في البداية احب اقول كلمة


انا اخوكم ابوخالد
مقيم في هالبلد الطيب
ولدت وترعرعت وعشت عمري كله هنا
واعتبر نفسي واحد من اهل هالبلد
ويؤلمني كيف ان كثير من عيال البلد عاطلين وتاركين الذهب ومشاريع الخير حولهم



ابحكي لكم تجربتي ولكم الحكم


لكل شخص عنده راس مال وجالس يفكر وش يسوي مشروع ..
كل يوم تلقاه من زاوية لزاوية
يطارد التجار يتمنى يعرف اسرار نجاحهم
يتابع المنتديات وينثر مواضيعه يشحذ الافكار
كم من شخص هنا نشوفه يمتلك راس مال ويتمنى ان يلحق بركب التجار واصحاب الملايين

كل يوم يمر وراس المال هذا لم يتحرك
وبطلنا لايزال ينتظر
بل انه ممكن مع الوقت تبقى تصرف وتصرف في راس المال هذا لين يضيع وينتهي


كل يوم يسمع التوصيات والتوصيات
يسمع هذا يقول له ادخل بفلوسك هنا
وواحد يقول له اشتر المحل الفلاني
وهذا يقول له ادخل المجال هذا بتكسب ذهب

وطبعا بطلنا لايفقه شئ في كل هالمجالات
وللاسف كثير خسروا فلوسهم بناء على توصيات وتوصيات


قاعدة كبيرة تقول " نشاط ماتفهم فيه اهرب عنه "

اتذكر صديق لي قبل فترة
كلموه كثير عن نشاط الدخول في المناقصات خصوصا الحكومية وانه يدخل ذهب
طبعا الرجل ماكان يفهم وش مناقصات ولااسرارها ولامشاكلها
بس فتح مؤسسة مقاولات وجاب كم عامل
واتجه لواحد من الربع زحلق له مناقصة
وللاسف الرجال متورط الى يومكم ديون بسبب هذه المناقصات


كلامي لايعني ان المناقصات خسارة
ولكن شغل ماتفهم فيه لاتقربه
وانتبه من بعض الي يوصيك على سلعة او مشروع
لان في هالزمن بعض الناس تلقى عنده مشروع يمدحه ويطيره السماء
وممكن يلزقه فيك ويخليك تشتريه وتتوهق
وهذه حقيقة
لان المثل يقول : لو كان فيه خير ماكان رماه الطير



وبعيدا عن كل هالامور
احب اذكر لكم تجربة لي اعتبرها زي ماكتبت لكم بالموضوع : انها طريق الثراء السريع
لاتخافون
ماراح اقول لكم تعالوا اشتروا مني شئ
ولاابقول عندي محل اشتروه
ولاابجبر احد يدخل هالمجال بس والله من محب للخير يتمنى الخير للكل


انا تقريبا قبل 5 سنوات
دق علي واحد اعرفه معرفه وسط
وقال لي ياابو فلان تكفى فزعتك

قلت : امر
قال كان عندي عمارة كبيرة واستاجرها شخص لمدة سنتين كشقق مفروشة بسعر 200 الف
والان الشخص يبي يسلمها
ويقول انا مااعرف شئ بالشقق المفروشة وابي فزعتك
ويقول تكفى شوف لي اي مستاجر ياخذها لو بـ 180 الف


قلت له : يااخي لاتاجرها خلك انت شغلها وابساعدك انا
وفعلا استلمنا الموقع
وصفى الرجال الي له والي عليه
وكان باقي عليه مبلغ قال خلاص استلموا الموقع بكل مافيه وفكوني

وفعلا
استلمنا الشقق بترخيصها وكان فيها 4 عمال نظافة
ومحاسب عربي
وطبعا عدد الشقق كان 20 شقة
4 ادوار
ومصعدين
واستقبال


طبعا اخوكم وقتها كان يطقطق في بعض الشغلات الجانبية
يعني اشبه بعاطل


استلمتها انا
وكان الوضع بيننا اخوان وكأن الحلال واحد
لاقلت له ابي راتب او نسبة او اي شئ


وبدينا نشغل الموقع

اول شئ قلت له رح بع سيارتك
كان معه جيب على وقتها يسوى 200 الف
وباعه فعلا
وغيرنا كل الشقق الى سيراميك واثاث جديد وغرف نوم جديدة
وطبعا كان لي بحثي عن المصانع والشركات الي اخذ منهم بالجملة
واخذ احيانا بطريقة الاقساط
والمهم خلال شهر واحد قلبنا الشقق كلها الى موقع جديد غاية في الروعة والنظافة



اتذكر في صيفية واحدة كانت مدتها 3 شهور
كانت ارباحنا صافية 230 الف ريال بعد كل الالتزامات


الرجال كان يقول لي خذ الي تبي وكان يحرجني
قلت له لا ماابي كذا
ابيك تعطيني بس من الارباح 20% شهريا
ووافق


طبعا كنت اصفي شهريا حوالي من 9000 - 12000
حسب الشغل
وكنت ماسك الادارة والاستقبال
وجبت موظف يساعدني بس اثناء الليل


مرت الايام والرجال انطنخ
واشترى بيت
وسيارة اخر موديل
واشترى سوبر ماركت كبير
ثم اشترى استراحة
وبدت النعمة تمشي معاه


وللاسف جاني بيوم الظاهر كان طفشان من وضع السوبر ماركت الي عنده
لانه اشتراه بدون مشاورة وكان كله خساير
واقول له بعه وخلنا نستفيد من فلوسه ورافض
الين ماصار دخل الشقق يغطي خساير السوبر ماركت
المهم اقول لكم جاني يومها طفشان قال ياابو خالد : المعذرة منك
النسبة الي تاخذها ابنزلها لـ 10 %
قلت له ليش ؟
قال : يااخي ماش ماعاد الدخل زي اول
قلت له : ترى عندنا برنامج محاسبة وتعال نشوفه
الدخل زي ماهو وبالعكس كل سنة افضل


المهم قلت له : ابشر
تقديرا لصداقتنا
واعطيته فكرة
قلت له : وش رايك انا اباخذ منك الموقع بنفس الي كان ماخذه المالك الاول
طبعا المالك الاول كان يدفع له 200 الف ريال سنويا
قلت له انا ابعطيك شهريا 25 الف
قال : لا ابي 30 الف
قلت له ابشر ولايهمك

بس شرط عليه بعض الامور
قلت له نبي نطور الموقع اكثر

قال كيف ؟
قلت له : ابي اضيف اجنحة ملكية واجنحة عرسان
وكانت فيه شقق كبيرة جدا قسمتها بطريقة احترافية الى شقتين وبكذا صار عندنا 28 شقة

وفعلا
خليته يوقف من سحب الارباح
وصرنا نضبط الشقق وضبطنا اجنحة فخمة واجنحة زواج
وحطيت طبعا 4 شقق خاصة تعبنا عليها ديكورات واضاءات وغرف واثاث راقي وتعتيق ومكيفات مركزية وشاشات بلازما
لدرجة ان الجناح الواحد كنا نأجره بمبلغ 1000 ريال في الليلة
وكان مايوقف


تخيلوا يااخوان ارتفعت الارباح بشكل كبير


بديت انا احرك نفسي الصبح
واروح لشركات طبية واعطيهم عروض تسكين
وشركات هندسية اعطيهم عروض تسكين لمهندسينهم وعائلاتهم


بعدها قلبت الشقق الوسط الى سويتات حلوة لان كثير من الاجانب يرغبوها


تعاقدت مع جهات حكومية
حطيت خصومات للعسكر " خصوصا العسكر يتنقلون دايم دورات وغيرها "


وسبحان الله كونت شبكة زباين كبيرة
وعلاقات


وقت الصيفية كنا احيانا نأجر الشقة مرتين او 3 مرات
بحكم ان موقعنا كان يعتبر طريق دولي وكان ممكن يجيك عابر ينام الى الفجر ثم تأجرها مرة ثانية بعد خروجه


رفعت طاقم العمالة الى 6 اشخاص
وسويت لهم شفتين مدة كل شيفت 12 ساعه

العمال كانوا يستلمون مع المالك الاول راتب : 600 ريال
ورفعت رواتبهم الى : 1200 واعطوني عمل غير عادي

ورجع صاحبنا يعطيني 15 % من الارباح رغم اني الي شايل كل شئ على راسي
ومع ذلك لاحظوان انه نزلني من 20% الى 15%


واصبحت الارباح خيالية
ورجع صاحبنا يخبط من جديد واشترى مصنع مياه
وللاسف انلعب عليه كالعادة
ورجع يغطي الخساير من جديد على ظهر الشقق


رجع هالمرة بشئ حطمني فيه تماما
قال : ياغالي انا ابعطيك راتب بدل النسبة
قلت له : من جدك ؟
قال : اي والله مااقدر على النسبة
قلت كم بتعطيني خصوصا ان نسبتي كانت تصفي لي الى 11 الف

قال ابعطيك : 3000 ريال

قلت له اسمع الله يسلمك
ماابي اقول لك وش سويت انا للمكان
بس عندي لك حل
اعطني اياه ايجار زي ماوعدتني اول وابعطيك 30 شهريا

قال : لا ابي 70 شهريا


قلت له : هذا اخر كلام
قال : اي والله واذا ماجاز لك الله يستر عليك

وفعلا تركت المكان
ووكلت امري لله

لان هالانسان خدعني بطريقة وصخة

كثير زباين وشركات تركوا المكان مجاملة لي
وراح جاب له 2 موظفين
وحاليا والله ياناس هالموقع تقل كنه مهجور
صار الوضع زفت


يتصلون علي العمال يقولون نزل رواتبنا الى 700 ريال
ويقولون الزباين كلها تسال عليك دايم


وربك سبحانه موجود وينظر الى الي سواه فيني


الي عرفته مؤخرا انه الان مديون بسبب مصنع المياه

رغم اني كنت انصحه بالارباح الي كنا نحصلها نسوي لنا عمارة ثانية ونفتح فرع جديد للشقق
وماكان يسمعني




والله يااخوان مشروع التسكين والشقق ذهب ذهب ذهب
يبيلها مخ
وادارة ومتابعة
والله تغنيك عن الف وظيفة حكومية

وظيفة تخليك ملك
متى ماصارت انسان حق شغل
وانسان تعرف كيف تصنع نفسك وتصنع مكانك

مو ضروري تكون عندك عمارة
ممكن تستاجر
بس تكون ذكي
تعرف الموقع المميز
تعرف كيف تحسب ارباحك
كيف تتميز في شققك عن المنافسين
كيف تخلي العميل يرجع لك غصبا عنه بسبب المكان وروعته والتعامل


نظافة الشقق
ريحتها
هذه امور مهمة
كيف تعرف مصاريفك
كم رواتب العمالة
كم تكاليف الفواتير
الصيانة
صيانة المصاعد



واي استفسار تحتاجونه عن هذا المشروع انا حاضر

طيب موضوع مفيد للاشخاص الي ميزانيتهم بالمليون و فوق
اما احنا فمكانك سر

الله يوفقك اخوي بوخالد ..

قلت من ضمن كلامك ..

اقتباس:

المشاركة الأصلية كتبت بواسطة المشروع المبارك دخل معك 5 اشخاص وكان كل واحد بيدفع الاتي : ناصر : 5 الاف = 5% من الارباح فهد : 9 الاف = 9% من الارباح محمد : 22 الف = 22% من الارباح نبيل : 3 الاف = 3% من الارباح رائد : 41 الف = 41% من الارباح انت " صاحب فكرة المشروع " : 20 الف = 20% من الارباح بكذا كملنا راس مال المشروع 100 الف وراح توزعون فيما بعد نسبة الارباح حسب مبلغ كل واحد زي ماوضحنا فوق

بالنسبة للي حددته باللون الأحمر .. ( ابغي شوية توضيح منك ) ..

هل يصير توزيع الأرباح علي كل واحد فيهم حسب المتفق عليه مع ان نسبة شغلهم مختلف وابداعهم في العمل مختلف ومتفاوت ...

لنفرض ان رائد مشغول وما يشتغل إلا الشي البسيط وما عنده اي همة او افكار اوقدرات مثل محمد هل من المنصف ان ياخذ رائد 41% ومحمد 22% رغم ان الأرباح لم تتحصل إلا بجهد محمد بعد الله .. كمثال فقط .. ؟؟؟

انا مررت بتجربة شراكة للاسف ووقعت في ظلم شديد .. هناك من هو مبدع في عمله وهناك من هو اقل ابداعا واقل كفاءة هل من المنصف ان يتساوون في النسبة عند توزيع الأرباح ؟؟؟ هل في طريقة تحل هالإشكالية من واقع خبرتك ؟؟؟؟؟

الله يوفقكككككككككككككك

الله يجزاك خير


انا عندي شقق مفروشه في الرياض وفي الخبر وابشرك الأن اخذت لي عماره في جده وبادي اقسمها


لكن سالفة 200 الف ايجار اسمحلي هالكلام قبل تقريباً 7 سنوات وعدد الشقق اقل من اللي انت ذكرتها


الأن جيب لي عماره ايجارها 200 الف بشرط يكون فيها مصعد واقدر اقسمها وخذ من عندي 100 الف حق سعيك



ولاتزعل مني تقبلها بصدر رحب الهدف واضح من العنوان

بمعنى انا انسان املك خبره في إدارة الشقق المفروشه يعني بالعربي الفصيح راسلوني ولي نسبتي


بس حاب انصح الاخوان

ترى الشغله جداً سهله ولاتحتاج ذكاء واسهل إداره في المشاريع هي إدارة الشقق المفروشه اللي يبي يبداء يتوكل على الله ولايسلم عقله لغيره ولا ماله لغيره وبيرزقه الله

صحيح تعبها في البدايه في التقسيمات والتأثيث والديكورات وغيره لكن تعب منسي

في النهايه مريحه جداً ومشروع جبار

سم في العسل بذكاء خارق
ممكن يصير وممكن لا

؟؟؟؟؟ !!!!!!!