حاولت اعدل طاسة النوم وأزريت

فضل · #1 (**permalink**) 02-04-2025, 07:03 PM

حاولت اعدل طاسة النوم وأزريت=بعد رمضان شلون اعدل منامي

ازريت أوقت ساعة النوم توقيت=اسرفت في نفسي بشهر الصيامي

اسرفت في زود السهر لين ظنيت=ان السهر شي ٍ يعد انتظامي

شي ٍ يفتت عروة القلب تفتيت=والنار كنها تستعر في عظامي

مشتت ٍ فكري مع الناس تشتيت=ياليت لو عيني تذوق المنامي

في خطوتي ضعف ٍ لو اني تقويت=والحال مني صار فيه انقسامي

طفيت لمبة غرفة النوم طفيت=واثري مع نفسي كثير الخصامي

هذا وانا عسر ٍ عليّ نومة البيت=لو بالسفر نومي عليه السلامي

كن العمر واقف على كف عفريت=عفريت يقول انك حرام ٍ تنامي

ما جاتني الدنيا على ما تمنيت=كني على شفت ٍ وحان استلامي

انام كني فوق صلب الجرانيت=ما كن تحتي فيه ريش النعامي

امبحلق عيوني ولا ني تهنيت=تقول صايبني شديد الجثامي

يا ناس ياللي نومكم فيه اتيكيت=انا على صدري كثير الزحامي

يا من يسكت هاجس البال تسكيت=يا كود لو عيني قليل ٍ تنامي

لو خذت لي زيت ٍ مع شوي حلتيت=ما هي بتنفع حين وقت الجهامي

يا بو فلاح القلب كن فيه كبريت=اخشاه لا يقبس وعندي لغامي

قريت من الاذكار وبالله سميت=يالله تكفيني شرور الانامي

يالله ثبتني على الحق تثبيت=واجعل نهايتنا بحسن الختامي

الشاعر : يحيى بن شيبان

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

حاولت اعدل طاسة النوم وأزريت

الشعر والنثر