السلام عليكم جميعا ..
انا احد متابعين المنتدى من فترة طويلة .. على قولهم متابع بصمت ! ايام كان المنتدى لونه بني الزبدة مسكت و أبي أكتب ،،
المهم بفضفض شوي وتحملوني .......
السالفة بدأت يوم تخرجت من الثانوي .. كانت الحياة شبه طبيعية لا تخلو من المشاكل لكن هذي الحياة ( لحد يسألني وش الحياة الطبيعية ) .. كانت رغبة والدي انه ادخل العسكرية غصب .. .. بعد نقاش حاد جدا رفضت وقلت ابي اكمل دراسة افضل .. درجاتي تسمح و فيني حيل للجامعات .. تفاجأت بطردي من البيت .. الصدق حسبت الموضوع استهبال.... بعد كم يوم خارج البيت تأكدت ان الموضوع جد وصدمة بنفس الوقت .. (طبعا اكيد اعتذرت وحاولت اصلح وسم وتدلل لكن ما نفع ابد ) ... هالكلام عام 1426 تقريبا !!..
المهم يوم ضاقت الدنيا رحت لجدتي الله يرحمها الي عايشة في بيت لحالها بمدينة بعيدة عن اهلي .. جلست عندها ..كبيرة بالسن وقلت ممكن تحتاجني بشي (جت من الله ) .. عشت عندها كأني مستأجر .. يعني من الغرفة لباب الشارع والعكس فقط لاغير .. وهذا حسب رغبتها ورغبة اولادها الي هم خوالي .. ابسط حقوقهم عادي .. صرت اقدم على الجامعات والكليات ما تركت شي .. الحمد لله انقبلت في كلية الاتصالات .. بدينا الدراسة والمكافآت تتأخر وشهر تنزل و 3 شهور متاخرة .. وهذا مصدر الدخل الوحيد .. يعني مااوصف لكم لو تتأخر المكافأة وش يصير .. تقريبا سنة من المحاولات البائسة في محاولة التخرج ... انفصلت
وبنفس الوقت الجدة حست ان وجودي ثقيل شوي او ممكن انها كانت خايفة علي ( قلب الام ) .. المهم طلعت ..
رجعت للوالد .. للاسف ما استقبلني وصارت مشاكل .. اخوي الكبير كان توه بالكلية العسكرية.. وتكفل بشقة تكلفتها 800 ريال بالشهر هذا الي يقدر عليه ( نعمه فيه مثل هالاخوان بهالزمن ) رجعت اتوازن مرة ثانية وقدمت على جامعة في مدينتي وانقبلت على طول ولله الحمد ... قسم العلوم الادارية ..
عدت سنه ونص تقريبا .. الين ذيك الساعة الي جاني استدعاء من المحكمة بقضية عقوق !!!! وكان موعد المحكمة الاسبوع الي قبل الاختبارات النهائية ( اسبوع المراجعة ) ...
جا الموعد للمحاكمة وانا ما ادري أي شي غير ان الوالد هو خصمي .. دخلت على الشيخ وعرًفت بنفسي و اعترفت ان الي جالس هو ابوي ... المهم... جا دور الوالد .. سأله الشيخ وش عندك ! هنا المصيبة .. ثلجت من الكلام الي سمعته والتهم الي اتهمت فيها .. مدري وش اكتب و وش اخلي لكن كل التهم كانت بين عقوق و فجر و مخدرات وشلل فاسدة وهلم جرا .. وانا بكل براءة التفت للشيخ وقلت هذا كله كذب ما صار ...وليتني ما قلتها .. طالع فيني الشيخ بحقد وقال ( احد يكذب ابوه ) .. المهم بوقتها امر الشيخ الكريم بحبسي ... احلف لكم اني ما طلعت من قاعة المحكمة الا بالكلبشات ..(وقتها ما كنت ادري ان مالك حق مع ابوك هههههه)
المهم .. جلست بالتوقيف يومين وبعدها ارسلوني للسجن العام .. وجلست حدود 19 يوم ..جاني العسكري وقال تم التنازل عن القضية وتقدر تطلع ..تحسبون طلعت رحت لاهلي ؟ لا .. قبل ما اطلع سلموني امر بعدم الاقتراب من المنزل .... مابي اعلق على هذا الامر بس تخيلو ما تقدر تشوف اهلك وبس .
رحت للجامعة على طول بنفس اليوم .. ابي الحق الي طاف .. لا اخفيكم كان الوضع مزري جدا الى ان دموعي نزلت .. المهم كان معي خويي وهم يسلموني ملفي من الجامعة ( مفصول ) وانا في حالة برود عقلي وعاطفي .. قالي خلنا نروح للكلية التقنية اكيد بيقبلونك درجاتك عالية لا تزعل .. على السيرة كانو وقتها يسمون التقنية مقبرة الطلاب لانها ما ترد ميت على قولهم (مدري للحين كذا ولا تغيرت ) ... مالكم بالطويلة انقبلت قسم الحاسب (شبكات )
درست وبديت اطقطق ... يعني ابيع حطب .. و تمر .. من هالسوالف الي تخلي معيشتك ماشية ... اجمع مصروفي .. واخوي ما قصر الشقة عليه ..
شفت الوالدة و خواتي بعد 3 سنين ولله الحمد .. صرت اشوف امي كل فترة احيانا اذا مع اخوي او بمجمع تجاري على حسب الوضع الامن يعني ...
بعد سنتين نقلو اهلي من المدينة الي انا فيها .. وباقي لي سنة او اقل ع التخرج .. المهم تخرجت اخيرا .. والله مافرحت !
اخذت شهادتي وقلت بنفسي تعوذ من ابليس ورح لابوك واهلك .. معك شهادة يعني ممكن يصير الوضع احسن ..
للاسف صار عكس الي توقعته وبغيت انحبس مرة ثانية .. الوالد شكله ما تقبل الفكرة .. المهم سلًمت وطلبت الحل وطلعت .. عرفت وقتها ان مالي رجعة .. وان هذا شي لازم اشيله من راسي .. مو مشكلة اقابلهم في وقت آخر ..
توجهت لمدينة كبيرة عشان الفرص الوظيفية تكون افضل .. طبعا خلال هالتنقلات صار لي اخويا بكل مدينة ولله الحمد .. و اشتغلت بالحطب والتمر والجح ....بعد شهور لقيت وظيفة بنفس تخصصي ( شبكات الحاسب ) واشتغلت فني براتب 4500 ... كان الذ مبلغ واكبر مبلغ احصل عليه في حياتي .. الداوام 12 ساعة ومستانس بعد ..
عدت سنه و8 شهور .. قدمت على شركة لتكنولوجيا المعلومات وقبلونبي بوظيفة (منسق الفريق التقني) ولله الحمد براتب 5200 .. كنت السعودي الوحيد معهم .. الشركة اجنبية .. والموظفين اردنيين وفلسطينيين فقط لااا غير..
عدت شهور ورقوني الى منسق مشاريع بدون تعديل راتب ...وبعد عدة شهور صرت محترف بالشغلة واخذت دورة ادارة المشاريع الاحترافية PMP ورقوني الى منصب مدير مشاريع Project manager ولله الحمد .. بس برضو بدون زيادة راتب للاسف .. والشغل كثيير جدا لدرجة انك تشتغل 16 ساعة ويالله تلحق بعد ..
العمر يمشي والدخل ضعيف !! رحت سوق الجوالات استاجرت لي طاولة برمجة جوالات ..الشهر ب 2000 ريال.. كانت مجازفة .. بس نجحت
اطلع من الدوام المغرب او العشا حسب الشغل .. واروح المحل واشتغل الين يسكر المحل الساعة 12 ليلا..
الشهر الاول جميل والثاني أجمل .. والصحة الله بالخير لا نوم ولا اكل .. وصرت ادخن بعد ..
الشهر الثالث صارت مشكلة.. التاجر السعودي الي ماسك محلات الجوالات رفع الايجار ثلاث اضعاف .. اضطريت اترك المحل ... كان السبب انه بيحط العمالة الي بكفالته مكاننا حنا يالسعوديين .. عموما طلعت انا والسعوديين الي معي ..
حاولت اشتغل ب أي شي خارج الدوام .. فقدت الامل من الدوامات من كثر ما اقدم وادور وظيفة فيها نسبة وتناسب او شبه منطقية .. ليت احد اتصل او عبر اصلا .. او قال ما نبيك ظف وجهك ..
المهم .. جت سالفة الانستقرام و المتاجر الالكترونية وقتها ..وفتحت حساب للعطور .. بحكم اني اعرف شخص مصري يدير مستودعات احد اكبر موردي العطور بالسعودية والسوق الحرة .. وصرت اخذ منه ب اسعار رخيصة جدا واحاول اكسب
4 شهور تقريبا ما مشي المشروع زين .. يحتاج راس مال اكبر .. عموما قفلت المتجر ... وقعدت احوس وادور أي مشروع ..
احد الايام بعد المغرب جاني اتصال من احد البنوك المحلية ( مقابلة شخصية ) .. ماصدقت خبر ..
تقابلت وبعد عدة مقابلات انقبلت ولله الحمد .. براتب حلو حمد لله .. قدمت استقالة من الشركة الاجنبية بعد خدمة سنة و 4 شهور تقريبا.. واشتغلت بالبنك الحمد لله.. وبنفس الوقت كنت ادور مدخول ثاني ..
لقيت لي فكرة معينة .. مشروع صغير بالبيت ... ونجحت ولله الحمد ... صرت اطلع من الدوام 5 العصر واشتغل اليين 2 او 3 الفجر ... مشت الامور على هالحال ... وصار دخل مشروعي اكثر من راتبي بكثير ..
احترفت الشغل بالبنك .. وصار آدائي متميز ( حقين البنوك يعرفون بطاقة الاداء ) .. صار لي سنه و 8 شهور
المهم ... في يوم صارت مشكلة في احد العمليات بمبلغ ضخم ( حدود 200 الف دولار ) و تم التحقيق معي .. وكنت متأكد انه ما في أي خطأ بالعملية ... متأكد جدا .. وبعد اسبوعين تقريبا من الضغط النفسي والتحقيقات .. قررت اني اشيك على طريقة عمل النظام .. بحكم خبرتي التقنية ومعارفي ايضا .. لقيت ان المشكلة كانت بالنظام .. يعني من مني انا .. رحت لهم وعلمتهم وقلت هذي مشكلة أي احد ممكن يطيح فيها اذا ما عدلتو نظامكم .. الرد كان : حنا ندري بس انت لازم تنتبه !!!!!!!!!!
سويت نفسي ميت وكملت شغلت.. مالكم بالطويلة .. بالمقابل كنت انا شغلهم الشاغل .. اعطوني انذار .. وحجبوا البونص .. ومنع من الزيادة والترقية بسبب الانذار ... الى انه وصلت بمدير معين جا عندي وقال : تقدم استقالتك افضل من الفصل ..
استقلت بعد مشادات و تدقيق وعجوزات واشياء كثيرة صارت ... الاستقالة كانت قبل 4 شهور من الحين ..
طبعا اتواصل مع اخوياي بالعمل .. وقبل شهر تقريبا انفصل شخص بنفس المشكلة الي صارت معي ..
والمهم.... كلمت الشغل بالمتجر وصار عندي متجر كبير ومنافس بالسوق متخصص بشي معين ولله الحمد ...
وقاعد ادور على وظيفة افضل بإذن الله ... او غير ... ما ادري !


هذا مخلص ل 10 سنوات مضت من حياتي بتفاصيل متزامنة و محدودة ومعينة .. من زاوية واحدة

قد أكون شخص مكافح أو ناجح بنظر احدكم .. لكن بنظري .. انا مجرد شخص ضاااائع لا أكثر .!!
قرأت في طالع هذا المنتدى هذا العنوان:
( الفقر هموم ومشاكل ) ولم يقل ( الفقر حاجة و عوز ) !!
ادركت حينها ان المشكلة ليست في عدم وجود المال فقط !!!
مخطئ من يظن ان الفقر هو فقر الجيوب .. وانما الفقر هو فقر القلوب..
فالجيوب الخاوية قد تمتلأ بالمال ذات يوم ..أما القلوب الخاوية فمن الصعب ان تمتلئ بالمشاعر والاحاسيس.


شكرا لكل من قرأ ... واعتذر للجميع ..
.
.
.
.
.
.
M

قصة مليانه بالمواقف والعبر احيانا الشخص يتعرض لصعوبات في حياته بس لازم يكون صبور ان شاء الله يتعوض خير دنياء واخره

نصيحة من اخ

ارجع للوالد وإكسب رضاه حتى وان رفض هو ذلك

__________________
ومن يعمل من الصالحات وهو مؤمن فلا يخاف ظلما ولا هضما

والله أحترم الي مثلك وأفتخر فيه كأنه أخوي

إنت إنسان بطل
لإن شفت إن حياتي مصاعبها بسيطه عند غيري
وتذمري مايستاهل ولازم سعيي في الحياة يكون أقوى مما أنا عليه

عرفت إن الحياة ماتنشغل بالضعفاء بل بالأقوياء أمثالك


حقيقي إنت إنسان رائع رائع
الله يوفقك ويسعدك

صدقت الفقر ماهو فقر المال الفقر فقر القلوب
عليك بدعاء الله انه يسخر ابوك لك ويلين قلبه عليك ويحنن عليك وصدقني راح تشوف انتيجه ماخاب من طلب الله شيء ..كنت اعاني من قسوة الوالد بس ولله الحمد كنت ادعي الله ليل ونهار لين الله سخره لي وحنن قلبه علي

الله يوفقك ويكتب لك مافيه الخير بس ياخوي لاتفارق الإستغار , وبالتوفيق ان شاء الله

الله يعين على هالدنيا

يسعدنا انك اخترت هالمكان لفضفضتك

لكن رضا الوالد حتى لو كان جائر أو غير عادل مهم جداً

حاول قد ماتقدر تراضي ابوك او على الأقل تواصله

جرب ارسل له رسالة شلونك واشتقت لك وسامحني ومن هالكلام

صدقني مع الأيام قلب الأب يلين ويحن


أما اجتهادك في عملك فهذا لك أنت
يعني ان اجتهدت لنفسك وان تكاسلت فعليها ..

بيكون للنجاح طعم لو كان بقرب أهلك , حاول قد ماتقدر ترجع لهم حتى لو تلقيت اهانات

روح للبيت وخلك عند الباب يوم يومين مايمنع , لحد مايرضى عليك الوالد ويحن

اخسر شوية وقت عشان تكسب أهلك


وأهنئك على مكافحتك واستمراريتك في العمل


واسأل الله لك التوفيق وتتسهل كل امورك يارب