[align=center]السلام عليكم ورحمة الله وبركاته


اشكر كل القائمين على هذا المنتدى الجميل

اخواني جزاكم الله كل خير في الدنيا والاخره احتاج مساعدتكم والاجابه على اسألتي

امي مستفيده من الضمان الاجتماعي

1/ هل فيه خدمه عند الضمان للاجهزه المهم في البيت مثل المكيف - الغساله - بتوجاز - مغاسل - باب



لان احنا الآن درجة الحراره عندنا 8 وامس 2- يعني تحت الصفر ومع هذا كله تخيلوا
امي تقوم الصبح وتغسل الملابس والغساله متكسره ورايح ورايح عمرها والنشافه مافيييه نشافه
يعني تجدد الملابس بيدينها بهالبرد وتروح للحوش اكثر من 5 مرات يعني معرضه لدخول البرد لجسمها
يارب تحرم يدينها عن النآر

والغاز ااه بس من عرفت اهلي وهو موجود عندهم لازم تطقه لمن تتعب علشان يعقل ويشتغل زي الناس

ومكيفات نتهاوش علشان كل وحده تبي تجي صوبه ماينفخ الا على اللي قدامه بعد نفخ هواء مو براد

والمغاسل متكسره وتجرح اليد


2/ البيت مره تعبان تعبان عندنا الحوش مو بلاط لا صبه عاديه يعني سمنت فقط
ومع الوقت يرتفع الاسمنت ويطلع علينا التراب وتروح امي وتحط سمنت بنفسها

وعندنا المقلط وغرفة العيال اوووف ماتقدر تفتح الباب منها الارض مرتفعه علينا جت امي وهدت الاسمنت
وحطت سمنت جديد بالغرفتين والان فقط موجود سمنت

امي هي اللي بنت البيت وهذا اللي قدرت تدفعه وطبعا غشونا في البنايه
كل يومين يخرب شي يطيح شي حتى الجدار بقسم الثاني طايح على الباب الخارجي ولا نقدر نفتحه
واحنا ماعندنا دور ثاني ولما تروح للدرج فوق تتجمد من البرد ليش لان فوق مو مسكر محطوط فقط
شينكو والحنفيه حاطينها على السطح مباشره
وغير البرد انواع الرعب مع الهواء يطلع صوت واذا جاء غبار يطلع له صوت


3/ التسبيك في البيت ابدا مو زين كل شوي تطفي علينا لمبه
والمقلط فيه إلتماس لو تشبك توصيله طفاء عليك ثم شغل
والآن غرفة البنات خربان النور فيها وقسم الدرج خربان نوره ندخل في الكشاف


الحمدلله على كل حال
الحمدلله على كل حال




بتقولون ليش اكتب هالشي والله منها افضفض ومنها احد يرحم حالنا ويوجهني ويعلمني ايش حقوقنا الحقيقيه( انا مو من الرياض)

والناس اللي هنا ماقول الا حسبنا الله ونعم الوكيل فيهم
يأكلون مال اليتيم بدون ذمه وضمير وبدون خوف من الله عز وجل

فيه فترات جت فلوس من الملك الله يحميه ويطول بعمره والله كل وحده تتصل في امي
وتقول جاها 3000 ريال وامي تنتظر وتنتظر وللاسف لما اتصلت يقولون مالك شي
مع ان جارات امي جاتهم الفلوس وهم اقل منها اولاد وفيه ثنتين ماعندهم اولاد وماشاء الله جاهم
من الفلوس الله يبارك لهم

وعمتي تقول فرشنا البيت كله منهم وكل سنتين لكم تجدوون الفرش مادري هالشي حقيقي او اشاعات





انا بروح شخصيا وبنفسي واترك الكل لان دايم اقول لامي واقول لاخواني احنا لنا حقوق
والكل فاقد الامل والبعض يضحك
انا اعذرهم لان من اللي نشوفه لو جاء شي سبحان الله يعطونه اللي يبون لاقرب ناس لهم ويتركونا




انتظركم تقولون لي ايش اسوي ولو رحت وقالوا مالكم شي وش ارد عليهم
هل يحق لي اطلب الاوراق اللي تثبت حقوقنا

لان فيه ناس يقولون راح نجي نشوف البيت ويكتبون كل شي ويطلعون نسال ثاني يقولون مايشملكم
مستجيل مايشملنا مابي اظلم احد لكن ممكن اصرفوها لهم وقالوا انا استلمنا


تحملوني شوي بس بجد انا تعبت من نفسية امي والله شايل حمل ربي يغفل لها ويرحمها
وصايره عصبيه حيل وحتى الكهرب تقول لاتشغلون المكيفات بس واحد اخاف يقطعونه علينا
مع انه هم اللي يسددون ودايم اقنعها يايمه ماهو محدد لنا كم نصرف بالشهر ومع ذالك خايفه
منهم وماتأمن لهم [/align]