السلام عليكم ورحمة الله وبركاته
موضوعي عن بطاقات سوا تشتريه بالجملة وتبيعه على المحلات والمحطات
طبعا مشروع قديم ومعروف ومنتشر
قرات عن هذا المشروع كثير فوجدت مجموعه تؤيده واخرى تعارضه وحقيقة نسبة المعارضين ليست بقليله
طبعا انا باتناول المعارضيين وحججهم لنتناقش حوله وكل واحد يبدي وجهة نظره فيه خاصة وفي المشروع عامة
حجج المعارضين تنحسر في الاتي تقريبا :
1 - الربح قليل بالهللات يعني مشروع غير مجدي لاصحاب رؤؤس الاموال الصغيره
2 - صعوبة التوزيع
3 - التعب والجهد الزائد
وجهة نظري حول حجج المعارضين كالاتي :
1 - الربح معقول مقارنة براس المال على سبيل المثال انا انوي ان ادخل بعشرين الف وعشرين الف يكون ربح في الشهر 1800 وهذا ربح معقول جدا لان لو قلنا بتدخل على سبيل المثال بالعشرين الف شريك في مغسلة ملابس راس ماله 60000 راح يكون نصيبك من الارباح في الشهر تقريبا 1500 ريال " ذكرت مثال مغسلة الملابس لانه مشروع كنت بادخل فيه وحسبته لذلك ذكرته بالتحديد "
يعني بالمثال يتضح ان سوا افضل من ثلاث نواحي الاولى الربح اكثر الثانيه راس المال تستطيع ان تسترجعه في الوقت الي تبي لان دورت راس المال في سوا يوميه الثالثه ان مافي ايجارات ولا عمال ولا رخص ولا قلق
2 - مشكلة التوزيع سهل التغلب عليه بانك تنزل هلله عن السعر يعني انا رحت للمحطه الي قريب من بيتنا وسالته لو اجيب له يشتري ما عطاني وجه البنقالي وقال وهو رافع خشمه انا في صديق يبيع ما يبغى قلت له انا ينزل عن سعر صديق هلله بعدها قام ياخذ ويعطي معي وتغير اسلوبه وفي الاخير قال لي خلاص انا يخلي صديق يولي واشتري من عندك عشان انت ارخص
اذا مشكلة التوزيع سهل التغلب عليه بالاسلوب وبتنزيل السعر
3 - بالنسبه للجهد والتعب فارى انه جهد وتعب مقبول نسبيا يعني الشغله بالكثير ما تاخذ منك ساعتين باليوم يعني في سعوديين متوظفين على 1800 ومداوم ست سبع ساعات هذا المشروع ساعتين ونفس الدخل وممكن اقل من ساعتين اذا لقيت محطات ومحلات قريبه من بيتكم برضو فيه فكره انه مثلا لو تشوف اخوك او اي واحد يدخل معك بنفس مبلغك وتصيرو شركاء وانت تروح يوم وهو يوم او مثلا واحد يجيب البطاقات والثاني يوزعه يعني تقسمو العمل وكذا اريح برضو وما تاخذ وقت كثير
هذي وجهة نظري الشخصيه علما اني لم ابدء في المشروع الى الان ولكن كلامي هذا مبني على المعلومات الاوليه التي توفرت عندي وبالطبع لو في واحد مجرب تكون وجهة نظره اقرب الى الصواب
بانتظار وجهات نظر الجميع

وعليكم السلام
اخي المشروع فيه خير اكثر من ما تتوقع

وتوكل على الله ولا عليك من كلام الناس

واذا تحب المشاركه ما عندي مانع علما ان راس المال المتوفر لدي 500 الف ريال واكيد كل ما زاد المبلغ قلة التكلفة

وايضا التصريف علي ولي خبره كبيره فيه

المطلوب منك فقط ان تبحث عن اقل سعر جمله

السلام عليكم

انا لي تعليق بسيط على هالنقطة

2 - مشكلة التوزيع سهل التغلب عليه بانك تنزل هلله عن السعر يعني انا رحت للمحطه الي قريب من بيتنا وسالته لو اجيب له يشتري ما عطاني وجه البنقالي وقال وهو رافع خشمه انا في صديق يبيع ما يبغى قلت له انا ينزل عن سعر صديق هلله بعدها قام ياخذ ويعطي معي وتغير اسلوبه وفي الاخير قال لي خلاص انا يخلي صديق يولي واشتري من عندك عشان انت ارخص

هنا صديقه البنقالي بيجيب له بطاقات وبيقول له انا حصل نفر سعودي بسعر اقل وبيزعل البنقالي ويحاول يكسر سوقك وينقص 5 هللات او 10 هللات

اذا ما باع لصاحبة براس مالها لاخساره ولا ربح لأنه متعامل مع 200 محل

هذا النظام لما يحصل منافس ببقالة فلان ينزل له السعر وكل مايجي ينزل له السعر


ليه اقول لك هالكلام لأني واجهت نفس المشكله مع بنقالي

كان عندي محل أسماك مجمده وفتحت مع البنقالي بنفس الوقت حاول يضربني بتنزيل الاسعار وعادي انزل معاه

الى درجة ان دخل المحل كان لايذكر 150 ريال بالشهر صار الموضوع عناد

قلت انا اوريك وانزل السعر الى اقل وصرت ابيع بخسارة هو ما قدر ينافسني

واتحمل الخسارة من راتبي شهر وهو متحمل شهرين ثلاث اشهر وبني بنقال يساعدونه مره يشترون من عندي ومره من عنده بس اخر شئ خلاص استسلم وجا يتفاوض نوحد الاسعار

واسحب عليه وعقبها بشهر سكر محله واخذت محله بيع لحوم ودواجن مجمده

طبعاً سكرت المحلات وكان فيها خير الحمدلله لكن مشاكلها كثيرة خصوصاً انها تحتاج مراقبة مستمره

انتبه من المنافسه بتقلل ربحك من 1800 بالشهر الى تقريباً 400 ريال ويمكن اقل

هذا سيناريو احتمالي ممكن يحصل معاك ممكن لا ممكن يقول حصلت بطايق ارخص ويطلع البنقالي يدور على غيره بس اشك انه بيسكت للموضوع

حبيت افيدك بهالموضوع تمنياتي لك بالتوفيق اخي الكريم

فعلا اخوي وائل الدوسري نقطتك جدا مهمه
شكرا لك

الأسعار بالجملة ٩.٦٧ للمكاتب المعتمدة وهي تبيعها بسعر ٩.٦٨

أما للأفراد فالسعر ٩.٦٨ طبعاً فئة عشرة سوا

بالتووووفيق

السلام عليكم اخواني اخواتي في المنتدى

بالنسبة لبطاقات السوا ففيها خير كبير لا يعرفه الا من دخل في هذا المجال

راح اتكلم على جزئين راس المال القليل وراس المال الكبير:
- راس المال القليل طبعا صعب انك تشتري من الموزع الرئيسي الا وهو شركة سيل للسوا
و زونك للزين اما موبايلي فلها موردين كثير
لان اقل كميه 20 كرتون يعني 200000 ريال وعلى كذا تنجبر تشتري من الموزعين الصغار الموزعين في البطحاء وغيرة
اهم شرط عند اصحاب البقالات تنوع البضاعه يعني توفر سوا زين موبايلي لانه بكذا راح تريحة كثير
ويتعامل معك
اسعار الشراء : سعر الشركه كان 9.63 للسواء طبعا من شركة سيل الموزع راح ياخذ منك هللتين الى ثلاث بالكثير ولو كنت عميل راح ياخذ هلله وحده
الان السعر زاد على حسب اخر خبر وصل الى 9.65 يعني بزيادة هللتين والموزع ياخذ هللتين يصير كذا 9.67 ريال
ال20000 بتجيب لك 2068 بطاقه سوا فئه 10ولو كان ربحك ثلاثه هللات فقط يكون دخلك اليومي
62 ريال طبعا المبلغ هذا تقدر تصرفه على خمس بقالات فقط ويكون الدفع كاش لان بطاقات السواء
ما فيها بالاجل
اذا كنت مجتهد تقدر تصرف اكثر من كذا يعني مرتين او ثلاث تروح للموزع وتشتري وتوزع وترجع تشتري
الموضوع متعب ويبيله اجتهاد وفيه خير كبير احسن من مية وظيفه


الان عن راس المال الكبير وهو الذي لا يقل عن 500000 ريال

استخراج تاشيرات وعماله وسيارات توزيع
بالامكان البداية بسياراتين وتصريف يومي لا يقل عن 300 الف ريال للعاملين مبدئيا
انت تشتري مباشره من الشركات الموزعه
البيع بالامكان البيع بالمحل او التوزيع والاثنين يكون افضل
300000 ريال تجيب لك 31088 بحسبه للبطاقه 9.65 ريال
ربح من 3 الى 5 هللات
نفترض ان الربح 4 هللات 0.04*31088=1243 ريال يوميا
يكون الشغل 26 يوم الدخل لا يقل عن 32000 ريال
حسب اجتهاد العامل واسلوبة والتوزيع
طبعا رواتب الموزعين عاليه لا تقل عن 3000 بعضهم 5000اضافه للنسبة من البيع والتصريف


اذا افترضنا عاملين براتب 10000 مع النسبة مصاريف بنزين وغيره 3000 للسياراتين
ايجار محل 2500 متبقي 10000 ريال على اقل تقدير

ملاحظات :
دوره راس المال سريعه
بالامكان الشراء والبيع لمحلات البيع بالتقسيط بربح هلله او هللتين وكاش
والشراء بسعر 9.63 ريال
الانتباه وتحذير العمال من ترك السياره مفتوحه او بعيد عن اعينهم


اتمنى لكم التوفيق