راكب اللي ما يوّرده الفطيم

فضل · #1 (**permalink**) 29-10-2025, 08:49 PM

راكب اللي ما يوّرده الفطيم=ان مشى بالخط ودك تسمعه

موردينه من وكالة جيم ميم=فيه عزوم ولا يعرف الضعضعه

ان سرى من فوق خطٍ مستقيم=كنه الا طالبٍ خط السعه

هو خصيم اللي يدور له خصيم=كل خصيمٍ لابد انه يفجعه

اشهد ان الجمس مايعطى غشيم=اغلب الغشمان ودها تتبعه

ان بغيت الجمس لا تاخذ قديم=زيد مالك فك شي من مصنعه

كلمة ٍ مني وخذها في الصميم=في الوكالة حط مالك وادفعه

خذ كلام اللي بها خبر ٍ فهيم=مالكين الجمس بأجيال أربعه

سقت هذا وسقت هذا من قديم=وسقت هذا النوع واللي يتبعه

لا تطولها ولا به سين جيم=ان سرى بالخط صعب ٍ تتبعه

لو نزل بالبر من عند القصيم=التواير تدفعه دوم اربعه

ان نزل في نزلته مثل الزعيم=يوم يقبل شبه وجه مدرعه

من على الدنيا فهيم بن فهيم=بالقناعة يصعب انك تقنعه

ان حلفنا حلف بالله العظيم=فيه كلام ٍ ودي انك تسمعه

هيم لكن في المواتر لا تهيم=الا في جمس ٍ يجيب المنفعه

بالمواتر ما يسمى الا عظيم=به فتيلٍ واحذر انك تنزعه

مالكين الجمس عاشو في نعيم=هجولة بين الجهات الاربعه

كاشتين وجوهم برق ٍ وغيم=في خيام ٍ وافيات مشمعه

الشاعر : يحيى بن شيبان

راكب اللي ما يوّرده الفطيم

الشعر والنثر