بسم الله الرحمن الرحيم وصلاة على النبي مبعوث رحمة للعالمين وبعد ,,

سلام عليكم ورحمة الله اخواني الأعزاء من اعضاء و مشرفين, حبيت اذكر لكم قصتي مع هذا البند الذي ماعرف عنه انه سلم وظائف قديم عمل به ولا زال موجود الى يومنا هذا, لا اريد تلكم عن مشاكل هذا البند الكثيرة لان فيه مواضيع كثيرة تكلمت عنه فبحاول انقل تجربتي التي مريت فيها به وان شاء الله ماكون ثقيل في طرحي وتحملوني اذا اخطيت بشي.


في البداية قبلت في احد دوائر الحكومية بوظيفة مدخل بيانات وكان من شروطها ( 1- شهادة الثانوية 2- إجادة استخدام الحاسب ) لما ذهبت للمقابلة ( وهذا الي كنت أضن انها مقابلة ) طلع قبول نهائي لي ! صحيح البعض يقول مفروض تفرح ماتستغرب هو انا فرحت فعلا لكن لم تدم الى بضع دقائق بعد صدمت مسئول لي بأنه يريد كفائة المتوسطة وليس الثانوية !!, فقلت معي ثانوي قال وظيفتك عامل بند الأجور ومتطلبها متوسط, طبعا انا قلت العوض ولا القطيعه والحمدلله على كل حال, ذهبت للبيت وعندي علامات استفهام كثيرة وشلون عامل ؟ هل هو قهوجي وسفرجي وفراش ؟ قلت بقبلها لوضعي في ذلك الوقت وش اسوي, باشرت الأسبوع الي بعده بنفس دائرة وجوهوني الى قسم وشافني مدير القسم وقال وش تبي مسمى وظيفتك ؟ قلت انت اخترلي قال مساعد إداري قلت ماعندك مشكلة ( وانا معرف وش مساعد إداري لحضتها ) جلست اول اسبوع وفرولي مكتب واشتلغت وكان شغلي مثل اي موظف معاملات وخطابات نرد عليها ومثل اي عمل إداري , كنت مجد واشتغل من قلب اجي بدري وطلع 2 ظهر بس عشان الكل راضي عني ( ورضى رب العالمين اهم ) لحضت ان مافي فايدة غيري يتسيب وانا اكل اغلب ضغط وصبرت جلست سناتين وانا على الوضع, للمعلومية ( الفئة الي انا فيها هي أ من بند الأجور وهي اقل فئة رتبها الاول 3200 مع 500 بدل نقل واخصم 390 تأمينات ) كنت اقل واحد مرتب بين زملائي اصحاب المراتب واكثرهم عمل, بعدين تغيير مدير القسم وجا واحد تعاطف معي وكان يشوف شغلي وثنى علي يقول شوفو فلان صيرو زيه ( وهنا شفت اخيرا شخص قدر الي سويه).


جلست جلسة ودية معاها ونسولف سألني كم مرتبتك قلت له انا على بند الأجور وانصدم قال انت تعمل وتتعب وحقين مراتب يبصم ويمشي قال برفع لك تزكية انك مجد ومن هذا لاكن مع الأسف ما نفعتني بشي لها 5 سنوات, اثناء العمل كنت أدرس انتساب في احد الجامعات المشهور عندنا وبنفس الوقت احضر دورات مدفوعة عشان طور نفسي في مجالي الإداري يوم جا وقت ترقيتي بعد اربع سنوات ( يحق لبند الأجور ترقية للفئة التي تليها بعد اربع سنوات وفئاتها هي أ , ب , ج , د ) كان رد مسئولي ترقيات ساخر جدا مني وصادم , يقول انت مارح تترقى ابد , انت رح تتقاعد على أ وكلام تحطيم لابعد الحدود, طلعت منهم وانا مصدوم , ومحروق , لاكن رب العالمين معاها مفاتيح الرزق والخير وهذول البشر لايملكون لي نفع ولا ضر لاكن الأنسان يسعئ, صارلي الأن سبع سنوات وانا على وظيفتي تزوجت عشان اعف نفسي وكمل نص ديني لاكن راتب والي يعلم عن موضوع هذه الفئة صعب, حاولت التقديم على وظائف ثانية لكن رفضوني بحجة انك موظف حكومي ونظام يقول أن بند الأجور هم من ضمن العقود المؤقتة , وليس له كل الأمتيزات مثل المراتب , ويحق له ممارسة نشاط اخر لا يتعارض مع وقت ومصالح عملة, مع الأسف عرفة الكلام هذا متاخر بعد الطلاع علية من قبل الموارد البشرية, وكل ماقدم على شي تأتي نتيجة برفض والله الحمد.



والله اني محتار وماعرف احد غير رب العالمين اخاف استقيل اجلس شهر خمس سنة مدري كم وانا عندي عائلة صعب خليهم بدون مصروف لي ولهم, والوظائف الثانية ترفضني تقول استقيل وجلس 6 شهور إقل شي والقبول غير مضمون.



لله الحمد من قبل ومن بعد والله اني متوكل على ربي وعندي أمل كبير فية انه مارح يضيعني لانه مخلقني عبث سبحانه وانه قريب مجيب,


- لا تحرمونا من نصائحكم ودعواتكم ودعوة بظهر الغيب لصاحبها له بلمثل.