- بخصوص التمييز الطائفي هذا غير صحيح شوف كم نائب رئيس من طوائف أخرى من سيهات ومن القطيف ومن صفوى ومن الأحساء أنا قلت منصب نائب رئيس فما بالك بمدراء الإدارات ورؤساء الأقسام
عموماً في أرامكو لايوجد عنصريه مثل ماوصفت على قد ماتتعب تحصل
وحتى تشوف مناصب عليا في الشركه يشغلها ناس من أهل الشرقيه ومن الجنوب ومن الغربيه ومن أهل الشمال ومن أهل الوسطى و غير سعوديين

نعم فيه واسطات لكن لا يوجد عنصريه مثل ماوصفت

2-وبالنسبه لقرض أرامكو يصل الى 1200000 ريال بدون فوائد والتسديد خلال 15 سنه وعند سدادك بفتره قصيره يقل المبلغ
(أعرف شخص أخذ مبلغ مايقارب 1200000 وسدد 800000 ألف فقط)
واللي أعرفه أن سابك الحد الأقصى القرض 50 راتب بما لا يزيد عن 800.000 ريال ولا يقل عن 500.000 ريال ,,,كذلك برنامج بيوت التملك يعطونك البيت ويشيلون بدل السكن و يخصم من راتبك

3- في سابك فرص الإبتعاث قليله ومقتصرة على إداراة معينه على عكس أرامكو

برنامج الدراسات العليا في أرامكو
عام 2009 تم إبتعاث :312

برنامج تطوير الاخصائيين sdp
ومدته من 10 إلى 12 سنه إذ أن الخريج من هذا البرنامج يمنح شهاده دوليه ويحصل على مسمى أخصائي
البرنامج يشترط انه يكون المتقدم قد امضى بالعمل في الشركه قرابه السنتين او الثلاث السنوات وان يكون معدله العام لا يقل عن 2.5 من 4 والمعدل الخاص لا يقل عن 3 من 4

طبعا البرنامج هذا مقتصر فقط على دوائر معينه

يحصل الخريج بعد الانتهاء من البرنامج على مرتبه 15* بمسمى أخصائي هندسه
يصل الحد الأقصى للراتب الأساسي لمرتبه 15 47,740 ريال

تخرج من هذا البرنامج عام 2009

24 موظفاً وبذلك بلغ عدد خريجي هذا البرنامج منذ نشأته 123 مهندساً وعالماً في

مختلف التخصصات , ويوجد 310 موظف بالبرنامج تحت التدريب

فقد قدمت أرامكو عام 2009 بطلب 38 براءة إختراع ,وحصلت على 9 براءات إختراع ولاتزال 142 براءة إختراع قيد النظر




4- الإجازه لموظف أرامكو 38 يوم في السنه ولا يحسب أول ويكند يعني بالإجازة

5- أغلب المهندسين في أرامكو يعطون سيارات (وانيت أو كابرس أو لاندكروزر ,,,,,)

6- فرق كبير بالنسبه للرواتب الأساسيه ويلاحظ هذا في المستقبل أي بعد 15 أو 20 سنه
أي عند مقارنه مرتبه 14 في أرامكو مع مقابله 13 في سابك تجد الفرق علماً أن مرتبه 14 في أرامكو موظف عادي أي أنه ليس مشرف أو ناظر بل بمسمى وظيفي ((مهندس أول)) فقط
وعند مقارنه الحد الأقصى لكلا المرتبتين نجد أن الفرق 7500 ريال لصالح أرامكو

الله يعطيكم الف عافيه وربي يجزاكم الف خير على التوضيح
كم نحن فخور عندما نجد من اخواننا واخواتنا وابناء بلدنا من يقدم مثل هذا الدعم السخي والاهتمام الرائع رغم عدم معرفته بالسائل
..... اخي القدير انا الان عقدتي في التسجيل عن طريق الموقع
فهل يمكن لمن لديه خبره ان ارسل له الCV ويخدمني في ذلك مشكورا

من ناحية الرآتب الآساسي : أرامكو أعلى من سابك بـ حول 300 ريال .. يعني ولآ شيء

من ناحية البونص .. أرامكو ثآبت آثنين فقط .. سابك على حسب الآرباح و عادة 3 روآتب

من ناحية التدريب و الكورسات .. سآبك أفضل لآنهآ تدربك تدريب مستمر .. أرامكو عند الحاجة

في أرامكو .. آنت فيلد آنجنير ..

من ناحية التأمين الطبي .. سآبك شآمل مستشفيات و مستوصفات كثير لكن بعد التقاعد يروح التأمين .. أرآمكو .. تحدد مستشفى واحد أو آثنين و بـسسس

من ناحية القروض و السكن .. أرامكو أفضل و بـ فآرق كبير

من ناحية الدوام .. سآبك دوآم أريح .. ضغوط أخف من أرامكو

سآبك أضافت برنامج الـ PDP للمهندسين و مدته تقريبآ سنتين و نص .. أرامكو 3 سنوات

الآجازات .. 35 يوم .. لكن أرامكو تحسب لك الويكند .. يعني لو تبي 3 أيام آجازة و آخذتها الآربعاء .. بتصير الآربعاء - الخميس الجمعة .. ..

أرامكو تشتري منك الآجازة آذآ تراكمت عندك و ما آستخدمتها بتطلع لك بصفقة



أرامكو .. 17.6 راتب = 12 راتب شهري + 3 بدل سكن + 2 بونص ..

سابك .. × = 12 راتب شهري + 3 بدل سكن + × بونص

البونص عادة من 3 - 4 رواتب .. يعتمد على أرباح الشركة



بالنسبة للدورات و الكورسات .. اليومية في سابك بـ 650 ريال

أرامكو حول 350 ريال


يعني لو طلعت كورس مدة 10 أيام .. رآح تصفق لك 6500
و كورسات سسسآبك أنواع الدلع

أما كورسات أرامكو .. كأنك حاضر وحدة من محاضرات مركز التوجيه و الآرشاد .. يوجد مرطبات



في نقاط .. الآخوان أسهبوآ فيها بالآعلى

.
.


هذآ ما أعرفه .. آن آصبت فمن الله و آن آخطأت فمن نفسي و الشيطان