[align=right]

*.. السلام عليكم ورحمة الله وبركاته
اول حاجة انا مُتابع ل مشاريع وافكار من قبل رمضان اللي فات .. بس ماقد فكرت اسجل .. كنت اعتقد ماعندي المعلومات اللي ممُكن يستفيد منها احد .. و كنت اشوف بعض الأعضاء هِنا -الله يهديهم- يرفعون ضغطي في طريقة سردهم .. افتكر شخصين منهم .. واحد منهم اللي كان مسافر الصين .. و موضوعه كان مثبت ل فترة قريبة .. يعني انت عندك معلومة او تجربة .. مايحتاج تتكلم عنا و تجلس تهذر فوق راسنا و تنصح فينا و انا الولد اللي مافيه مثلي .. و الحياة و بلا بلا !! أكيد فهمتوا مين اقصد .. ماعلينا .. هذا الكلام كان في خاطري ..



طبعا ً انا راح انقل لكم تجربة اخوي الكبير ف التجارة و بحكم قربي من المشروع و درايتي عن كثير من المصاعب و المشاكل ..
اتكلم لكم عن اخوي شوي .. وكيف بدأ ب التجارة اقدر اقول اقدار سُبحان الله
اخوي موظف عادي ف جامعة الملك عبدالعزيز .. من اول ما اتوظف وهو شغله الشاغل مشروع يغنية عن الوظيفية الحكومية .. و يحقق له حياة كريمة
بدأ مشروع الخضرة .. عن طريق حارس العمارة المستأجر فيها .. راعي العمارة(الشايب) اللي كان ساكن فيها كان عنده عامل في مزرعة في منطقة قريبة من المدينة .. لكن الشايب خسر و تعب و ماقدر يتابع المزرعه ف اظطر يقفل المزرعه و يجيب العامل اللي تحت كفالته جدة وحطه حارس ف العمارة اللي ساكن فيها اخوي .. والموية كان تنقطع كثير عن العمارة .. المُهم المُستأجرين كانوا متفقين فيما بينهم انه كل مرة واحد منهم هو يروح ل التحلية و يجيب الوايت .. واللي يروح ياخذ الحارس معه و يحطه هناك عند التحلية (الأشياب) و الحارس يجي مع راعي الوايت ..
مرة كان دور اخوي اخذ الحارس معه و رايحين الاشياب .. المهم اخذتهم السوالف يمين يسار الين ما قال له الحارس انا طفشت هِنا و ابي ارجع اشتغل ف المزارع و انها ربح و فيها فلوس و زي كذا
الين ما اخوي جلس يطبخ الفكرة في راسه اسبوع .. وبعد اسبوع كلم راعي العمارة و اخذ الحارس و راح يشوف المزارع و كيف و زي كذا .. المهم انه قرر يبدأ ب مشروع مزرعة ..


و كلم راعي العمارة (الشايب) على اساس ينقل كفالة الحارس .. لكن رفض وقال اذا تبية شغله عندك لكن تحت كفالتي .. المهم ف البداية اضطر انه يقبل .. وراح يبحث عن مزرعه ف هالمنطقة 250 كيلو تقريبا عن المدينة و جدة بالنص.. وعن طريق الحارس و الشايب .. حصل مزرعة استأجرها ب مبلغ 50 الف في السنة .. كنت اقول ل اخوي هذا مبلغ احس كثير على هالمزرعة .. كان يقول انت ف بداية المشروع لازم ينضحك عليك شوي الين تتعلم .. انت جديد على هالمجال .. وبكذا بدأ المشروع و له الحين 3 سنوات و ماشي ف الرابعة .. واجهتنا كثير من المشاكل و الربح .. ولكن عن تجربة ربحها لا يإتي الا من بعد مشقة ..


اعتذر عن ردائة الاسلوب و السرد .. ف مُخي كثير مواقف و افكار .. لكن موب عارف الطريقة المناسبة عشان اوصلها لكم ..
فَ كيف حابين اذكر باقي التفاصيل .. كذا الاسلوب اوكي .. و لا اذكر السلبيات و الايجابيات ب نقاط زي تغريدات تويتر ؟!


سبحانك اللهم وبحمدك استغفرك و اتوب اليك [/align]