السلام عليكم ورحمة الله وبركاته ..

هذه قصة بسيطة من تأليفي ..
عزبة مكة :

يقف عن الباب ، ويسمع صوت الدكتور ، عاليا ، يسأل ويجيب ، كعادته ،
ثم يطرق الباب ، طرقا خفيفا
طق طق طق .. ( يفتح الباب ، وتعلو وجهه ابتسامة الخجل:o ..
: سلام عليكم ، لو سمحت يا دكتور ، ممكن أدخل ،
الدكتور : وعليكم السلااااام ، سلمان ،؟ أنت دائما تتأخر ،
موب أول مرة صح ولا ؟؟
سلمان : صدقت يادكتور ، بس صدقني عندي بعض الظروف الي خلتني ..( الدكتور يقاطعه ،
: خلاص ، لا تضيع علينا وقت المحاظرة ، ادخل المرة هذي ،
بس شوف ما راح احظرك ،
سلمان ( بصوت خافت ) : أبشر أبشر ...
يجلس سلمان بالقرب من صديقة ( مسوي حلو ) ، ثم يسرح بخيالاته بعيدا ،

بعد المحاظرة ، يتوجه هو وصديقه الدائم ، الى الكافتيريا ،

يجدون امامهم ، أبو عطية والبكاش ، يتناقشون في موضوع
لا فائدة منه أصلا..،
بعد التحايا الباردة
سلمان : يا أخي متى نخلص أيام الجامعة ونفتك ،
مسوي حلو : شوف اقلك ، ترى أيام الجامعة هذي الي مو عاجبتك ،
أفضل أيام العمر ،
البكاش : أ ي و الله ، دايما اخواني الكبار يقولون الكلام هذا ،
بس مدري ليش؟؟
سلمان : أقول فكنا من خرابيطك ، وين أفضل أيام ،
طفرانين ، ومع***ن ،
وماعندنا سالفة وبهذله وتعب ..؟؟
البكاش: يا سلمان كلها أيام ، وتمر وتتذكر بعدين تقول
ياليت ذيك الايام ترجع ،
كل الي قبلنا قالوها ..

سلمان : أنا استأذن منكم ، باروح العزبة اصكها نوومة ،،
خلااص طفييييييييت من البارح مواصلة صدقوني ماعاد اجمع ..؟؟ ..
مسوي حلو : والمحاظرة الثانية ؟؟ ..
سلمان : يارجال باسحب عليها ، فكنا من ذا المصري الي يجيب النوووووم ،
ياثقل دمه هو ومحاظرته ..؟؟

أبو عطية :أنا خلصت ، بس أصور أوراق هنا في المكتبة ،
وأروح معك ، لا تروح وتخليني
سلمان : طيب بس أخلص علينا ....أنتظرك في السيارة ، أوكي ..



تنطق لنق ::::تنطق لنق جرس الشقة ..)
أبو عطية : افتح الباب ياسلمان مافيني اتحرك ،
سلمان : يعني ماتعرف تقوم بنفسك ، لا زم انا اسوي كل شي بالشقة هذي
أبو عطية : انا اخوك الكبير ، استح على وجهك وقم انت ..
سلمان يقوم وهو متظايق من هذا الحال ( ينظر من العين السحرية ) ،
يعود لإخيه ،
( وصديقهم البارد سعيد ) _ الساكن الجديد _
يهمس قائلا : هذا اللزقة ، وش رايك نسحب عليه ، ولا نفتح الباب خخخخ
سعيد ( البارد ) : فكنا منه . أي والله ، ياليت تطنشش..

أبو عطية : أقول افتح الباب للرجال وكبك الهبالة ، عيب عليكم ..

اللزقة يدخل وهو حامل كيس اسود بداخله شيء يريد أن يتحدث
من شدة الوثاق عليه ،
ولا يعتقد أحد منهم أنه عشاء أو حلا لأنه لم ولن يفعلها يوما من الأيام ..

اللزقة :سلام شلة على مركاز ،
وياليت يا أخ سلمان لو تزبطلنا برااااد الشاهي ، تراني خرمان ،
سلمان : أنا ما ابي شاهي ، تبي انت رح المطبخ وزبط ( على قولتك )
مثل ماتبي ...
أبو عطية بنظرة حزم : سلمان ، الرجال ضيف ..؟؟
سعيد يتدخل على غير عادته : خلاص ياشباب لا تتهاوشون و افرع لا تفرع ،
وتجي الشرطة ، ومنهو المخطي ومنو الي سكنكم هنا ،
شوي يطردونا من العزبة ، ونقعد مشردين في الشورارع
ولا نقدر نداو م بالجامعة وبعدها فصل ونكبة .....
اللزقة يقاطعه بضحكة عاالية ومزعجة..
:: هههههههههه ياخي انت عندك خيال واسع ، سويت فلم ياباني ،
بس وش رايك تروح تسوي الشاهي ، وتخلي صناعة الأفلام عنك ..

سعيد باتسامه ساخره : أبشر طال عمرك *

طنق لنق :: طنق لنق ( طبعا تعرفون وش يعني الصوت هذا )

أبو عطية ( رغم انه كبير العزبه ) يستحي على وجهه أخيرا ويقوم..
يفتح الباب : هلا وغلا بالجميل ..
مسوي حلو : سلام أبو عطية ، كيفنكم ، ايش اخبارنكم ..؟؟
اللزقة: يصرخ من داخل المجلس ( الخالي من الاثاث ) إلا من زولية ،
استعارها ابو عطية من منزلهم في الديرة ، على أمل أن تعود يوما ما
سالمة من حروق السجائر وبقايا الشاي المسكوب ،
وتلفزيون ( مستعمل ) واظن صحن الدش شراكه بين سكان
الشقق العزوبية كلهم ..؟؟
: هلا أبو جميــل ، تفضل تفضـــل ،
تعال خلني اكسر راسك ، انا جايب السوني معايا ..
مسوي حلو : يجلس وهو يتحدث بحماس منقطع النظير : والله ياهي فرس
ياهي فرس..
وانا جاي عندكم هنا في العزبة المعفنة حقتكم هذي صار موقف
افففففففف بس مع ...
أبو عطية بصوت منخفض : ركبتها ؟ هاه ؟ وش بعد..؟؟
سعيد وهو يحمل براد الشاي : لا تقول شي لين أوصل ، عيد من البداية ،
مسوي حلو : أقلك فرس لقيتها واقفة على الشارع ، على كيف كيفك ،
اللزقة : طيب وش الهرجة ، يعني هي وقفتك ولا ..
مسوي حلو : لا أنا بس شفتها واقفها في الشارع العام ،
وجيت صفطت الكامري الذهبي عندها ..
وقلت خليني أوصلك ياحلو ،
سلمان :لا ياشيخ وأيش التعليق الدلخ هذا ، ومسوي حق بنات..
يارجال والله لوتوقف عندي انت ووجهك ذا الي كنه
ولد الدايمن ما أركب معك ..
أبو عطيه : خل الرجال يكمل السالفة ، كمل كمل يابو جميـل..
مسوي حلو : والله واطلعت البنية ورى ، وقالت لي حي اللصوص الله يخليك ،
قلت في نفسي ( والله ورطه بتوديني في عز الزحمة هناك حارة العبندة ..)
.. لكن لأجل عين تكرم مدينة ،و بالمناسبة هذي ،
خليني اشغلها عبادي الجوهر ، ( تكرم مداين لأجل عينك فأكرمهـــا )

سعيد : ياهووو ، ما انت سهل والله يابو جميل ، المهم عطنا الزبدة ،
وبعدين ..؟

مسوي حلو : ابد والله وصلتها للحارة حقتهم في آخر مكة ،
وعطيتها الرقم ونزلت وجلست تصيح قدام شباب ( بلاك ) جالسين على الدكة
: ياشباااب رقمني الي مايسحي على جهه هذا الي ...
وفزوو الشبااب بيكسروون راسي لونزلت بس عاد خويكم ذيب ،
عشقت الاول ودزيتها .......
بس ، اكيد بتتصل، صح ياشباااب ..؟؟

سلمان : لا ياشيخ ومجمع الشباب حواليك ، وطلعت سالفتك من جنبها ،
يادلخ هذي ساحبتك على وجهك انت والكامري علشان تركب بلاش ،
تضحك عليك وعلى اشكالك ، وكويس انك سلمت من الفرش يالخبل ،
اللزقة ( وهو يفكك اكياسه ) : اقوول خلونا نشغل السوني ، في ناس
بتتكسر روسهم الليلة *

مسوي حلو ( وقد احمر وجهه خجلا من تطنيش الشباب له:o ) : أقول صب
شاهي بس ، ..

××××××××××××××××××

طق طق طق : ( يفتح باب القاعة بهدؤ ) وينظر بابتسامه هبلاء
(الدكتور بسخرية ) : سلمان ، أهلا وسهلا ، وينك يا ابني ؟
سلمان : والله يادكتور ما ادري ايش اقولك ...
الدكتور ( بصوت عالي ) :أطلع برى أنت محروم من دخول اختبار المادة ،
وأنا حذرتك من الاهمال الي انت فيه والتأخر عن المحاظرات ،
بس الظاهر مافيك فايدة ،
سلمان: يادكتور لو سمحت ..يقاطعه الدكتور ..
: لوسمحت انت اطلع ولا تضيع وقتنا معاك ،
يخرج سلمان وهو حزين متفاجئ بردة فعل الدكتور الطيب ،
مثل ما كان يعتقد ،
يعود للعزبة ، ليجد سعيد ( البارد ) وقد تنفخت وجنتيه ،
من آثار السهر ،وقلة النوم ..
سعيد : بدري وش مرجعك الساعة 10 الصبح ؟؟
عادة ترجع 10 وربع ؟؟؟
سلمان : لا بس الدكتور اعتذر عن المحاظرة ، وووو قلت ارجع
سعيد : آهااا ، والله مدري عنك ،
سلمان : خلاص باقولك بس لا تقول لأخوي شي تكفى ،
يابن الحلال الدكتور الغبي هذا احرمني من المادة ،
سعيد : لا ياشيخ ، ماله حق والله ، من جد هو غبي ،
المفروض يجي ينام عندك في العزبة هنا ولا تدري ليه
مايجي يبشك بلووت معنا كل ليلة ، والله غبي ..

سلمان وقد ازداد غضبه : اقول لا تقعد تتمسخرانت ،
لو ادري بك كذا ماقلتلك شي..

سعيد : اقول الله من الهمااالة في ذا الراس ،
انت الحين جاي من آخر الدنيا ومخلي الديرة وعجايزك هناك
يحسبونك بتجيب لهم الفايدة والشهادة الجامعية ،
وانت نايم في العزبة لين انحرمت من المواد ،
مالك دااااعي ، وش رايك ترجع لديرتكم موب احسن لك؟؟
سلمان : خلاص ياخي فكنا من نصايحك الحين ، مزاجي معكر خلقة ...
سعيد : خلاص خلاص ، لا تدف ، بس وش بتسوي ..؟
سلمان : وش تبيني أسوي ، خلاص احمل المادة والترم الجاي ان شاء الله اعديها ، ماعليك ..

ترنطق لنق ترنق لنق :::

سلمان يفتح الباب ، يرى اليمني ، حارس العمارة ، ووجهه الذي
لا يبشر بالخير بتاتا ، منذ رآه لأول وهلة : نعم خيــر انت الثاني ،
عسى ماشر ؟؟
اليمني : سلام عليكم ، يا خي صاحب العمارة يبغى الإيقاااار ( الإيجار ) ،
ويقلكم ياتدفعو يا تتوكلو على الله ، مع السلامة يعني ..؟؟
سلمان : خلاص خير اذا جو الشباب ،
أبو عطية وسعيد قلتلهم وما يصير إلا كل خير إن شاء الله ..
اليمني (بصوت عالي) : يا خي أنا ما اعرف شباب ولا غيرووه ، مالك أنتا ،
تدفعو الإيقار ولا تتوكلو على الله ، مااالك ..؟؟
يشا صاحب العمارة يخاصمني آنا ..؟

سلمان : لاحول ولا قوة الا بالله ، انت من وين تفهم ؟
ما قلتلك الحين يصير خير ، وش تبي اطلعلك الحين من جيبي 6 الاف ريال
واعطيك اياها شايفني ولد الراجحي قدامك ..؟
اليمني ( يغمض عينيه ويرفع رأسه ) متسائلا : يعني متى تدفعو ..؟؟
سلمان : خلاص اذا جوو الشباب شفنا يمكن بكرة ولا بعده...
خلاص فكني منك مع ذا الصبح ترى موب ناقصينك ،

ثم يغلق الباب ، وقد شعر بضيق شديد وقد تكالبت عليه الهموم من كل جانب ،
ثم يشخص ببصره للأعلى ، ويدعو الله بالفرج القريب ×× ،،


انتظرو الجزء الثاني إن كان ودكمممم ( ) يعني لازم شوية إثارة؟؟ لا بس اكيد تطفشوون من القراءة دفعة وحدة ..

تستاهل مرتبة شرف ع هيك قصه
رائعه وممتعه ع الرغم من طوله
على اني مااحب افتح موضوع والقى هرج كثير تقول صك ارض
متضاربين عليه الورثه
اقفله
خخخخخخخخخخخخخخخخخخخخخخخخخخخ

بس مواضيعك لذيذه زيبرنجز يوم تفك ماحتسك
عليك اسلوب شيق وسلسل وخفيف وممتع
وانتظرك بالجزء الثاني ياحبك للأقساط

ههههههههههههههههههههههههههه

وثيقه مرت من هون

ههههههههههههههههههههههههههه هلا بك وثووو ؟؟؟؟؟؟؟ ماتعرف تدلع
المهم اظني خربتها المرة هذي وطولتها اكثر من اللازم والخلق مو فاضية نقعد تقرا كل هذي الخرابيط
وتصدقين انا بعد مثلك ما احب افتح موضوع الا قيه طووووووووويل احس بالملل ...

لكن اعذروني المرة الجاية كلمتين وانتظرو الجزء الثاني .................

هههههههههههههههههههههههه
هههههههههههههههههههههههه
هههههههههههههههههههههههه
بانتظار الجزءءء الثااني
خلنا نقراءء قصص فااضين وعاطلين ماورانا شيء

الظاهر فشلت القصة فشل ذرييييييع ، بس كويس الواحد مايكل مقلب في نفسه بزيادة * وبدون كثر مجاملات *

عاطل وش هالنفسيه الحين
ننتظرك بالاجزاء
اكتب ماعليك شوف المشاهدات كم وصل عددها
الردود لاتهمك يمكن تعبانين من الاجازه مناسبات وحفلات مافيهم يعلقون
<<<<<<<<<<<<< تجبر الخواطر
ههههههههههههههههههههه
وثيقه مرت من هون