السلام عليكم ورحمه الله وبركاته
اسعد الله اوقاتكم بكل خير

ادخل بالموضع على طول انا لي قريب يقطن بدوله قطر الشقيقه وكلمني عن قهوه عاليه الجوده وسعرها نصف سعر القهوه الموجودة عندنا المهم فكرت اسوي خلطه قهوه مثل بنت نجد وقهوه الشيوخ الصراحه انا انسان طموح واعرف اني بتعب لان تبي مطاحن وعلب وتغليف افكر اني أوزع جمله مثلا نص الكيلو يطبع علي العلبه سعر 25ريال وابيعه على المحلات جمله20 مثلا اقل بيع كرتون فيه 12حبه. اش رايكم لايجي احد يقول صعبه هههههه لابد من تعب وانا ببدا بسيارتين اول شئ وموزعين المعمل او المحل الي تتم فيه التعبه بكون انا اعمل فيه

اللةيوفقك

الله يوفقك ارى انك ما تطحن القهوة ممكن حمس بس لأن اذا طحنتها يروح طعمها مع الوقت
وأرى ايضا انك لو تبيع بسيارتك يعني تاخذ لك وانيت يكون احسن وتضيف معه تمر وقرنفل وهيل اعتقد انه افضل استخير جرب الطريقة قبل تسوي تعبئة وغيره اذا مشى الشغل معاك فكر بمحل وتغليف ولا تستعجل ابد

اخوي نايف من حماسك جهزت كل شيء قبل تعرف هل المحلات والبقالات بتشتري قهوتك او لا ؟

قبل تسوي معمل وسيارات وعمالة وتخسر مبالغ...

عبي لك كرتون فيه اثنعش علبة مثل ما قلت... بثلاث مية ريال...

ورح لك محل دعاية واعلان وخله يسوي لك ستيكر كأنك صاحب شركة عالمية للقهوة..

وصور قهوتك واطبعها على ورق بروشور او ورق عادي...

وحاول تصرف القهوة اللي معك...

وتمر على المحلات وتقول لهم عندي القهوة هذي وش رأيكم؟؟

اقول لك من الآن... لو وافقوا بيقولون لك نزلها وعلى التصريف... ما عندنا فلوس...

لو بيعت عطيناك فلوسك ، ولو ما بعناها شل قهوتك واقضب الباب هههههه

الزبدة...اختبر السوق قبل تبدا...

تمنياتي لك بالتوفيق

اهم شي الطعم والجودة
خلطات القهوة ماتمشي إلا لو كانت ممتااازة ومجربة

اختبر السوق مثل ماقالولك الاخوان

عبي علب صغيره تكفي لمرتين كذا كعينات تجربة
كل العبوات ألصق عليها ستيكرات مكتوب فيها اسم المنتج ورقم الجوال للطلب وايش محتوى الخلطة
بن - هيل- زعفران .. اللي تستخدمه يعني

اشترك في بازارات او تعامل مع بائعه تمسك الطاولة في بازار نسائي وسوي منها قهوة تصبها لزوار البازار مع تمر مثلا
خلطات القهوة في البازارات النسائية تمشي ماشاء الله ومن المشاركة تكسب شهره

ماشاء الله لاقة الا بالله
الفكره روعه بس ياليت تبتكر شي جديد لما يجربونه يكون عليه اقبال
مالقيت فكره ياليت تدرس مشروعك اكثر وان شاء الله تجد مزيد من اردود اللي تسر قلبك
والله يوفقك ويرزقك من واسع فضله

لا تدخل بكل ثقلك وثم تتحطم من الواقع وتحمل نفسك خسائر طائله

اسس نفسك لاين تبدأ تثبت نفسك في السوق ثم ابدا بالتوسع تدريجي

مثل ماقال لك الاخ الحارث بن همام اشتغل حبه حبه وبكميه قليله

يعني أبدا بكرتون واذا تعرف اصحاب محلات ابدا منهم

اذا صرفت اول كرتون راح المحل يطلب منك كرتون والا اثنين

انت ابدا دور محل ثاني واتبع نفس الطريقه وهكذا كل بعد فتره أستلم محل

وعادي تقدر ترسل اخوانك عيال عمك عيال حارتكم يدخلون المحلات

ويسألون عن القهوه قبل ماتبدأ بطريقه غير مباشره

ثم انت بعد فتره تجي وتسوي حالك مسوق للقهوه

وعاد صاحب المحل يتذكر الناس اللي جو يسألون عن القهوه

وعلى الاقل تضمن ان صاحب المحل ياخذها منك على التصريف ويعطيك حقك بعد مايبيع

اذا مشى سوقك وخلصت الكميه راح صاحب المحل يطلب منك بعدين

وأستلمها محل محل في منطقتك يعني ابدا في اول محل لين يمشي سوقك فيه وبعدين استلم المحل الثاني

لين تكون نفسك في المنطقه اللي انت فيها ويكون هناك طلب على القهوه تقدر بعدها تسوع شغلك على المناطق الاخرى

وبعد في المناسبات والعزايم اللي تخصك سوي من القهوه

اكيد المعازيم بينشدون عن القهوه وانت عاد سوقها قول اخذتها من المحل الفلاني بعد ماتحط القهوه في المحل

اهم شيء هو انك تأسس من البدايه

واستغل الاوقات يعني مثلا متى يجبون الموزعين القهوات المشهور للمحلات ومتى تخلص القهوات من المحلات

وانت فرصتك تعرض بضاعتك على المحلات في وقت البضاعه على وشك تخلص

يعني لو حصل تأخير من الموزع وجا طلب على القهوه وهي ماهي موجوده تكون قهوتك البديل

اتمنى لك التوفيق والبدايه صعبه بما ان المنتج جديد

لكن اتوقع لك نجاح ولا تيأس كل بدايه مره أخرها حلو ياحلو