مساء الخير ,,,

انا قدمت على موقع رياده بمشروع توطين محلات الجوالات واللي من اهم شروطه يكون معك شهاده دورة بصيانه الجوالات او خبره عمليه .

ولله الحمد خذيت الدورة والشهاده خذيتها اليوم وقدمت على رياده بالموقع .

وانتظر اتصالهم خلال هالايام ..

اي نصائح او تنبيهات او اقتراحات تساعدني لتخطي المقابله والانتهاء من جميع الاجراءات للموافقه على المشروع والحصول على القرض لاتبخلون علينا .. ولتعم الفائده للجميييع ..

والله يفتج لكم ابواب الرزق ولي .

معااااذير

أنا قدمت لأخوي على معهد رياده وتم قبوله
المقابله الشخصيه عباره عن "مدى إهتمامك لمشروعك"
أظهر إهتمامك بالمشروع أهم شيء
ثم تكلم عن
إستعدادك إذ لا سمح الله خسرة في المشروع "بأنه يوجد لديك 2 أو 3 أو 4 من أخوانك يدعمونك ومستعدين للتسديد"
والمقابله لا يوجد فيها تعجيز بالعكس هم يقيسون مدى إهتمامك وسوف يدعمونك على طووووول

ثم إذا تم قبولك يرسلون لك رساله يحددون لك موعد الدورة ومدتها أسبوع
والدورة تعتبر ممتازه جداً لك
طبعاً الدورة عباره عن بناء دراسة الجدوى للمشروع لك وإذا كان عندك شهادة للصيانة فسوف يزيد الدعم لك

وعلى فكره كل مدينة ومحافظة ومركز لها فئة مخصصه ومحدد الدعم لها
مثلاً:
فئة A
الرياض
جده
المدينة
الدمام= دعم 200 ألف ريال للأكشاك داخل المولات - خارج المول يوصل الدعم إلى 180ألف

بقية المحافظات تعتبر فئة B
والدعم يوصل فيها إلى 130 ألف ريال فقط

والمراكز فئة C
يوصل الدعم فيها إلى 70 ألف ريال


موفق ولا تتردد الدوله قامت مشكورة بدعم الشباب أدام الله عزها وحفظ الله جنودنا الابطال المرابطين على الحدود

__________________
سبحان الله وبحمده

الله اكبر اخوي همام الله يفتح ابواب الرزق لاخوك ولك ولجميع المسلمين

والله ان مشاركتك وافادتي شي كبير وماتتصور وش كثر يفيدني الله يسعدك

باذن الله اعدي كل المراحل وابشرك بالبشاره ..

شكرا لك من الاعماق

لا نملك الا الدعاء
الله يوفقكم .

الله يسهل امرك اخوي

هذا ردي في احد المواضيع كررته هنا مع زيادة عليه


كنت محتارة بمقابلتي مع ريادة وماحصلت أحد يفيدني
ورحت مامعاي ألا هويتي الوطنية وماعندي أي معلومات
والحمدلله تجاوزتها بسهولة

كانت اسئلتهم

عرفينا بنفسك
ليش اخترتي هالمشروع؟
وش تعرفين عنه؟
وش بيميزك عن غيرك؟
كم مبلغ الدعم اللي طلبتيه؟
كم تتوقعين ارباحك بالسنة الأولى ؟؟!
ووش اخطر شي ممكن تواجهينه بالسنة الأولى؟
وكيف بيعرفونك الناس وكيف بتعلنين لنفسك؟
كم ايجارات المحلات بمنطقتك؟
ولو رفضناك هالمره وش بتسوين؟ قلت برجع اقدم مره ثانية هههههههه قالت لنفس المشروع قلت ايوا طبعاً

وكانوا اللي يسوون المقابلة بشوشات ولطيفات بصراحة

والحمدلله قبلوني

وتحددت دورة دراسة الجدوى بعدها بأسبوع وحصل لي ظرف طارئ ماقدرت اروح وتقفلت الدنيا بوجهي
تفاجئت باتصال مركز ريادة ثاني يوم من ايام دورة دراسة الجدوى وسألتني الموظفة اذا انا ماابغى المشروع
قلت لها والله ابغاه بس حصل ظرف ماقدرت احضر الدورة
قالت اذا انتي متمسكه بالمشروع نأجل لك الدورة لشهر 4 لأن فيه دورة بوقتها
قلت طبعاً متمسكه وأجلت لي الدورة لشهر اربعه ماقصرت
يعني متعاونين لأبعد حد وتعاملهم كويس
هذا بالنسبة للنساء لكن مااعرف عن الرجال


اتمنى لك التوفيق
اهم شي ثق بنفسك وبمشروعك

وبشرنا وش يصير معاك

وشو هي راياده
وهل في احد نجح معهم!!