[align=center]نصائح واراء[/align]
* نصائح ماقبل السفر :
١- اختيار الوقت المناسب للسفر وانهاء اجراءات التأشيره والتذكرة من اجل الحصول على سعر جيد للتذكرة
٢- انصح بالسفر دائما على الخطوط السعودية لانها مناسبه لنا والترانزيت فيها شبه معدوم الي بيسافر من جدة يوم السبت دايركت على قوانزو ومدة الرحلة ٩ ساعات و٥٠ دقيقة وباقي الرحلات ترانزيت للرياض لمده ساعه ونصف تقريبا مدة الرحلة بترانزيت الرياض تقريبا ١٢ ساعه وكسور
اما الخطوط القطرية والاماراتية وغيرها الترانزيت يوصل بالساعات في الذهاب والعودة .
٣- حاول تسوي لك قائمة مشتريات عن طريق زيارة بعض المواقع الالكترونية مثل موقع علي بابا وميد ان تشاينا
وتقارن بين الاسعار لانها تختلف وتتواصل مع البائعين عن طريق الايميلات وحاول انت تكون في المدن القريبة من قوانزو .
٤- بعد عمل قائمة مشتريات حاول تقارنها بالاسعار هنا عشان لاتنصدم بالواقع بعض الناس يشتري من الصين ويرجع وينصدم ان السلعة الي جابها هنا سعرها اقل لعدة اسباب منها ان التجار جابوها بكميات وحصلوا على سعر مناسب افضل منك او اخذوها استوكات مصانع او جودتها اقل .
٥- حدد مكان اقامتك في الصين حسب قائمتك مثلا انا اماانزل الا قوانزو او اي مدينة قريبة منها مثل شينزن وفوشان
ومكان الاقامة قوانزو.
٦- البحث عن مكتب مناسب عشان المترجم و الشحن وغيرها
* نصائح مابعد الوصول لقوانزو :
١- اختيار مكان السكن المناسب والقريب من اغلب الاسواق والمطاعم العربية لسهولة التنقل .
٢-تقسيم جدولك اليومي حسب قائمتك فهناك الاسوق متخصصه وكبيره وعالم اخر .
٣-الشعب الصيني شعب محب وودود والابتسامة تعني لهم الكثير .
٤- ٩٩،٩٪ من سائقين التكاسي لايجيدون الانجليزية لذلك يفضل الاحتفاظ بكروت المحلات مع الكتابة عليها بالعربي مثلا سوق الشنط عشان لا تتلخبط ، والتكسي يكفيه تعطيه الكرت ويشغل العداد ويمشي ، تكلفة التكاسي غير باهضه يفتح العداد عندهم ١٠ ين في قوانزو وشينزن اعتقد ١٢ ين .
٥- كثير من الناس يقول ان الصينين نصابين وهذا غير صحيح لان شعبنا يحب يكاسر الين يدوخ
تكاسر كثير تاخذ جودة اقل وخاصة في عالم التقليد الساعات والشنط والملابس والاقلام ، ولم اتعرض للنصب الا لمره واحدة بسبب غلطة صديق كان معاي .
٦- المطاعم العربية نسبيا اسعار الاكل غالي بالنسبة لوجبة الافطار دائما خذ معاك من هنا اغراض الفطور تست وجبنه وبعض الشكولاتة والقهوة والتمر ولاتنسى تاخذ دلة صغيره تطبخ القهوة طبختها اول مره في قدر هههه .
٧- المطاعم العربية كثيره ومنها حضرموت والضيافة والسدة والبسفور وغيرها المهم عدم الاحتكاك بالعرب هناك وخصوصا عند السدة سلام وعليكم السلام .
لنا لقاء اخر بإذن الله

[COLOR="Red"]سوق الشنط المقلدة[/COLOR]
كما ذكرت سابقا ان لي اصحاب يعيشون في قوانزو منذ سنوات ومصدر رزقهم الشنط المقلدة بدرجات عالية وكذلك الساعات وبالمفرق وارباحها جدا ممتازه لذلك نصحوني بالعمل فيها ، توكلت على الله ونزلت السوق معاهم حتى اتعرف على المحلات وخصوصا ان لهم تعامل مع المحلات الممتازه امتدت لسنوات .
سوق الشنط المقلدة عبارة عن عماره ضخمه الدورين الاوله معارض ومحلات وفي الادوار العلوية مكاتب للمصانع ومعارض لبقية المنتجات الغير معروضة في المحل .
الشنط المقلدة عالم واسع جدا ويكثر الاحتيال والنصب فيه لتنوع المصنعين والخامات .
*درجات التقليد :
١- تقليد رديء جدا ولو بريال مااشتريه.
٢- كواليتي : بضاعة اشبه ماتكون بالرديئة في الخامات اما الشكل والتنفيذ على مستوى عالي من الدقة ، وفيه تقليد لغالبية الماركات .
٣- هاي كواليتي : بضاعة ممتازه جدا واسعارها عالية من الصين سواء مفرق او جمله واسعارها كل يوم في ارتفاع بسبب انخفاض الدولار يعني الشنطة الي قبل سنه مثلا تاخذها ب٢٥٠ حاليا باكثر من ٣٠٠
وغالبا جميع الماركات فيها هاي كواليتي على سبيل المثال قوتشي ، فيندي ، لويس فيتون ، شانيل ، مايكل كورس ، برادا وغيرها .
٤- سوبر هاي كواليتي : وهذا تقليد سوبر لماركات معينه وموديلات معينه غالية جدا في الاصل بالآف الدولارات بل وعشرات الآلاف مثل شانيل وبرادا ، يعني لو جا تاجر او تاجره يعرض فيندي او لويس ويقول سوبر هاي هذا نصاب والا اتنصب عليه .
طبعا المكاسب جدا ممتازه لكن في السنوات الاخيره ومع كثره التجار الصغار ( تجار شنطة ) اصبح السوق خاسر وممل لعدة اسباب :
الكثير من التجار او التاجرات ينزلوا ويكاسروا في الاسعار كنهم في اسواق البوادي والا الخاسكية وخصوصا فئة الهاي كوالتي الصيني مايقول لا ينزل معاك في السعر وعند الاستلام يسلمك شنط كواليتي مو هاي كواليتي .
وبعضهم يشترون كواليتي عادي ولمن يجون هنا يعرضون الشنط مثلا شنطة فيندي جلد هاي كواليتي بسعر ٤٠٠ ريال
والله العظيم بعض الشنط المعروضة بهذا السعر ماجابت راس مالها وخصوصا الفيندي والبرادا ، لذلك بدأت اغير النشاط لان السوق اصبح فيه تلاعب وغش كثير من قصد او بغير قصد ومازال عندي تقريبا ١٢ شنطة حاليا ابيعها براس مالها لانك لمن تعرض يجي واحد يقول انت نصاب ليش تبيعها مثلا ب٦٥٠ وغيرك يبيعها ب٣٠٠او ٤٠٠ ويقول نفس الدرجة.
نصيحه لاتكاسر كثير في عالم التقليد عشان لاتخسر كثير وتخسر السمعه واهم شي الاحترافية في التسويق والاعلان
بالنسبة لاسعار الشنط القماشيات اسعارها مقبولة اما الجلديات الهاي كواليتي والسوبر هاي اسعارها نار

** سوق الساعات **
ذكرت لكم سابقا انني استفدت من خبرات اصدقائي الذين يعيشوف في الصين واكلوا وشربوا في ازقة اسوق التقليد مثل الشنط والساعات والجلديات وغيرها .
سوق الساعات يقع بالقرب من اسواق الملابس ومحطة القطار ومكتب china post ومحطة الباصات منطقة كثيرة الازدحام ويكثر فيه الباعة المتجولين للمأكولات السريعة والعصائر وغيرها السمه العامه على هذا السوق العشوائية وفية تجد مئات الاكشاك التي تبيع الساعات ومعظم هذه الاكشاك لهم مكاتب او شقق بين ازقة البيوت القديمة والمراقبة بالكاميرات والعيون البشرية خوفا من زيارات الشرطة ومكافحة الغش التجاري التي تقوم بحملات شبه يوميه
هذا السوق عالم اخر يخفي من الاسرار الشي الكثير فتجد الساعات التي تبدأ اسعارها من ريالين الى ماشاء الله .
فالاسعار تختلف حسب درجة التقليد وحسب الماركة العالمية.
انا ولله الحمد اتعامل مع مكتبين لتوفير الساعات وبأمانه ارتحت في التعامل معهم ولم اجد الا كل شي مميز
**معلومات عن الساعات حسب خبرتي المتواضعة **
تختلف الساعات كثيرا في خاماتها وثبات الوانها وجودة تنفيذها ونوع المكينه فهناك تقريبا اربع انواع
النوع الاول : الساعات التي تعمل بمكينه صينيه وهذي اسعارها جدا مناسبه وتنفع كهدايا او للبيع السريع (كل فطير وطير ) ولله الحمد لم اعمل بها يوما لكثرة مشاكلها ولايوجد عليها ضمان اعتقد مو بس الماء يدخلها حتى الضفادع .
النوع الثاني : الساعات التي تعمل بمكينه يابانية ساعات جودتها جيده جدا مثلا ساعة كارتير تعمل بمكينه اوتوماتيكية في الاصل تجد اليابانية تعمل بالبطاريه وباقي اجزاء الساعة مصنوعه من خامات جيده جدا اخذ ضمان عليها لمدة سنة .
اسعارها تختلف حسب الماركة ونوعية الجلد ونوعية الجلد تبدأ اسعارها من ١٠٠-٢٠٠ ريال وانصح فيها لمن اراد ان يكسب الزباين ومرابحها ممتازة جدا وضمانها بين السنه والسنتين .
النوع الثالث : الساعات التي تعمل بمكينة تسمى كوبي سويس مكاين صينيه بس تقليد للمكينه السويسرية بكامل تفاصيلها اسعارها تبدا من ٢٠٠-٣٥٠ حسب الماركة ونوعية الجلد او الربر والغطاء الزجاجي والعلبة الضمان لمدة سنه
النوع الرابع :الساعات التي تعمل بمكاين سويسرية اصلية ولكنها مستعملة
النوع الخامس : الساعات التي تعمل بمكاين سويسرية اصلية جديدة
النوعين الاخيره نوعية غالية وتنفع للطلبات الخاصة واسعارها تتحدد بنوعية الجلد والزجاج وغيرها من الامور المخفية
وهذي ضمانها قد يصل الى اكثر من ٣سنوات .
وهناك في ازقة ودهاليز سوق الساعات الشي الكثير هذا ماتولد لي من مشاهداتي ونشاطي فيها .
ولله الحمد خلال سنة واربع اشهر بعت اكثر من ١٨٠ ساعة بمرابح جدا عالية وكسبت رضا الزبون في السعودية حتى ان بعض الزباين قبل كل سفرية يعطيني قائمة بساعات معينه وشنط معينه .
فمن اراد دخول عالم الساعات لايستخسر في الشراء حتى لايخسر المال ويخسر الزبون .
ماحققته من الساعات فقط اكثر من ٣٠ الف ريال .
طبعا لاتستطيع ادخال كميات كبيره منها ولكن في كل سفرية اشتري مابين ٢٥-٤٠ ساعه حسب الاوضاع واقوم بتوزيعها على الشنط وعلى شنط الاصدقاء
وأكمل معكم ماتبقى من مشاهدات لبقية الاسواق في ردود اخرى
تحياتي
اخوكم عاشق قوانزو

السلام علكيم ورحمه الله وبركاته ..
أشكرك ع طرح الموضوع المشوق الذي تاه الكثير فيه للعثور على المعلومات المربحه ..
لكن ما يتداول بين التجار أن البضاعه المقلده لا يتم إدخالها من خلال الشحن والجمارك ..!!!
أريد فقط كيفيه دخولهاا .. وكيفيه تصريفها .. !!

جزاك الله خيرا
مارايك افضل وقت للسفر للصين
وكيف طريقة التعامل مع المصانع
وكيف اشحن بضاعتي
لاني افكرر جدياا بالذهاب للصين ...

معلومات جدا ممتازة

اكمل بارك الله فيك

فعلا الذهاب للصين يفتح عيونك على فرص كثيييير
بس لازم يكون عندك مبلغ حلو ومحدد وجهتك قبل تسافر والا بيضيع عليك الوقت هناك

رحت قبل شهرين لاول مرره لقوانزو
وناوي اروح في نوفمبر خلال اسبوعين بعد المعرض
عشان ترخص الاسعار
وكلامك صحيح الشنط صارت غاليه ومو مربحه كثير
>>جربت وبالقوه بعت اللي عندي
فعلا الهاي كوالتي ماينفع تجيبه غالي هناك
وفيه ناس هنا تجيب الرخيص وتبيعه على انه هاي كواليتي
شغل نصب

معلومه
نهاية ديسمبر ويناير تكون اجازه في الصين
حسب كلام الناس هناك
وفيه شخص يقول فبراير يصادف رأس السنه الصينيه وبعد اجازه
اللي بيروح ينتبه لهالموضوع ويتأكد لانه ماراح يستفيد شي والمصانع والمتاجر مقفله

جزاك الله خير اخوي على الافاده

سؤالي كم هو المبلغ اللي تنصح فيه كبدايه وماهي افضل السلع بالنسبه لسهولة توزيعها وتصريفها

واكرر شكري وثنائي لشخصك الكريم .