[poem=font=",6,white,normal,italic" bkcolor="white" bkimage="https://www.btalah.com/mwaextraedit2/backgrounds/21.gif" border="outset,4,orange" type=0 line=1 align=center use=ex num="0,black""]
أمشي وكني من حيا الوجه مشدود=أسعى وكن فيه شي ..أخافه
الوقت ياسرع الوقت والعود=اللي قضى عمر الشقى والصلافه
لوكان يطلع صبح يومه ورى الذود=لوكان يملك حس لين ولطافه
أدري ولا أدري بس مدري متى .أعود=أدري ولا أدري والمسافه مسافه
اللي أعرفه لو حصل ماحصل فود=مافيه داعي للندم والحسافه
لاجيت عند الباب والباب مسدود=فتحت عند الباب باب الضيافه
أكبر عيالي صبر والصبر عنقود=لاقلت شفت الباب ماقال شافه
أهم حاجه ماتجي البيض في السود=لاجات شفت ألانقيا في الوصافه
لاجات لاتستغرب النقص والزود=لاجات ياكثر الغثى واللقافه
الحق كلمة ماتبي أي مجهود=مايختلف لو نتفق بإختلافه
والهرج لامن صار من دون مقصود=حلمن حلم به صاحبه بس طافه
للحكي لذه مثل ماللسما جود=والحكي في كل المواضيع .. آفه
لو الحكي مخلوق له روح وزنود=في حلوق بعض الناس تلقى زرافه
الصمت قوة وصل والدرب ممدود=والصمت في بعض المواقف ضعافه
والكلمه اللي تشبه الصمت بالكود=أبلغ عباره في زمان الصحافه
أدري ولا أدري بس مدري متى أعود=أدري ولا أدري والمسافه مسافه
[/poem]

قصيده جميله ,, يعطيك العآفيه ..

هذا من ذوقك الراقي مشكور على المتابعه الف شكر اتمنى ان القصيده ترتقي لمستوى ذائقتك الجميله

يعطيك ألف عافيه..
احساس راقي,,

صح لسآن شآعرهآ و تسلم يمين نآقلهآ .

مشكوره بس القصيده اهداء للمنتدى مني انا من كتاباتي مو ناقلها