السلام عليكم

دخلت في مشروع تقسيط السيارات
وتم الاتفاق مع العميل انه يسدد المبلغ كامل خلال سنه، وهو كان راغب في هذا الشي انه ما يسدد شي سنه كامله، وبعد السنه يدفع المبلغ كامل 120 الف

مرت السنه ولم يدفع شي وقال عندي ظروف ، وبعدين قال اسدد اقساط شهريه 3000 ريال، والحين صار له سنتين يسدد لكن قبل كل اجازه صيفيه 4 شهور ما سدد بحجه عنده ظروف، والحين من شعبان ما سدد ولا رمضان وراح يستمر لين نهايه الاجازه

وانا صابره ومقدره لكن طفشت وملت ابغى حقي فظروفي كمان صعبه وما دخلت المشروع الا محتاجه

وصاحب المعرض اللي اتعاملت معه كل شوي يبررله ويقول الرجال عنده ظروف، ولما قلت بشتكي قال ما راح تستفيدي شي راح يطلع صك اعسار، صار له سنتين يبرر له

خفت اني اشتكي عن طريق محامي المكتب فيوقفون مع العميل ويدبرون له صك
انصحوني ايش اسوي ؟

انا لي خبرة 12 سنه في التقسيط


ونصيحه لوجه الله وقفي التقسيط متعب متعب متعب وخصوصاً مع الانظمه الجديدة


اما عن العميل

انصحك بما انه يوصل اصبري وماجاء منه بركه


اما صك الاعسار ماعليك منهم مو اي واحد يطلع له صك اعسار على حسب راتبه ووظيفته وسبق وان اشتكيت شخص قال للشيخ انا معسر ياشيخ وسألني الشيخ قال توافق على اعساره قلت لا ياشيخ راتبه 17000 والمبلغ المطالب به الان 15000

وحكم لي الشيخ ودفع وخلصت منه

لا حول ولا قوة إلا بالله

نصيحه أنا موظف في وزارة العدل
وأعرف كل شيئ بالمحاكم

أولاً الإجراءات المطلوب تتخذينها هي الآتي:
إذا كان عندك (سند لإمر) أخذتيه على الرجال فنصيحه وبسرعه بسرعه بسرعه الآن
أدخلي على موقع وزارة العدل > الخدمات الإلكترونية > المحاكم > طلب التنفيذ الألكتروني ثم أرفقي جميع الطلبات وعبي المطلوب.


ثانياً/ نصيحه لوجه الله لا تتأخرين في طلب حقوقك والحرص كل الحرص على أخذ حقوقك كاملة ولو حاول إستعطافك
التجاره ما يبي لها شطاره التجاره يبي لها قوه، لا بارك الله في الضعيف.

ثالثاً/ الآن الظروف تغيرت والخدمة في المحاكم تغيرت عن السابق ويجب المطالبه بحقك من الآن خصوصاً أن المبلغ (كبير)
وأنتي الآن في موقف ضعيف جداً ويؤهل الزبون في مماطلتك أكثر وأكثر ثم يضيع حقك.

تصرفك خاطىء جداً
طالبيه (بكامل المبلغ) لأنك بعتي عليه بيعه حوليه يعني سنه، والبيعه بعد سنه الحوليه (السنه تعتبر حوليه، وحال عليها الحول ويجب الوفاء بالحق) تختلف عن البيع بالتقسيط لمدة خمس سنوات
لأن التقسيط يرتفع فيه البملغ أكثر وأكثر ، مثلاً (بعتي سياره قيمتها كاش 80 ألف وبعد خمس سنوات من التقسيط تستلمين المبلغ 160 ألف) ، وبيع سياره بعد سنه يختلف سعرها مثلاً (بعتي سياره قيمتها كاش 80 ألف وبعد سنه تستلمين المبلغ 120 ألف).


فنصيحه هذولا الاشخاص لعبوا عليك ولا عاد تستشيرين أحد في حقوقك
خليك قويه ولا تفكرين في ظروف الناس لأن حقك ضاع.

أرفعي عليه تنفيذ في المحكمة ولا ترحمين أحد